ខេត្តរតនគិរី ៖ សេចក្តីរាយការណ៍បឋមបានឲ្យដឹងថា នៅវេលាម៉ោង៦ និង១៣នាទីល្ងាច ថ្ងៃទី២៤ មិថុនា ២០១៨ មានករណីចោរមួយក្រុមប្រើកាំបិតចុងស្រួច ចូលភ្ជង់គំរាមប្លន់ក្នុងផ្ទះអ្នកធ្វើម្ហូមការ យកបានលុយកាក់មាសប្រាក់អស់មួយចំនួនធំ រួចក្រុមចោរគេចខ្លួនដោយសុវត្ថិភាព។ ជនរងគ្រោះឈ្មោះ អាន ចន្ធី ភេទស្រី អាយុ៣៩ឆ្នាំ ជនជាតិខ្មែរមុខរបរ ធ្វើម្ហូបការ ស្ថិតក្នុងភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី។
តាមសម្តីជនរងគ្រោះបានរៀបរាប់ប្រាប់សមត្ថកិច្ចថា ក្រុមចោរមានគ្នាពីរនាក់ ពាក់មួកសុវត្ថិភាព ពាក់ម៉ាស់ និងវ៉ែនតាខ្មៅ បានយកកាំបិតចុងស្រួច ប្រវែងប្រហែល៤តឹក ចូលភ្ជង់កគាត់(ជនរងគ្រោះ) ហើយគំរាមដោះយកខ្សែក និងឲ្យចាក់សោទូរយកគ្រឿងអលង្ការជាច្រើន ដូចជាមាស៣តម្លឹង និងប្លាទីនមួយតម្លឹង ក្នុងនោះរួមមាន៖ -ខ្សែកមាសចំនួន០១ខ្សែទម្ងន់០១តម្លឹង ខ្សែដៃមាស០១ខ្សែ ទម្ងន់០១តម្លឹង ចិញ្ចៀនត្រាមាស១វង់ ចំនួន០១តម្លឹង និងកងដៃធ្វើអំពីប្លាទីនចំនួន០២ឈុត ១៦កង ស្មើ០១តម្លឹង ប្រាក់រៀលចំនួន ៣៥០.០០០ រៀល។
ជនរងគ្រោះបន្តថា ក្រោយពីចោរធ្វើសកម្មភាពរួច ពួកគេនាំគ្នារត់គេចខ្លួនចេញតាមទ្វារក្រោយបាត់។ ករណីខាងលើនេះកម្លាំងជំនាញព្រហ្មទណ្ឌកម្រិតធ្ងន់ខេត្តបាន និងកំពុងដុតដៃដុតជើងសហការណ៍ ជាមួយនគរបាលក្រុង និងប៉ុស្ដិ៍រដ្ឋបាលមូលដ្ឋាន ធ្វើការស្រាវជ្រាវតាមនីតិវិធី៕
ចែករំលែកព័តមាននេះ