គន្លឹះដ៏មានអត្ថប្រយោជន៍យ៉ាងសំខាន់បីចំណុច ដែលអ្នកធំមិនអាចរំលងបានគឺ ទាន សីល និងបរិច្ចាគ ទាំងបីប្រការនេះជាមន្តស្នេហ៍យ៉ាងពិសេស អាចទាញប្រជាប្រិយភាពពីមនុស្សមួយនគរបាន ។
ទានៈ ក្នុងរដ្ឋប្រសាសនោបាយ ទានមានប្រយោជន៍ក្នុងការបណ្តុះនូវស្វាមីភ័ក្ត្រ ភក្តីភាព កតញ្ញូកតវេទីធ្វើឱ្យអ្នកដែលបានទទួលទានអាចរហូតដល់ទៅលះបង់អាយុជីវិតដើម្បីអ្នកបរិច្ចាគទានដល់ខ្លួន និងធ្វើឱ្យចងមិត្តភាពបាន លែងជាសត្រូវនឹងគ្នាជារៀងរហូត ។
សីលៈ គឺការធ្វើឱ្យខ្លួនស្ថិតនៅក្នុងប្រក្រតីភាព មិនបង្កនូវសេចក្តីក្តៅក្រហាយដល់ខ្លួននិងអ្នកដទៃ សុភាពរាបសា គោរពច្បាប់វិន័យ ចិញ្ចឹមជីវិតក្នុងអំពើសុចរិតរួមទាំងការប្រើប្រាស់ទ្រព្យសម្បត្តិដោយមានការពិចារណាផង។ ក្នុងរដ្ឋប្រសាសនោបាយសីលនឹងស្ថាបនានូវភាពគោរព ការទុកចិត្តគ្នា ការផ្ញើជីវិតដោយមិនមានភិតភ័យ ពីសំណាក់អ្នកតូច។ រដ្ឋាភិបាលដែលមានសីល ជារដ្ឋាភិបាលដែលស្ថិតនៅលើអំណាចបានតាមអាណត្តិ ដោយមិនបាច់ភិតភ័យថា ប្រជារាស្ត្រ នឹងធ្វើបដិវត្ត ព្រោះខ្លួនមិនស្អាត់ស្អំ ។
បរិច្ចាគៈ គឺការលះបង់ដោយពុំគិតទាមទារ ឬចង់បាននូវអ្វីមកវិញជាបច្ច័យដែលនាំឱ្យកើតនូវការគោរព ការកោតសរសើរ ការយកជាគំរូ។ លះបង់ទ្រព្យដើម្បីអវយវៈ លះបង់អវយវៈដើម្បីជីវិត សូម្បីតែជីវិតក៏ហ៊ានលះបង់ដើម្បីភាពត្រឹមត្រូវ ដើម្បីធម៌។ សង្គមណាក៏ដោយ នឹងអាចស្ថិតនៅបាន ព្រោះអាស្រ័យគ្រប់គ្នាចេះបរិច្ចាគ ។
ចែករំលែកព័តមាននេះ