នាង Marisol Valles Garcia អាយុ២០ឆ្នាំ ដែលត្រូវបានតែងតាំងជានាយប៉ូលិសប្រចាំរដ្ឋ Praxedis Guerrevo ប្រទេសម៉ិចស៊ិក ត្រូវបានបណ្តេញចេញពីតំណែងវិញហើយ ដោយសារនាងមិនបានធ្វើការកាលពីថ្ងៃទី៧ មីនា កន្លងមក រយៈពេលមួយថ្ងៃ ក្រោយពីពេលវេលាឈប់សម្រាកដែលត្រូវផ្តល់ឱ្យនាងត្រូវផុតកំណត់ ។ មុននេះមានរបាយការន៍នានាថា នាង Garcia បានចាកចេញពីប្រទេសម៉ិចស៊ិកដើម្បីស្វះស្វែងរកសិទ្ធិជ្រកកោននៅសហរដ្ឋអាមេរិក ដោយសាររងការគំរាមកំហែងជាច្រើនក្នុងប្រទេស ។
នាង Valles Garcia ទទួលបានភាពល្បីល្បាញលើឆាកអន្តរជាតិកាលពីឆ្នាំ២០១០ នៅពេលនាងយល់ព្រមទទួលតំណែងជានាយប៉ូលិស ប្រឈមមុខនឹងគ្រោះថ្នាក់បំផុត ដែលមន្ត្រីម៉ិចស៊ិកជាន់ខ្ពស់ជាច្រើននាក់មិនហ៊ាន
ទទួល ។ នាងជានាយប៉ូលិសស្រីដំបូងគេរបស់ប្រទេសម៉ិចស៊ិក ។
មន្ត្រីរដ្ឋ Praxedis Guerrero និយាយថា នាង Garcia ជានិស្សិតមហាវិទ្យាល័យផ្នែកឧក្រិដ្ឋវិទ្យាត្រូវបានអនុញ្ញាតឱ្យឈប់សម្រាកដោយសារកូនអាយុ៨ខែ របស់នាងមានជំងឺ ប៉ុន្តែនាងបានឈប់លើសពេលកំណត់រយៈពេលមួយថ្ងៃ ។ ដោយសារតែនាងមិនបានសុំច្បាប់បន្ថែមអភិបាលរដ្ឋក៏បានសម្រេចបញ្ចប់តំណែងរបស់នាង ។
នាង Valles Garcia ត្រូវបានតែងតាំងជានាយប៉ូលិសពីខែតុលា ឆ្នាំ២០១០ កន្លងមក ៕
ចែករំលែកព័តមាននេះ