អ្វីដែលអ្នកត្រូវដឹងអំពីការព្យាបាលជំងឺគ្រោះថ្នាក់សរសៃឈាមក្នុងខួរក្បាល

ថ្ងៃទី ២៦ ខែ មិថុនា ឆ្នាំ ២០១៨
ម៉ោង ០៩:០០
គុច ណារ៉េន

ភ្នំពេញ-បាងកក ៖ វេជ្ជបណ្ឌិតជំនាញខាងឯកទេសប្រព័ន្ធប្រសាទបានព្រមានថា បើសិនជានរណាម្នាក់មានសញ្ញាព្រមានអាចនឹងកើតមានគ្រោះថ្នាក់សរសៃឈាមខួរក្បាល ក្រុមគ្រួសារត្រូវឆាប់បញ្ជូនគាត់មកកាន់មន្ទីរពេទ្យជាបន្ទាន់ ពីព្រោះការឆាប់ទទួលបានការព្យាបាលនឹងអាចជួយអ្នកជំងឺពីការស្លាប់ និងពិការភាពបាន។

យោងតាមលោកវេជ្ជបណ្ឌិត ច័ន្ទ វិជ្ជា ឯកទេសផ្នែកប្រសាទសាស្ត្រនៃមន្ទីរពេទ្យកាល់ម៉ែត អ្នកជំងឺដែលបានមកទទួលការព្យាបាលនៅមន្ទីរពេទ្យកាល់ម៉ែតនេះ គឺមានចំនួនច្រើន មានទាំងស្ថានភាពស្រាល និងស្ថានភាពធ្ងន់ធ្ងរដល់អាយុជីវិត ។ យើងជួបប្រទះច្រើន ហើយយើងក៏មានផ្នែកខាងហៅថា សង្គ្រោះបន្ទាន់ជំងឺដាច់សរសៃឈាមខួរក្បាលដែរ ហើយការព្យាបាលទៀតសោតគឺមានធ្វើទៅតាមលទ្ធផលនៃការពិនិត្យដោយគ្រូពេទ្យជំនាញ ថា តើជាប្រភេទស្រាល ឬធ្ងន់ធ្ងរ?

លោកវេជ្ជបណ្ឌិត ច័ន្ទ វិជ្ជា មានប្រសាសន៍ថា ជំងឺគ្រោះថ្នាក់សរសៃឈាមក្នុងខួរក្បាល គឺធ្ងន់ធ្ងរត្រូវការឆាប់បញ្ជួនមកមន្ទីរពេទ្យ ដើម្បីទទួលការព្យាបាល ដូច្នេះនៅមន្ទីរពេទ្យកាល់ម៉ែតនេះ បើសិនជាអ្នកជំងឺ ដែលគាត់អញ្ជើញមកដល់ក្នុងរយៈពេល ២ ឬ ៣ ម៉ោងដំបូង គឺយើងមានក្រុមជំនាញផ្នែកសង្គ្រោះបន្ទាន់នៃជំងឺគ្រោះថ្នាក់សរសៃឈាមក្នុងខួរក្បាល ដែលគាត់ដឹងច្បាស់លាស់ថា ចាប់ផ្តើមជួយព្យាបាលដោយវិធីណា។

ម្យ៉ាងទៀតគឺយើងមានម៉ាស៊ីនដែលទំនើបហៅថា MRI 1.5 Tesla ដែលទំនើបបំផុតមានប្រសិទ្ធភាពខ្ពស់ អាចធ្វើរោគវិនិច្ឆ័យបានឆាប់រហ័ស និងច្បាស់លាស់។ អញ្ចឹងការព្យាបាលរបស់យើងក៏យើងអាចធ្វើបានទៅលឿន និងច្បាស់លាស់ដែរ ។ ដូច្នេះគឺអ្នកជំងឺនៅពេលណាដែលគាត់មានអាការៈសង្ស័យអីមួយ សុំអញ្ជើញឲ្យគាត់ទៅជួបពិភាក្សាជាមួយគ្រូពេទ្យដែលនៅក្បែរផ្ទះ ឬមណ្ឌលសុខភាព ឬមន្ទីរពេទ្យដែលដឹងពីជំងឺនេះ ឲ្យបានឆាប់បំផុត ។

លោកវេជ្ជបណ្ឌិតបន្តទៀតថា៖ «ចំពោះការព្យាបាលគឺយើងព្យាបាលដោយថ្នាំ ការព្យាបាលដោយការវះកាត់ និងការព្យាបាលដោយចលនា គឺអាស្រ័យទៅលើស្ថានភាពជំងឺ ដែលយើងជួបជាក់ស្តែង ។ គ្រូពេទ្យជាអ្នកធ្វើរោគវិនិច្ឆ័យ ជាអ្នកកំណត់ថា គាត់ត្រូវព្យាបាលដោយថ្នាំ ឬក៏ស្ថានភាពគាត់ត្រូវធ្វើការវះកាត់ ហើយជាបន្ទាប់ក្រោយពីការព្យាបាល គឺយើងត្រូវធ្វើការព្យាបាលដោយចលនា »។

អ្នកជំងឺគ្រោះថ្នាក់សរសៃឈាមក្នុងខួរក្បាលនឹងទទួលការពិនិត្យសុខភាព និង computerized tomography ឬហៅថា CT scan ។ ពួកគេមួយចំនួនត្រូវបានតម្រូវឱ្យមានការធ្វើតេស្តបន្ថែមទៀតរួមមាន អេកូឌីយ៉ាក្រាម និងស្កេនអ៊ុលត្រាសោន (echocardiogram and a carotid ultrasound scan) ដើម្បីកំណត់ពីភាពធ្ងន់ធ្ងរនៃបញ្ហាហើយនិងធ្វើការព្យាបាលឲ្យចំមូលហេតុរបស់វា។ នេះបើតាមការឲ្យដឹងរបស់លោកវេជ្ជបណ្ឌិត កុមភុល ភ្លុស៊ីន ( Kumpol Plussind MD ) នៃមន្ទីរពេទ្យ Chularat Hospital នៃប្រទេសថៃ ។

ដោយសារតែប្រភេទនៃជំងឺនេះ មានពីរផ្សេងគ្នា និងត្រូវបានបង្កឡើងដោយកត្តាផ្សេងៗគ្នា ដូច្នេះការព្យាបាល តម្រូវឲ្យមានការព្យាបាលខុសៗគ្នាផងដែរ។ វាជាការសំខាន់ដែលអ្នកជំងឺគ្រោះថ្នាក់សរសៃឈាមក្នុងខួរក្បាលត្រូវទៅជួបគ្រូពេទ្យក្នុងរយៈពេល ១ ឬ ២ ម៉ោង បន្ទាប់ពីមានសញ្ញា ឬរោគសញ្ញាដំបូងត្រូវបានកត់សម្គាល់។ ជំងឺគ្រោះថ្នាក់សរសៃឈាមខួរក្បាល មានពីរប្រភេទ គឺដាច់សរសៃឈាមខួរក្បាល (Hemorrhagic stroke) និងការស្ទះសរសៃឈាមក្នុងខួរក្បាល (Ischemic stroke) ។

សម្រាប់ការព្យាបាល ជំងឺដាច់សរសៃឈាមខួរក្បាល (Hemorrhagic stroke) គឺផ្តោតទៅលើការគ្រប់គ្រងការហូរឈាម និងបន្ថយសម្ពាធលើខួរក្បាល ចំណែកឯការព្យាបាលជំងឺការស្ទះសរសៃឈាមក្នុងខួរក្បាល (Ischemic stroke) គឺអាចចាប់ផ្តើមដោយការចាក់ថ្នាំប្រឆាំងនឹងការកកឈាម ដើម្បីបំបែកកំណកឈាម និងបន្ទាប់មកប្រើឱសថ antiplatelet ដើម្បីរារាំងកុំឲ្យវាកើតឡើងម្តងទៀត៕

អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA