ខេត្តសៀមរាប ៖ លោកឧត្តមសេនីយ៍ត្រី កែវ រក្សា ស្នងការរង និងជាមេបញ្ជាការកងអន្តរាគមន៍ ពិសេសបានមានប្រសាសន៍ឲ្យដឹងថា ដោយអនុវត្តតាមការណែនាំពីសំណាក់លោកឧត្ដមសេនីយ៍ត្រី ស្នងការនគរបាលខេត្តសៀមរាបបានឲ្យលោក…
ខេត្តសៀមរាប ៖ លោកឧត្តមសេនីយ៍ត្រី កែវ រក្សា ស្នងការរង និងជាមេបញ្ជាការកងអន្តរាគមន៍ ពិសេសបានមានប្រសាសន៍ឲ្យដឹងថា ដោយអនុវត្តតាមការណែនាំពីសំណាក់លោកឧត្ដមសេនីយ៍ត្រី ស្នងការនគរបាលខេត្តសៀមរាបបានឲ្យលោក និងក្រុមការងារដែលមានលោកឧត្តមសេនីយ៍ត្រី អ៊ុំ ចំរើន ស្នងការរង និងជាអនុបញ្ជាការ និងសហការីបានចុះធ្វើការត្រួតពិនិត្យ និងហ្វឹកហាត់ដល់បណ្តាកងកម្លាំងអន្តរាគមន៍ នៅតាមបណ្តាអធិការដ្ឋាននគរបាលក្រុង-ស្រុកទាំង១២ ចំណុះស្នងការដ្ឋាននូវទ្រឹស្តីកាយវិការ និងលំហាត់របៀបជាក់ស្តែងយុទ្ធវិធីបច្ចេកទេសប្រើប្រាស់អាវុធដំបង និងខែល ដើម្បីឲ្យកម្លាំងបានកាន់តែច្បាស់លាស់ឈានទៅអនុវត្តក្នុងកិច្ចការពាររក្សាបាននូវសន្តិសុខសុវត្ថិភាព និងសណ្តាប់ធ្នាប់សង្គមបានល្អប្រសើរនោះត្រូវបានបញ្ចប់ទៅតាមទិសដៅ និងផែនការដែលបានគ្រោងទុក ។
លោកឧត្តមសេនីយ៍បានមានប្រសាសន៍បញ្ជាក់ទៀតថា ការចុះត្រួតពិនិត្យ និងហ្វឹកហាត់ដល់កម្លាំងនេះ គឺបានចាប់ដំណើរការពីថ្ងៃទី០៥ ខែមិថុនា ឆ្នាំ២០១៨ រហូតមកដល់ថ្ងៃទី២២ ខែមិថុនា ឆ្នាំ២០១៨ ។ ហើយនៅព្រឹកថ្ងៃទី២៥ ខែមិថុនា ឆ្នាំ២០១៨ ក្រុមការងារដែលជាគ្រូបង្គោលបានបន្តធ្វើការហ្វឹកហាត់ដល់កងអន្តរាគមន៍ ពិសេសចំនួន២០០នាក់របស់ស្នងការដ្ឋានបន្តទៀតផងដែរ ។
លោកឧត្តមសេនីយ៍បានសង្កត់ធ្ងន់ថា ភារកិច្ចដែលសំខាន់ និងចាំបាច់បំផុតរបស់កងកម្លាំងនគរបាលយើងចំពោះមុខនេះ គឺកិច្ចការពារថែរក្សាសន្តិសុខសុវត្ថិភាព និងសណ្ដាប់ធ្នាប់សាធារណៈសម្រាប់កិច្ចដំណើរការឃោសនាបោះឆ្នោត និងការបោះឆ្នោតជ្រើសតាំងតំណាងរាស្ត្រនីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ខាងមុខ ។
លោកឧត្តមសេនីយ៍ មានប្រសាសន៍បន្ថែមទៀតថា ដើម្បីឲ្យដំណើរការបោះឆ្នោតជ្រើសរើសតំណាងរាស្ត្រប្រព្រឹត្តទៅដោយរលូន និងមានតម្លាភាពនោះមន្ត្រីនគរបាលទាំងអស់ត្រូវត្រៀមខ្លួនឲ្យបានមធ្យ័តបំផុត និងត្រៀមខ្លួនជានិច្ចក្នុងការចេញអន្តរាគមន៍តាមការស្នើសុំពីគណៈកម្មាធិការជាតិរៀបចំការបោះឆ្នោតក្នុងករណីមានការអុកឡុកការគំរាមកំហែងអំពើហិង្សាល្មើសច្បាប់ផ្សេងៗដែលនាំឲ្យរាំងស្ទះដល់ដំណើរការនៃការឃោសនាបោះឆ្នោត និងការបោះឆ្នោតរួមទាំងការយកចិត្តទុកដាក់អនុវត្តបន្តទៀត និងឲ្យកាន់តែមានប្រសិទ្ធភាពក្នុងការបង្ការទប់ស្កាត់បទល្មើសគ្រប់ប្រភេទ ពិសេសទប់ស្កាត់នូវរាល់ល្បិចកល និងឧបាយ -កលរបស់ក្រុមពពួកជនខិលខូច ជាពិសេសត្រូវត្រៀមប្រចាំការ២៤ម៉ោង លើក២៤ម៉ោងក្នុងករណីចាំបាច់ដើម្បីចេញជួយអន្តរាគមន៍រាល់សភាពការណ៍ដែលកើតមានឡើងជាយថាហេតុឲ្យបានទាន់ពេលវេលា និងមានប្រសិទ្ធិភាព ៕
ចែករំលែកព័តមាននេះ