ខេត្តតាកែវ ៖ រថយន្តក្រុងមួយគ្រឿងធ្វើដំណើរពីខេត្តកំពត ឆ្ពោះទៅរាជធានីភ្នំពេញ តាមផ្លូវជាតិលេខ៣ បានរេចង្កូតធ្លាក់ផ្លូវ និងជ្រុលទៅបុកដើមស្វាយមួយដើម រួចក្រឡាប់ចាក់មនុស្សចោលរដូករណែល កាលពីវេម៉ោងប្រមាណ៣ និង៤០នាទីរសៀលថ្ងៃទី២២…
ខេត្តតាកែវ ៖ រថយន្តក្រុងមួយគ្រឿងធ្វើដំណើរពីខេត្តកំពត ឆ្ពោះទៅរាជធានីភ្នំពេញ តាមផ្លូវជាតិលេខ៣ បានរេចង្កូតធ្លាក់ផ្លូវ និងជ្រុលទៅបុកដើមស្វាយមួយដើម រួចក្រឡាប់ចាក់មនុស្សចោលរដូករណែល កាលពីវេម៉ោងប្រមាណ៣ និង៤០នាទីរសៀលថ្ងៃទី២២ ខែមិថុនា នៅចន្លោះគីឡូម៉ែត្រលេខ៨៤និង៨៥ស្ថិតក្នុងឃុំញ៉ែងញ៉ង ស្រុកត្រាំកក់ ។
រថយន្តក្រុងខាងលើនេះម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ ៣D-០៦២៨ ហើយនៅក្នុងគ្រោះថ្នាក់នេះ បណ្តាលឲ្យមនុស្សស្លាប់ចំនួន៣នាក់ ៖១-ឈ្មោះ សុក រ៉ា ភេទប្រុស អាយុ៣៩ ឆ្នាំ ទីលំនៅក្នុងរាជធានីភ្នំពេញ ២-ឈ្មោះ កូ លីណា ភេទស្រី អាយុប្រហែលជាង៣០ឆ្នាំ ទីលំនៅក្នុងរាជធានីភ្នំពេញ ៣-ឈ្មោះ ឡូ រ៉ា ភេទប្រុស អាយុប្រហែល ៣៥ឆ្នាំ ជនជាតិអូស្ត្រាលី ។
ចំណែកអ្នករងរបួសធ្ងន់មានចំនួន៨នាក់ (ប្រុស៥នាក់ស្រី៣នាក់) និងអ្នករបួសស្រាលចំនួន៤នាក់ប្រុសទាំងអស់ រីឯអ្នកបើកបររថយន្តបានរត់គេចខ្លួនបាត់ស្រមោល ។ លោក ឌុក ឌីយ៉ា អធិការនគរបាលស្រុកត្រាំកក់ បានឲ្យដឹងថា អ្នករងរបួសទាំងអស់ ត្រូវបានដឹកយកទៅសង្គ្រោះបន្ទាន់នៅមន្ទីរពេទ្យបង្អែកខេត្ត ។
ចំណែករថយន្តយកមករក្សាទុកនៅអធិដ្ឋាននគរបាលស្រុក ដើម្បីកសាងសំណុំរឿងចាត់ការតាមនីតិវិធី រីឯសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ។ សូមបញ្ជាក់ថា ជនរងគ្រោះទាំងស្លាប់និងរបួស សុទ្ធតែជាក្រុមកាងារអង្គការជួយកុមារកំព្រានៅខេត្តកំពត ៕
ចែករំលែកព័តមាននេះ