ស្ថិតនៅលេខ២ក្នុងពូលC តែដាណឺម៉ាក មិនទាន់អាចធានាពីកៅអីវគ្គ១៦ក្រុមនៅឡើយទេ ដ្បិតពេលនេះអូស្ត្រាលីក៏នៅមានដង្ហើមចង្រិតប្រជែងពិន្ទុជាមួយដែរ ។ ហេតុនេះ ដាណឺម៉ាកត្រូវការឈ្នះ ឬស្មើជាមួយបារាំងដាច់ខាត ដើម្បីអាចឆ្លងទៅវគ្គបន្តដោយជោគជ័យ ។
ការចាប់ផ្តើមប្រកួតក្នុងវគ្គចែកពូលកន្លងមក ដាណឺម៉ាក បានបង្ហាញភាពខ្លាំងរបស់ខ្លួនជាបន្តបន្ទាប់ ដោយសារតែការលេងសហការជាក្រុម គួបផ្សំនឹងមានកីឡាករ Christian Eriksen ជាតួអង្គសំខាន់ប្រចាំក្រុម ។ ៦ប្រកួតចុងក្រោយ ដាណឺម៉ាកមិនទាន់បរាជ័យម្តងឡើយ ដែលនេះបង្ហាញថា ពួកគេរឹតតែរឹងមាំជាងមុន ក្រោមយុទ្ធសាស្រ្តថ្មីរបស់គ្រូបង្វឹក Age Hareide ហើយពួកគេសង្ឃឹមថា នឹងអាចទប់ទល់ជាមួយបារាំង ដោយហោចណាស់ក៏ទទួលបានលទ្ធផលស្មើគ្នាដែរ ។
បារាំងដែលជាក្រុមមានពិន្ទុគ្រប់គ្រាន់ឡើងទៅវគ្គបន្ត នឹងមិនបន្ធូរដៃឱ្យដាណឺម៉ាកយកឈ្នះនោះទេ ព្រោះប្រសិនក្រុមមាន់គកបញ្ចប់ដោយឈរនៅចំណាត់ថ្នាក់លេខ២ក្នុងពូល C នោះ ពួកគេនឹងត្រូវប៉ះក្រុមលេខ១ពូល D ដែលមានជើងខ្លាំងក្រូអាស៊ីកំពុងរង់ចាំ ។ យ៉ាងណាមិញ ប្រសិនបើបារាំងបញ្ចប់ទៅដោយឈរនៅលេខ១ដដែលនេះ ពួកគេនឹងប៉ះក្រុមលេខ២នៅពូល D ដែលអាចជាអាហ្សង់ទីន, អុីស្លង់ ឬនីហ្សេរីយ៉ា ។
រដូវកាលនេះ បារាំងបានបង្ហាញសមត្ថភាពរបស់ខ្លួនកាន់តែខ្លាំងលើសពីការធ្វើជាម្ចាស់ផ្ទះព្រឹត្តិការណ៍យូរ៉ូកាលពីពីរឆ្នាំមុន ព្រោះ១១ប្រកួតចុងក្រោយបារាំងបរាជ័យតែម្តងប៉ុណ្ណោះ និងរកបានយ៉ាងហោចណាស់១.៥គ្រាប់ក្នុងជ័យជម្នះ១០ប្រកួត ។ ទន្ទឹមនឹងនេះ កីឡាករឆ្នើមជាច្រើនសុទ្ធតែពុះកញ្ជ្រោលរកគ្រាប់បាល់ដើម្បីសាងស្នាដៃជាមួយក្រុមជម្រើសជាតិនៅព្រឹត្តិការណ៍ World Cup ។
ផ្អែកតាមសមត្ថភាពកីឡាករក្នុងក្រុមនីមួយៗ និងបទពិសោធន៍ប្រកួតនាពេលកន្លងមក គេហទំព័រទស្សន៍ទាយកីឡាបានទាយថា បារាំងនឹងមិនប្រណីដល់គូប្រកួតឡើយ ដោយអាចយកឈ្នះ២ទល់១ដើម្បីបន្តឈរលេខ១ក្នុងកំពូល ដែលងាយស្រួលប្រឈមជាមួយក្រុមលេខ២នៅពូល D ក្នុងវគ្គ១៦ក្រុមជាជាងប៉ះជើងខ្លាំងក្រូអាស៊ី ៕
ចែករំលែកព័តមាននេះ