ក្រោយចាញ់ក្រុមអារ៉ាប៊ីសាអូឌីតនៅលទ្ធផល ២-១ អេហ្ស៊ីបបានធ្លាក់ដល់បាតតារាងនៃពូល A មានន័យថា ក្រុមព្រះចៅផារ៉ាអុងមួយនេះត្រូវទៅសង់ពីរ៉ាមីតវិញក្រោយចាញ់ទាំងបីប្រកួតជាប់ៗគ្នានៅវគ្គជម្រុះ ។ ពាក់ព័ន្ធនឹងបរាជ័យរបស់អេហ្ស៊ីបនេះដែរក៏មានរឿងគួរឱ្យចាប់អារម្មណ៍ដូចជា អ្នកចាំទីកីឡាករ Essam El Hadary និងកីឡាករ Mohamed Salah ប្រកាសដើរចេញពីក្រុមជម្រើសជាតិអេហ្ស៊ីបក្រោយលទ្ធផលនៅ World Cup មិនសមបំណង ។
El Hadary គឺជាកីឡាករមានវ័យចំណាស់ជាងគេនៅ World Cup នៅអាយុ៤៥ឆ្នាំ និង១៦១ថ្ងៃ បានសុំទោសដល់អ្នកគាំទ្រអេហ្ស៊ីបទាំងអស់ចំពោះការចាកចេញនេះទោះបីរូបគេបានជួយសង្គ្រោះបាល់ប៉េណាល់ទីតង់ទីមួយប៉ះជាមួយក្រុមអារ៉ាប៊ីសាអូឌីតយប់មិញនេះក៏ដោយ ។
កីឡាករ El Hadary និយាយថា «ខ្ញុំសុំទោសដល់ប្រជាជនអេហ្ស៊ីបទាំងអស់ក្នុងនាមខ្ញុំជាកីឡាករអេហ្ស៊ីបបន្ទាប់ពីចាញ់ទាំងបីប្រកួត ។ ខ្ញុំមានមោទនភាពនូវអ្វីដែលខ្ញុំបានធ្វើហើយសមិទ្ធិផលនេះមានតម្លៃមិនអាចកាត់តម្លៃបានសម្រាប់ប្រទេសអេហ្ស៊ីបទាំងមូល ។ យើងបានព្យាយាមអស់ពីសមត្ថភាពហើយតែមិនមានសំណាងដូចក្រុមជម្រើសជាតិផ្សេងទៀត» ។
ដោយឡែកកីឡាករ Salah វិញក៏កំពុងពិចារណាឈប់លេងឱ្យក្រុមជម្រើសជាតិអេហ្ស៊ីបដែរដោយសារលទ្ធផលមិនសមបំណង ខណៈហ្វេននាំគ្នាលួងគេកុំឱ្យដើរចេញពីក្រុមជម្រើសជាតិ ។ កាលពីរដូវកាលមុន Salah ក្លាយជាកីឡាករល្បីអន្តរជាតិមួយរូប និងបានជាប់ចំណាត់ថ្នាក់ដូច Ronaldo, Messi និងកីឡាករ Neymar បន្ទាប់ពីរកគ្រាប់បាល់ឱ្យក្លិបហ្សងក្រហម Liverpool ច្រើនជាងគេព្រមទាំងជួយក្លិបឡើងដល់វគ្គផ្តាច់ព្រ័ត្រនៃកម្មវិធី UEFA Champions League (UCL) ដែលរូបគេរងរបួសស្មាក្នុងការប្រកួតនោះ ។
តបនឹងបរាជ័យនឹកស្មានមិនដល់នេះគ្រូបង្វឹកអេហ្ស៊ីបលោក Hector Cuper និយាយថា «រូបលោកសង្ឃឹមថាកីឡាករម្នាក់ៗនៅតែជាវីរបុរសឱ្យក្រុមអេហ្ស៊ីប ទោះបីមិនបានកាន់ដៃគ្នាចូលសមរភូមិបន្តទៀតក៏ដោយ» ។ គួរបញ្ជាក់ថា ក្រុមអេហ្ស៊ីបបានបោះជំហានចូលទីលាន World Cup ២០១៨ ក្រោយខកខានរយៈពេល ២៨ ឆ្នាំ ៕
ចែករំលែកព័តមាននេះ