ខេត្តសៀមរាប ៖ អាវុធហត្ថក្រុងបានចុះបង្ក្រាបករណីលួចម៉ូតូរបស់ជនរងគ្រោះដែលទុកម៉ូតូនៅចោលខាងមុខផ្ទះបើកហ្គែមស្ថិតនៅចំណុចមុខហាងសាយប័រហោស (ហ្គេមអ៊ីនធ័រណេត)ស្ថិតភូមិទ្រាំង សង្កាត់ស្លក្រាម ក្រុងសៀមរាប រហូតឈានដល់ធ្វើការឃាត់ខ្លួនបានយុវជន២នាក់នៅមុខអង្គរវត្ត ខណៈល្បែង(ហ្គេម)ក្នុងក្រុងសៀមរាបកំពុងពង្វក់ក្មេងប្រុសស្រី បណ្តោយឱ្យចេះលួចលុយ និងទ្រព្យសម្បត្តិរបស់ឪពុកម្តាយ និងព្រមទាំងលួចរបស់អ្នកដទៃផងដែរ ។
ហេតុការណ៍ឃាត់ខ្លួនបានជនសង្ស័យ២នាក់នោះធ្វើឡើងនៅរសៀលថ្ងៃទី២៥ ខែមិថុនា ឆ្នាំ២០១៨ នៅចំណុចមុខអង្គរវត្ត ក្នុងភូមិត្រពាំងសេះ សង្កាត់គោកចក ក្រុងសៀមរាប ។
តាមប្រភពពីមន្ត្រីអាវុធហត្ថខេត្តបានឱ្យដឹងថា បន្ទាប់ពីទទួលបានបណ្តឹងពីជនរងគ្រោះឈ្មោះ ប៉ាក់ លីហេង ភេទប្រុស អាយុ១៧ឆ្នាំ រស់នៅភូមិវត្តបូព៌ សង្កាត់សាលាកំរើក ក្រុងសៀមរាប ដែលបានទុកម៉ូតូនៅមុខហាងសាយប័រហោស(ហ្គេមអ៊ីនធ័រណេត) ហើយចូលទៅលេខហ្គេម ក្រោយមកជនសង្ស័យទាំង២នាក់ធ្វើសកម្មភាពលួចកាច់សោរម៉ូតូមួយគ្រឿងម៉ាកហុងដាឌ្រីមសេ១២៥ ពណ៌ខ្មៅ សេរីឆ្នាំ២០១៨ ពាក់ស្លាកលេខ សៀមរាប1AA-១៣៧៥ ទើបកម្លាំងជំនាញបានចុះស្រាវជ្រាវរហូតឈានដល់ធ្វើការចាប់ខ្លួនជនសង្ស័យពីរនាក់ ស្ថិតនៅចំណុចមុខអង្គរវត្ត ក្នុងភូមិត្រពាំងសេះ សង្កាត់គោកចក ក្រុងសៀមរាប ។
ប្រភពបានបន្តថា ជនសង្ស័យទាំង២នាក់មានទី១- ឈ្មោះ ភាន់ សុផាត ភេទប្រុស អាយុ១៦ឆ្នាំ មុខរបរមិនពិតប្រាកដរស់នៅភូមិត្រពាំងសេះ សង្កាត់គោកចក ក្រុងសៀមរាប និងទី២- ឈ្មោះ ឡាវ គឹមសាន់ ភេទប្រុស អាយុ១៧ឆ្នាំ មុខរបរចុងភៅរស់នៅភូមិទ្រាំង សង្កាត់ស្លក្រាម ។
ក្រោយពីកម្លាំងជំនាញបានឃាត់ខ្លួនយកមកសួរនាំ ហើយជនសង្ស័យទាំង២នាក់ខាងលើបានឆ្លើយសារភាពថា រូបគេពិតជាបានលួចយកម៉ូតូរបស់ជនរងគ្រោះខាងលើពិតប្រាកដមែន ។ បច្ចុប្បន្នជនសង្ស័យទាំង២នាក់ និងវត្ថុតាងត្រូវបានកម្លាំងអាវុធហត្ថក្រុងកំពុងកសាងសំណុំរឿងបញ្ជូនទៅកាន់ទីបញ្ជាការដ្ឋានកងរាជអាវុធហត្ថខេត្ត ដើម្បីរៀបចំកសាងសំណុំរឿងបញ្ជូនបន្តទៅតុលាការខេត្តចាត់ការតាមនីតិវិធីច្បាប់ ។ ចំណែកម៉ូតូយកមកប្រគល់ឱ្យម្ចាស់ដើមវិញ ៕
ចែករំលែកព័តមាននេះ