រាជធានីភ្នំពេញ ៖ ដូចការព្យាកររបស់ក្រសួងធនធានទឹកនិងឧតុនិយម ភ្លៀងបានចាប់ផ្តើមធ្លាក់ពីមធ្យមទៅច្រើន នៅក្នុងក្របខណ្ឌស្ទើរទូទាំងប្រទេស រហូតដល់ថ្ងៃ៣០ មិថុនា ខាងមុខ ។ ស្ថានភាពអាកាសធាតុនេះ…
រាជធានីភ្នំពេញ ៖ ដូចការព្យាកររបស់ក្រសួងធនធានទឹកនិងឧតុនិយម ភ្លៀងបានចាប់ផ្តើមធ្លាក់ពីមធ្យមទៅច្រើន នៅក្នុងក្របខណ្ឌស្ទើរទូទាំងប្រទេស រហូតដល់ថ្ងៃ៣០ មិថុនា ខាងមុខ ។ ស្ថានភាពអាកាសធាតុនេះ ក្រៅពីខេត្តមួយចំនួន មានភ្លៀងធ្លាក់នោះ នៅរាជធានីភ្នំពេញកាលពីថ្ងៃ២៥ មិថុនា ទឹកភ្លៀងដែលមានបរិមាណច្រើន បានពន្លិចទីក្រុងគួរឱ្យកត់សម្គាល់ ក្រោយពីភ្លៀងបានធ្លាក់ក្នុងរយៈពេលជិត២ម៉ោង នាវេលារសៀល ។ តាមដងផ្លូវជាច្រើនកន្លែងរាប់ទាំងលំនៅឋានផងដែរ ត្រូវបានជន់លិច ។
នៅរសៀលថ្ងៃ២៦ ខែមិថុនា លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បានថ្លែងក្នុងសន្និសីទកាសែតថា បរិមាណទឹកភ្លៀងដែលបានបង្អុរចុះមកលើភូមិសាស្រ្តរាជធានីភ្នំពេញ មានកម្ពស់លើសពី៤០មីល្លីម៉ែត្រ គឺលើសពីអ្វីដែលអាចផ្ទុកបានសម្រាប់រាជធានីយើង។
ទោះបីជាបែបណា ការជន់លិចមិនមានរយៈពេលយូរនោះទេ ។ លោកប្រធានមន្ទីរនិយាយថា បញ្ហាទឹកជន់លិចពេលមានភ្លៀងធំម្តងៗនេះ មិនមែនមានន័យថា អាជ្ញាធរមិនយកចិត្តទុកដាក់នោះទេ គឺខិតខំណាស់ទាំងសង្កាត់ ខណ្ឌ និងរាជធានី ។
ទោះបីជាបែបណា បញ្ហាជំនន់ទឹកភ្លៀងនេះ យើងកំពុងដោះស្រាយធ្វើពីលូតូចមកលូធំ តែមិនទាន់អាចភ្ជាប់គ្នា ដោយរលូននៅឡើយ ។ លោក សាំ ពិសិដ្ឋ បង្ហាញថា បញ្ហាលូសំខាន់ណាស់ សូមបងប្អូនប្រជាពលរដ្ឋចូលរួមក្នុងពេលមានភ្លៀងម្តងៗ ចូលរួមកាយលូនៅមុខផ្ទះ ចៀសវាងការកកស្ទះសំរាម ។
ចំណុចដែលលិចខ្លាំងគឺតំបន់ផ្សារកណ្តាល និងតំបន់វិទ្យាល័យឥន្ទ្រទេវី តែលិចមិនយូរទេ ចំណែកការកកស្ទះដោយសំរាមខ្លាំងគឺតំបន់លូទឹកស្អុយ ។លោកប្រធានមន្ទីរនិយាយទៀតថា ធ្វើផ្លូវខូចមួយកំណាត់យើងអាចចរាចរណ៍បាន តែបើស្ទះលូតែមួយគឺច្រាលទាំងអស់ ។ លោកថា ស្ថានីយបូមទឹកជាង១០បានដំណើរការទាំងអស់ ។
លោក សាំ ពិសិដ្ឋ បានបង្ហាញថា រាជធានីភ្នំពេញប្រៀបដូចជាបាតខ្ទះដែលមានទំនប់ទឹកជុំវិញ ដូច្នេះពិតជាអាចប្រឈមពេលមានកម្រិតទឹកភ្លៀងធ្លាក់ខ្លាំងលើសពី៤០មីល្លីម៉ែត្រ ៕
ចែករំលែកព័តមាននេះ