ខេត្តកំពង់ស្ពឺ ៖ យុវជនជាតៃកុងរថយន្តក្រឡុកស៊ីម៉ង់ត៍គ្មានផ្លាកយីហោមួយគ្រឿង បានកៀបជាប់ក្នុង រថយន្តជាងកន្លះម៉ោងទើបនគរបាល និងប្រជាពលរដ្ឋជួយដឹកយកទៅសង្គ្រោះនៅគ្លីនិកឯកជនមួយ កន្លែង ក្នុងផ្សារកំពង់ស្ពឺ ដោយសារតែតៃកុងរថយន្តក្រឡុកស៊ីម៉ង់ត៍ខាងលើនេះបើកលឿនពេកជ្រុល ទៅបុករថយន្តចំនួន០២គ្រឿងដែលនៅឈប់ស្តុប(ភ្លើងក្រហម)ពីក្រោយពេញទំហឹងបណ្តាលឲ្យគាបជាប់ខ្លួនឯងបែបនេះ។…
ខេត្តកំពង់ស្ពឺ ៖ យុវជនជាតៃកុងរថយន្តក្រឡុកស៊ីម៉ង់ត៍គ្មានផ្លាកយីហោមួយគ្រឿង បានកៀបជាប់ក្នុង រថយន្តជាងកន្លះម៉ោងទើបនគរបាល និងប្រជាពលរដ្ឋជួយដឹកយកទៅសង្គ្រោះនៅគ្លីនិកឯកជនមួយ កន្លែង ក្នុងផ្សារកំពង់ស្ពឺ ដោយសារតែតៃកុងរថយន្តក្រឡុកស៊ីម៉ង់ត៍ខាងលើនេះបើកលឿនពេកជ្រុល ទៅបុករថយន្តចំនួន០២គ្រឿងដែលនៅឈប់ស្តុប(ភ្លើងក្រហម)ពីក្រោយពេញទំហឹងបណ្តាលឲ្យគាបជាប់ខ្លួនឯងបែបនេះ។
គ្រោះថ្នាក់ចរាចរណ៍នេះកើតឡើង កាលពីរសៀលថ្ងៃទី២៥ ខែមិថុនា ឆ្នាំ២០១៨ នៅចំណុចស្តុបមុខមន្ទីរសាធារណការខេត្តកំពង់ស្ពឺ លើកំណាត់ផ្លូវជាតិលេខ៤ ត្រង់ចន្លោះបង្គោល គីឡូម៉ែត្រលេខ៤៦-៤៧ ស្ថិតនៅក្នុងភូមិសំណង់ សង្កាត់រកាធំ ក្រុងច្បារមន ខេត្តកំពង់ស្ពឺ។មន្ត្រីនគរបាលចរាចរណ៍បានឲ្យដឹងថា យុវជនរងគ្រោះមិនទាន់ស្គាល់អត្តសញ្ញាណនៅឡើយទេ គ្រាន់តែដឹងថាមានអាយុជាង២០ឆ្នាំប៉ុណ្ណោះ។ ហើយបានបើករថយន្តក្រឡុកស៊ីម៉ង់ត៍ មិនស្គាល់ក្រុមហ៊ុន មានពណ៌ត្រួយចេក ពាក់ស្លាកលេខ ភ្នំពេញ 5A-0022។
ចំណែករថយន្តរងគ្រោះទី១ ជាប្រភេទរថយន្តទួរីសម៉ាកសាំងយ៉ុងដឹកឧស ពណ៌ស្លែ ពាក់ស្លាកលេខ ភ្នំពេញ 2J-3405 អ្នកបើកបររមានឈ្មោះ យូរ បូរី ភេទប្រុស អាយុ៣៦ឆ្នាំ មុខរបរដឹកឧសលក់ រស់នៅក្នុងភូមិស្នោទី១ សង្កាត់រកាធំ ក្រុងច្បារមន ខេត្តកំពង់ស្ពឺ មិនមានរងរបួសនោះទេ គ្រាន់តែខូចគូថរថយន្តប៉ុណ្ណោះ។ រថយន្តរងគ្រោះទី២ ជាប្រភេទរថយន្តបែនដឹកថ្ម ពណ៌ខៀវ គ្មានស្លាកលេខ និងមិនស្គាល់អត្តសញ្ញាណ អ្នកបើកបរឡើយ ក្រោយកើតហេតុមិនចង់មានរឿងវែងឆ្ងាយ បើករថយន្តទាំងរងការខូចខាតទៅបាត់។
បន្សល់ទុកតែយុវជនរងគ្រោះដែលជាតៃកុងរថយន្តក្រឡុកស៊ីម៉ង់ត៍គ្មានស្លាកយីហោនោះ គាបជាប់ក្នុងរថយន្តកុំតែមានប្រជាពលរដ្ឋ និងកម្លាំងសមត្ថកិច្ចជួយទើបគាស់យកយុវជនខាងលើបាន។ បន្ទាប់មកក៏ដឹកតាមម៉ូតូយកទៅព្យាបាលនៅតាមគ្លីនិកឯកជនមួយកន្លែងនៅក្នុងខេត្តកំពង់ស្ពឺ។ ក្រោយកើតហេតុនគរបាលជំនាញបានធ្វើការវាស់វែងយករថយន្ត២គ្រឿងទៅរក្សាទុកនៅស្នងការដ្ឋាននគរបាលខេត្តកំពង់ស្ពឺរង់ចាំដោះស្រាយនៅពេលក្រោយ៕
ចែករំលែកព័តមាននេះ