បន្ទាប់ពីស៊ុតបញ្ចូលទីឱ្យក្រុមតោកំណាចអង់គ្លេស៣គ្រាប់ម្នាក់ឯង ឬហៅថា Hat-Tricks ក្នុងជំនួបជាមួយក្រុមប៉ាណាម៉ាដែលបញ្ចប់ក្នុងលទ្ធផលអង់គ្លេសឈ្នះ៦-១ គ្រាប់បាល់របស់កីឡាករ Harry Kane បានវ៉ាដាច់គេឯងនៅ World Cup ។
ខ្សែប្រយុទ្ធក្លិប Tottenham កីឡាករ Kane បានបំបែកកំណត់ត្រាឱ្យក្រុមអង់គ្លេសមានគ្រាប់បាល់ស៊ុតបញ្ចូលទីសរុបខ្ពស់ជាងគេ និងជាជ័យជម្នះធំបំផុតក្នុង World Cup ។ ស្ថិតិគ្រាប់បាល់បឋមរបស់ Kane សរុបមាន ចំនួន៥គ្រាប់ក្នុងការប្រកួតពីរលើកឱ្យអង់គ្លេសនៅ World Cup វ៉ាដាច់គ្រាប់បាល់កីឡាករល្បី លំដាប់ពិភពលោកRonaldo (៤គ្រាប់) Messi (សូន្យគ្រាប់) និង Neymar (១គ្រាប់) រួចទៅហើយ ។
មហិច្ឆតារបស់ប្រធានក្រុមអង់គ្លេសវ័យ២៤ឆ្នាំរូបនេះ មិនសូវជាពុះកញ្ជ្រោលខ្លាំងក្លាប៉ុន្មានទេ តែជាលទ្ធផល Kane អាចនាំនាវាអង់គ្លេសទៅដល់ត្រើយលឿនជាងការរំពឹងទុករបស់គ្រូបង្វឹកលោក Gareth Southgate ទៅទៀត ។
ក្រោយពីឈ្នះក្រុមប៉ាណាម៉ាក្នុងលទ្ធផល ៦-១ម្សិលមិញ ក្រុមអង់គ្លេសលែងឈឺក្បាលរឿងលទ្ធផលឈ្នះ-ចាញ់នៅប្រកួតជម្រុះជុំទី៣ចុងក្រោយហើយ ។ ខណៈក្រុមតោកំណាចមួយហ្វូងនេះកំពុងឈរក្នុងកំពូលតារាងពូល G មាន៦ពិន្ទុស្មើគ្នាជាមួយក្រុមបែលហ្ស៊ិកដោយពីរប្រកួតកន្លងទៅមិនទាន់ចាញ់ដូចគ្នា ។ យ៉ាងណាមិញ ក្រុមទាំងពីរនេះនឹងកាន់ដៃគ្នាទៅវគ្គ១៦ ក្រុម តែមុនទៅត្រូវជួបគ្នានៅរាត្រីថ្ងៃព្រហស្បតិ៍សប្តាហ៍នេះដើម្បីកាត់សេចក្តីនរណាជាបងធំក្នុងតារាងពិតប្រាកដ ៕
ចែករំលែកព័តមាននេះ