ប្រទេសប៉ាគីស្ថាន ៖ នៅប្រទេសប៉ាគីស្ថានមានកោះមួយចំនួន ស្ថិតនៅទល់មុខទីក្រុងការ៉ាជី ត្រូវបានគេហៅថា កោះឆ្កែ ព្រោះគេនាំយកឆ្កែទាំងឡាយទៅព្រលែងចោលនៅទីនោះ។ សុនខទាំងនេះរស់ជាពិសេស ដោយសារការផ្ដល់ចំណីពីសំណាក់ពួកអ្នកនេសាទ។
កោះជាច្រើនលើកលែងតែកោះមួយហៅកោះ DINGY ឬ BUDDO មានសុទ្ធតែឆ្កែរស់នៅ។ កោះទាំងនោះស្ថិតនៅមិនឆ្ងាយប៉ុន្មានពីភាគខាងត្បូង ក្រុងការ៉ាជី។ បើយោងតាមការវាយតម្លៃនានាថា ឆ្កែប្រមាណជា៣៥០០០ក្បាលជាឆ្កែដាច់សង្វែង រស់នៅក្នុងទីក្រុងការ៉ាជី ដែលមានប្រជាជនប្រមាណជា១៥លាននាក់ ប៉ុន្តែសភាពការណ៍របស់ពពួកឆ្កែទាំងនេះ ពុំធ្វើឲ្យប្រជាជនក្រុងការ៉ាជី សប្បាយចិត្តឡើយ ហើយរៀងរាល់ឆ្នាំអាជ្ញាធរក្រុងនេះតែងធ្វើយុទ្ធការបំពុលសម្លាប់ឆ្កែដាច់សង្វែងជាច្រើនរយក្បាល យោងទៅតាមច្បាប់កាលពីសតវត្សទី១៩មក។
នៅតាមកោះដែលគេយកឆ្កែទៅបំបរបង់ ពួកវាអាចគេចផុតពីការសម្លាប់រង្គាល។ ពួកវាអាចរស់ជាពិសេសដោយសារសមានចិត្តរបស់ពួកអ្នកនេសាទ ដែលផ្ដល់ចំណី និងទឹក។ មនុស្សទាំងឡាយពុំដឹងថា តើអ្នកណានាំយកឆ្កែទៅលែងចោលលើកោះឡើយ ប៉ុន្តែពួកអ្នកនេសាទយល់ថា ពួកវាត្រូវបានពួកអ្នកភូមិនាំយកទៅ ដើម្បីឲ្យពួកវាគេចផុតពីអំពើសាហាវរបស់មនុស្ស។ ក្រៅពីការផ្ដល់ចំណីពីសំណាក់ពួកអ្នកនេសាទ ឆ្កែលើកោះអាចបានចំណីជាត្រីងាប់រសាត់ទើរលើកោះ ឬក៏ចាប់សត្វតូចៗរស់លើកោះស៊ី៕ វីដេអូឃ្លីបដកស្រង់ចេញពី ៖ Pakistan’s island of strays dogs
ចែករំលែកព័តមាននេះ