រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ក្នុងឱកាសបិទសន្និសីទអន្តរជាតិលើកទី២ ស្តីពី កិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ានក្រោមប្រធានបទ «អភិវឌ្ឍធនធានមនុស្សដើម្បីការអភិវឌ្ឍវិស័យទេសចរណ៍ប្រកប…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ក្នុងឱកាសបិទសន្និសីទអន្តរជាតិលើកទី២ ស្តីពី កិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ានក្រោមប្រធានបទ «អភិវឌ្ឍធនធានមនុស្សដើម្បីការអភិវឌ្ឍវិស័យទេសចរណ៍ប្រកប ដោយនិរន្តរភាព» កាលពីរសៀលថ្ងៃទី២១ ខែមិថុនា នៅសណ្ឋាគារសុខាភ្នំេពញថា ទន្ទឹមនឹងការអបអរសាទរដល់លទ្ធផលនៃសន្និសីទអន្តរជាតិនេះ ខ្ញុំសូមធ្វើការគូសរំលេច និងជូនជាយោបល់បន្ថែមមួយចំនួន ៖
ទី១-ត្រូវយកចិត្តទុកដាក់ចំពោះចរន្តនៃការរីកចម្រើនវិស័យវិទ្យាសាស្ត្រ និងបច្ចេកវិទ្យា ពិសេសក្នុងបរិការណ៍បដិវត្តន៍ឧស្សាហកម្ម៤.០ និងការរីកចម្រើននៃបញ្ហាសិប្បនិមិ្មតដូចជា ប្រព័ន្ធកក់សំបុត្រធ្វើដំណើរ បន្ទប់ស្នាក់នៅ និងមធ្យោបាយដឹកជញ្ជូន ជាដើម ដែលកំពុងធ្វើឱ្យការប្រកួតប្រជែងកាន់តែមានកម្រិតខ្លាំងឡើង ។
ក្នុងន័យនេះ យើងគួរពង្រឹងការចែករំលែកនូវបទពិសោធន៍ និងភាពជោគជ័យរបស់ខ្លួន ក្នុងការដាក់ចេញអនុវត្តគោលនយោបាយទ្រទ្រង់ការអភិវឌ្ឍធនធានមនុស្សឱ្យសមស្រប ឆ្លើយតបបញ្ហាប្រឈមនានា សំដៅសហការអភិវឌ្ឍវិស័យទេសចរណ៍ប្រកបដោយចីរភាព និងបរិយាប័ន្ន ។
ទី២-កិច្ចព្រមព្រៀងទទួលស្គាល់អ្នកជំនាញទេសចរណ៍អាស៊ាន ពិតជាយន្តការធ្វើឱ្យកាន់តែប្រសើរឡើងនូវប្រព័ន្ធបណ្តុះបណ្តាលជំនាញទេសចរណ៍, ចូលរួមកាត់បន្ថយនូវគម្លាតចំណេះដឹង និងជំនាញ រវាងអ្នកជំនាញដូចគ្នាក្នុងតំបន់, សម្រួលការផ្លាស់ប្តូរបទពិសោធន៍ក្នុងការអភិវឌ្ឍជំនាញរវាងប្រទេសសមាជិកទាំងអស់ ។
ដូច្នេះ ស្ថាប័នរដ្ឋ ឯកជន អង្គការជាតិ-អន្តរជាតិ និងដៃគូអភិវឌ្ឍន៍នានា ត្រូវផ្តល់កិច្ចសហការ និងគាំទ្របន្ថែមទៀត សំដៅចូលរួមអនុវត្តស្មារតីកិច្ចព្រមព្រៀងអាស៊ាននេះឱ្យកាន់តែមានប្រសិទ្ធភាព និងសម្រេចគោលដៅរួមរបស់អាស៊ាន ។
ទី៣-ជំរុញបង្កើតយន្តការទទួលស្គាល់បទពិសោធន៍រួម ដោយឈរលើគោលការណ៍គុណភាព និងក្របខ័ណ្ឌគតិយុត្តនៃប្រទេសនីមួយៗ ។ ទន្ទឹមនឹងនេះ ខ្ញុំស្នើដល់ថ្នាក់ដឹកនាំទេសចរណ៍អាស៊ាន ពិនិត្យលទ្ធភាព និងពន្លឿនការដាក់ចូលប្រភេទជំនាញផ្សេងៗក្នុងវិស័យទេសចរណ៍ ទៅក្នុងក្របខ័ណ្ឌនៃកិច្ចព្រមព្រៀងទទួលស្គាល់គ្នាទៅវិញទៅមករវាងអ្នកជំនាញទេសចរណ៍អាស៊ាន ដែលបច្ចុប្បន្នមានតែ៣២មុខជំនាញប៉ុណ្ណោះ ។
ទី៤-វិស័យទេសចរណ៍ ត្រូវបានពិភពលោកចាត់ទុកជាវិស័យដែលមានការជាប់ពាក់ព័ន្ធដោយផ្ទាល់និងដោយប្រយោល ក្នុងការចូលរួមសម្រេចគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិឆ្នាំ២០៣០ ។ ក្នុងន័យនេះ ខ្ញុំសូមស្នើដល់ដៃគូអភិវឌ្ឍន៍ អង្គការជាតិ-អន្តរជាតិ សូមសហការ និងជួយគាំទ្រដល់ប្រទេសសមាជិកអាស៊ានតាមការជាក់ស្តែង ដើម្បីចូលរួមសម្រេចគោលដៅនេះ ។ ខ្ញុំសង្ឃឹមថា លទ្ធផលនៃសន្និសីទលើកទី២នេះ នឹងនាំមកនូវអត្ថប្រយោជន៍សម្រាប់អាស៊ានក្នុងការអភិវឌ្ឍជំនាញទេស ចរណ៍រួមគ្នា សំដៅលើកកម្ពស់ការងារ និងជំនាញក្នុងតំបន់, ចូលរួមអភិវឌ្ឍទេសចរណ៍ប្រកបដោយចីរភាព, ទប់ស្កាត់ផលអវិជ្ជមាន ដើម្បីធានាសុខសន្តិភាព ស្ថិរភាពការអភិវឌ្ឍ និងវិបុលភាពនៅក្នុងតំបន់អាស៊ាន ។
លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍ បានថ្លែងថា អង្គសន្និសីទបានវាយតម្លៃខ្ពស់ចំពោះវាគ្មិនជាតិ-អន្តរជាតិ ដែលបានពិភាក្សាយ៉ាងផុលផុស និងចែករំលែកចំណេះដឹងបទពិសោធន៍ល្អៗ និងទស្សនទានថ្មីៗពាក់ព័ន្ធនឹងការអភិវឌ្ឍធនធានមនុស្សក្នុងវិស័យទេសចរណ៍សំដៅជំរុញការអភិវឌ្ឍទេសចរណ៍អាស៊ានប្រកបដោយនិរន្តរភាព និងក្លាយជាគោលដៅទេសចរណ៍តែមួយប្រកបដោយភាពទាក់ទាញ និងគុណភាពខ្ពស់ ។
លោករដ្ឋមន្ត្រីបន្ដថា កិច្ចពិភាក្សាបានផ្តោតសំខាន់លើប្រធានបទចំនួន៥រួមមាន ៖ ១-បញ្ហាប្រឈមក្នុងការផ្តល់សេវាទេសចរណ៍ប្រកបដោយគុណភាព ក្នុងបរិបទការប្រកួតប្រជែងពិភពលោក ។ ២-ការងារ និងកំណើនសេដ្ឋកិច្ច តើវិស័យទេសចរណ៍ដើរតួនាទីយ៉ាងដូចម្តេចក្នុងការបង្កើតការងារ និងជំរុញការអភិវឌ្ឍសេដ្ឋកិច្ចពិភពលោកប្រកបដោយនិរន្តរភាព ?៣-កិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន និងក្របខ័ណ្ឌគតិយុត្ត ។ ៤-ការទទួលស្គាល់គុណវុឌ្ឍិអាស៊ាន ជាគោលដៅអនាគតនៃការបណ្តុះបណ្តាលជំនាញវិជ្ជាជីវៈទេសចរណ៍ និង៥-កិច្ចពិភាក្សាស្តីពីវិថីទៅកាន់កិច្ចព្រមព្រៀងទទួលស្គាល់ទៅវិញទៅមកលើអ្នកជំនាញទេសចរណ៍អាស៊ាន ។
លោករដ្ឋមន្ត្រីបញ្ជាក់ថា ឆ្លងតាមរយៈកិច្ចពិភាក្សាយ៉ាងផុលផុស អង្គសន្និសីទទាំងមូលទទួលបាននូវធាតុចូលថ្មីៗបន្ថែមទៀតក្នុងការដឹកនាំ និងអភិវឌ្ឍន៍ធនធានមនុស្ស ដើម្បីសហការអភិវឌ្ឍន៍វិស័យទេសចរណ៍ប្រកបដោយនិរន្ដរភាព ៕
ចែករំលែកព័តមាននេះ