ខេត្តបន្ទាយមានជ័យ ៖ សំណង់រំលោភដីចំណីផ្លូវមួយកន្លែងត្រូវម្ចាស់ប្រើប្រាស់គ្រឿងចក្រកាយកម្ទេចវិញទាំងយប់ក្រោយពីរងការរិះគន់ជុំទិស ហើយត្រូវអាជ្ញាធរប្រាប់ឲ្យរុះរើ ។ សំណង់បំពានដីចំណីផ្លូវនេះនៅជាប់បណ្តោយផ្លូវលំអតីតផ្លូវសូអា ZOA ស្ថិតក្នុងភូមិមិត្តភាពសង្កាត់-ក្រុងប៉ោយប៉ែត ដែលម្ចាស់ឈ្មោះ មៀង ហៃ ហៅ ហៃប៉ាគី ។
ក្រោយមានបទបញ្ជាពីអភិបាលរងក្រុងប៉ោយប៉ែតលោក ទូច មុន្នី បានដឹកនាំក្រុមការងារចុះដល់ទីតាំងកើតហេតុជួបជាមួយម្ចាស់ដីកាលពីរសៀលថ្ងៃទី25 មិថុនា អាជ្ញាធរបានស្នើរសុំឲ្យម្ចាស់ដីរុះរើរបងថ្មីចេញវិញក្នុងរយៈពេល7ថ្ងៃ បើលើស និងមានវិធានការផ្លូវច្បាប់ ។
ដឹងអីនៅយប់ថ្ងៃដដែលទីតាំងកើតហេតុគេឃើញមានគ្រឿងចក្រកាយកម្ទេចរបងអស់វិញទាំងស្រុងហើយព្រឹកឡើងថ្ងៃ26 មិថុនា នេះសូម្បីតែកាកសំណល់ក៏មិនឃើញមាន1ដុំដែរ ។ ក្នុងឯកសារម្ចាស់ដីបានទទួលស្គាល់ថា ខ្លួនពិតជាបានធ្វើរបងពង្រីកលើដីចំណីផ្លូវបន្ថែម4ម៉ែត្រមែន ។
វិធានការដ៏មានប្រសិទ្ធភាពរបស់អាជ្ញាធរក្រុងពលរដ្ឋសម្តែងការត្រេកអរ ប៉ុន្តែពលរដ្ឋក៏សំណូមពរអាជ្ញាធរបន្តវិធានការលើទីតាំងមួយចំនួនទៀតដូចជានៅភូមិសាមគ្គីមានជ័យផងដោយពួកគាត់លើកឡើងថា ផ្លូវ3ទៅ4ខ្សែក្នុងភូមិមួយនេះកន្លែងខ្លះគេបិទយកធ្វើកម្មសិទ្ធ និងកន្លែងខ្លះគេរំលោភបោះបង្គោលយកអស់មួយចំហៀង ៕
ចែករំលែកព័តមាននេះ