រាជធានីភ្នំពេញ ៖ ក្រោយពីតុលាការបានធ្វើការដោះលែងស្ត្រីម្នាក់ជាមេតុងទីន ដែលពាក់ព័ន្ធលើទឹកប្រាក់ប្រមាណជាង២លាន៦សែនដុល្លារអាមេរិក កាលពីល្ងាចថ្ងៃទី២៤ មិថុនា កន្លងមក នៅព្រឹកថ្ងៃទី២៥ មិថុនា នេះ តំណាងឱ្យភាគីខាងដើមបណ្តឹង១៧រូប បានលើកគ្នាមកកាន់សាលាដំបូងរាជធានី ក្នុងគោលបំណងជួបលោក កូយ សៅ ដែលជាចៅក្រមសើុបសួរកាន់សំណុំរឿងនេះ ចង់ដឹងថា តើមានមូលដ្ឋានអ្វីខ្លះ ដែលត្រូវដោះលែងមេតុងទីននោះ ដែលភាគីដើមបណ្តឹងមិនទាន់ទទួលបានភាពកក់ក្តៅមកវិញផង ។
ប៉ុន្តែនៅពេលតំណាងដើមបណ្តឹងបានដើរចូលទៅរកជួបលោកចៅក្រម កូយ សៅ ដើម្បីសាកសួររឿងដោះលែងមេតុងទីននោះ ត្រូវបានមន្ត្រីសាលាដំបូងជម្រាបជូនលោកប្រុស និងអ្នកស្រីថា ផុតម៉ោងរដ្ឋបាលហើយ ឱ្យវិលទៅវិញសិនទៅ ។
អ្នកតាមដានសំណុំរឿងពាក់ព័ន្ធលើទឹកប្រាក់២លាន៦សែនដុល្លារអាមេរិកនេះ បានសង្កេតឃើញថា ការវិវាទនីតិវិធីរវាងព្រះរាជអាជ្ញារង គឺលោក ហ៊ឹង ប៊ុនថន តំណាងអយ្យការអមសាលាដំបូងរាជធានីភ្នំពេញ បានចោទប្រកាន់ស្ត្រីមេតុងទីនម្នាក់ឈ្មោះ លី គឹមហួរ ពីបទ «រំលោភលើទំនុកចិត្ត» ជាបទល្មើសព្រហ្មទណ្ឌ ពាក់ព័ន្ធការស៊ីដាច់ប្រាក់កូនតុងទីន១៧នាក់ លើទឹកប្រាក់២លាន៦សែនដុល្លារអាមេរិក ។
ប៉ុន្តែលោក កូយ សៅ ចៅក្រមស៊ើបសួរយល់ថា នេះជារឿងរដ្ឋប្បវេណី ដោយសម្រេចមិនឃុំខ្លួនស្ត្រីតុង
ទីនទេ គ្រាន់តែតម្រូវដាក់ឱ្យស្ថិតក្រោមការត្រួតពិនិត្យតាមផ្លូវតុលាការ រួចដោះលែងឱ្យទៅផ្ទះវិញ ។ ការសម្រេចដោះលែងមេតុងទីននេះ បានធ្វើឱ្យកូនតុងទីនទាំង១៧នាក់ កំពុងមានប្រតិកម្មលើលោកចៅក្រមទើបបានជាមានតំណាងចេញមុខ ទៅរកជួបលោកចៅក្រម ដើម្បីសួរនាំឲ្យច្បាស់អំពីនីតិវិធី ដោះលែងមេតុងទីននោះ ។
ផ្ទុយមកវិញ បើលទ្ធផលគ្មានចម្លើយឲ្យសមស្រប តាមបណ្តឹងលើទឹកប្រាក់ជាង២លានដុល្លារ ដែលប៉ះពាល់ដល់ប្រយោជន៍ពួកគាត់នោះទេ តំណាងដើមបណ្តឹង និងពិភាក្សាជួយមេធាវីការពារក្តី រួមគ្នាធ្វើលិខិតមួយដាក់ជូនទៅអគ្គព្រះរាអាជ្ញាសាលាឧទ្ធរណ៍ ជាការទទួចឲ្យជួយស្វែងរកយុត្តិធម៍មកវិញ ដែលចៅក្រមសាលាដំបូងដោះលែងមេតុងទីន សុីដាច់ប្រាក់ជាង២លានដុល្លារនោះ ។ ហើយដើមបណ្តឹងបាន និងគ្រោងធ្វើពាក្យដាក់ចូលទៅអង្គភាពប្រឆាំងអំពើពុករលួយ ដើម្បីឲ្យបើកការអង្កេតលើរឿងនេះវិញ ។
ពិសេសក្រុមសមាជិកអ្នកលេងតុងទីនទាំង១៧នាក់ បាននិងកំពុងរៀបចំធ្វើញាតិមួយដាក់ចូលទៅខុទ្ទកាល័យសម្តេចអគ្គមហាសេនាបតីតេជោ ហ៊ុន សែន ផងដែរ ដើម្បីជំរាបជូនសម្តេចឱ្យបានដឹងពីរឿង មេតុងទីនបោកអស់ប្រាក់ជាង២លានដុល្លារ ខណៈពេលសមត្តកិច្ចចាប់ខ្លួនមេតុងទីននោះបានហើយ មិនទាន់មានដំណោះស្រាយជាមួយដើមបណ្តឹងផង ស្រាប់តែចៅក្រមសើុបសួរដោះលែងស្ងាត់ៗឲ្យទៅវិញបាត់ ។ ដូច្នេះ រឿងនេះមានតែស្ថាប័នកំពូល ពិសេសសម្តេច ហ៊ុន សែន ទេ ដែលអាចជួយរកយុត្តិធម៍ដល់ពួកគេបាន ៕
ចែករំលែកព័តមាននេះ