រាជធានីភ្នំពេញ ៖ អាជ្ញាធរបានអះអាងថា សមត្ថកិច្ចបង្ក្រាបបទល្មើសគ្រឿងញៀនបានចំនួន ៨.១៧៣ ករណី ចាប់ខ្លួនជនសង្ស័យបានចំនួន១២. ៨០០នាក់ តែចំនួនអ្នកប្រើប្រាស់មានការ ថយចុះប្រមាណ១២,២០%…
រាជធានីភ្នំពេញ ៖ អាជ្ញាធរបានអះអាងថា សមត្ថកិច្ចបង្ក្រាបបទល្មើសគ្រឿងញៀនបានចំនួន ៨.១៧៣ ករណី ចាប់ខ្លួនជនសង្ស័យបានចំនួន១២. ៨០០នាក់ តែចំនួនអ្នកប្រើប្រាស់មានការ ថយចុះប្រមាណ១២,២០% បើប្រៀបធៀបទៅនឹងឆ្នាំកន្លងទៅ ។
គ្រឿងញៀនចំនួនជាង៦៤គីឡូក្រាមត្រូវបានធ្វើការដុតបំផ្លាញចោលនៅព្រឹកថ្ងៃទី២៦ ខែមិថុនា ឆ្នាំ២០១៨ នេះ ក្នុងឱកាសទិវាអន្តរជាតិប្រយុទ្ធប្រឆាំងគ្រឿងញៀននៅមជ្ឍមណ្ឌលកោះពេជ្រ សង្កាត់ទន្លេបាសាក់ ខណ្ឌចំការមន ស្ថិតក្នុងអធិបតីភាពនាយឧត្ដមសេនីយ៍ កែ គឹមយ៉ាន ឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន តំណាងដ៏ខ្ពងខ្ពស់សម្ដេចអគ្គមហាសេនាបតី តេជោ ហ៊ុន សែន នាយរដ្ឋមន្ដ្រីនៃព្រះរាជាណាចក្រកម្ពុជា លោកខៀវ កាញារិទ្ធ រដ្ឋមន្ត្រីក្រសួងព័ត៌មាន មេបញ្ជាការកងរាជអាវុធហត្ថរាជធានី ស្នងការរាជធានីលោកមាន ចាន់យ៉ាដា អភិបាលរងរាជធានីភ្នំពេញ និងមានការចូលរួមពីរដ្ឋមន្ត្រី មន្ដ្រីពាក់ព័ន្ធ សិស្សានុសិស្ស ប្រជាពលរដ្ឋ ចូលរួមក្នុងពិធីនេះ ប្រមាណជាង៤០០០នាក់ ។
លោកមាន ចាន់យ៉ាដា អភិបាលរងសាលារាជធានីភ្នំពេញ តំណាងលោកឃួង ស្រេង អភិបាល រាជធានីភ្នំពេញបានមានប្រសាសន៍ថា«ផែនការយុទ្ធសាស្ត្រពហុវិស័យរបស់អាជ្ញាធរជាតិប្រយុទ្ធប្រឆាំងគ្រឿង ញៀន គឺយើងបានធ្វើការផ្សព្វផ្សាយអប់រំដល់ប្រជាពលរដ្ឋទូទៅបានចំនួន៩.៦៤០.០២១នាក់ ដើម្បីបង្ការ និងទប់ស្កាត់ការប្រើប្រាស់គ្រឿងញៀនក៏ដូចជាដើម្បីឲ្យមានការភ្ញាក់រំលឹកបញ្ជូនកូនចៅដែលប្រើប្រាស់គ្រឿងញៀនទៅរកសេវាព្យាបាល និងស្តារនីតិសម្បទាឲ្យបានទាន់ពេលវេលា ។ បានរកឃើញ និងកត់ត្រាចំនួនអ្នកប្រើគ្រឿងញៀនចំនួន១៨.១០៤នាក់ ដែលចំនួននេះមានការថយចុះប្រមាណ ១២,២០% បើប្រៀបធៀបទៅនឹងឆ្នាំកន្លងទៅ ។ បានផ្តល់ការព្យាបាល និងស្តារនីតិសប្បទាដល់អ្នកញៀនគ្រឿងញៀន ចំនួន១៥.៧៩៦នាក់ គឺស្មើនឹង៨៧,២៥% នៃអ្នកប្រើប្រាស់ និងអ្នកញៀនគ្រឿងញៀនដែលយើងបានរកឃើញ ។ បានបង្ក្រាបបទល្មើសដែលមានការពាក់ព័ន្ធនឹងគ្រឿងញៀនចំនួន ៨.១៧៣ ករណី ចាប់ខ្លួនជនសង្ស័យបានចំនួន១២. ៨០០នាក់ និងរឹបអូសគ្រឿងញៀនគ្រប់ប្រភេទ(រួមទាំងកញ្ជាក្រៀម) បានចំនួន២៩៦គីឡូ និង៥២១ក្រាម ។
លោកបានបន្តថា គណៈកម្មការ និងអនុគណៈកម្មការជំនាញចំនួន៩ បានចាត់ចែងដឹកនាំ និងសម្របសម្រួលដោយអនុវត្តក្នុងរយៈពេល៥ខែ ដើមឆ្នាំ២០១៨ កន្លងមកនេះ សម្រេចបាននូវ លទ្ធផលគួរជាទីមោទន ។ នាយឧត្តមសេនីយ៍ កែ គឹមយ៉ាន ឧបនាយរដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានមានប្រសាសន៍ថា លទ្ធផលទាំងអស់នេះបានបង្ហាញឲ្យឃើញទាំងបទល្មើ ស ចរាចរណ៍ បទល្មើសឧក្រិដ្ឋមានការថយចុះផងដែរ ។ នាយឧត្តមសេនីយ៍ក្នុងឱកាសនោះក៏បានអំពាវនាវដល់ប្រទេសជាមិត្តអង្គការជាតិ អន្តរជាតិ ដៃគូអភិវឌ្ឍន៍វិស័យ សាសនា វិស័យឯកជន និងសប្បុរសជន ចូលរួម និងគាំទ្រជាថវិកាសម្ភារ ដើម្បីរួមគ្នាលើកកម្ពស់ ប្រសិទ្ធភាព ការងារ ប្រយុទ្ធប្រឆាំងគ្រឿងញៀនក៏ដូចជា កសាងមជ្ឈមណ្ឌលព្យាបាល និងស្តារនីតិសម្បទារបស់រាជរដ្ឋាភិបាលឲ្យកាន់តែទទួលបានជោគជ័យ ។
គួររំលឹកថា កាលពីថ្ងៃទី២៦ ខែមិថុនា ឆ្នាំ២០១៧ គណៈកម្មការធ្លាប់បានធ្វើការដុតបំផ្លាញ គ្រឿងញៀនអស់មួយចំនួនធំ វត្ថុតាងគ្រឿងញៀនដ៏ច្រើន ដែលនឹងត្រូវដុតបំផ្លាញក្នុងពេលនេះ គឺជាលទ្ធផលដែលសមត្ថកិច្ចបានបង្ក្រាប និងចាប់យកនៅក្នុងឆ្នាំ២០១៧ ហើយក៏ជាលទ្ធផលនៃការអនុវត្ត ផែនការស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ និងទី៣ ឆ្នាំ២០១៨ របស់រាជរដ្ឋាភិបាលដែលបានដាក់ចេញ ។ សកម្មភាពទាំងអស់នេះ គឺជាព្រឹត្តិការណ៍ដ៏ធំលើកទី៣ ដែលបង្ហាញឲ្យសាធារណជន និងប្រជាពលរដ្ឋបានឃើញថា សមត្ថកិច្ចបានធ្វើការដុតបំផ្លាញ វត្ថុតាងជាច្រើនដែលបង្ក្រាបបាននាពេលកន្លងមក ៕
ចែករំលែកព័តមាននេះ