រាជធានីភ្នំពេញ ៖ កីឡាករ ណាត សៀកនិន ហៅពេជ្រ ម្ទេសខ្មាំង ម្ចាស់មេដាយសំរឹទ្ធកីឡាស៊ីហ្គេមលើកទី២៩ឆ្នាំ២០១៧ និងជាម្ចាស់មេដាយមាសកីឡាជាតិលើកទី២ឆ្នាំ២០១៨ បានបង្ហាញមហិច្ឆតារបស់ខ្លួននៅក្នុងព្រឹត្តិការណ៍ស៊ីហ្គេមឆ្នាំ២០២៣ពេលដែលកម្ពុជាធ្វើម្ចាស់ផ្ទះដោយខិតខំហ្វឹកហាត់បង្កើនសមត្ថភាពបន្ថែមធ្វើយ៉ាងណាដណ្ដើមមេដាយមាសជូនជាតិឱ្យបាន។
ពេជ្រ ម្ទេសខ្មាំង ជាកីឡាករប្រដាល់សាកលដ៏ឆ្នើមមួយរូបនៅក្នុងក្រុមជម្រើសជាតិប្រភេទទម្ងន់៥៦គីឡូក្រាម បានចូលហ្វឹកហាត់ប្រដាល់នៅក្នុងក្លិបអង្គការអរុណរះក្នុងភូមិអរុណរះស្រុកស្អាង ខេត្តកណ្ដាល តាំងពីឆ្នាំ២០០០មកម្ល៉េះ ។ ដោយសារមានដុងតាំងពីកំណើត គួបផ្សំជាមួយនឹងការខិតខំប្រឹងប្រែងហ្វឹកហាត់ទៀតផងនោះ មិនយូរប៉ុន្មានគេត្រូវបានអនុញ្ញាតឱ្យចូលរួមប្រកួតក្នុងព្រឹត្តិការណ៍ជើងឯកថ្នាក់ជាតិជាញឹកញាប់ហើយទទួលបានជ័យជម្នះជាបន្តបន្ទាប់ ។ ដោយសារមាឌល្អិតតែរហ័សរហួន និងមានចិត្តសឿងមិនងាយចុះចាញ់គូប្រកួត គេក៏បានផ្ដល់រហស្សនាមដល់កីឡាកររូបនេះថា ពេជ្រ ម្ទេសខ្មាំង រហូតមកទល់សព្វថ្ងៃនេះ។
ចាប់តាំងពីឡើងកូដប្រកួតមិនដែលចាញ់ពេជ្រ ម្ទេសខ្មាំង ទទួលបានឱកាសចូលជាសមាជិកពេញសិទិ្ធនៅក្នុងសហព័ន្ធកីឡាប្រដាល់កម្ពុជា និងបានជាប់ជាកីឡាករប្រដាល់សាកលជម្រើសជាតិនៅឆ្នាំ២០១៣ ។ នៅឆ្នាំ២០១៤គេត្រូវបានបញ្ជូនឱ្យទៅចូលរួមប្រកួតកីឡាស៊ីហ្គេមនៅប្រទេសសិង្ហបុរី តែមិនទទួលបានលទ្ធផលល្អឡើយ ។ ទោះបីយ៉ាងណា ពេជ្រ ម្ទេសខ្មាំងនៅតែត្រូវបានបញ្ជូនឱ្យទៅចូលរួមប្រកួតនៅបរទេសជាញឹកញាប់ដើម្បីទទួលបទពិសោធន៍មកអភិវឌ្ឍសមត្ថភាពរបស់ខ្លួន ។ នៅឆ្នាំ២០១៧កន្លងទៅនេះ ពេជ្រ ម្ទេសខ្មាំងត្រូវបានសហព័ន្ធកីឡាប្រដាល់សាកលកម្ពុជាបញ្ជូនឱ្យទៅចូលរួមប្រកួតកីឡាស៊ីហ្គេមលើកទី២៩នៅប្រទេសម៉ាឡេស៊ី ដោយដណ្ដើមបានមេដាយសំរឹទ្ធ១គ្រឿងក្នុងប្រភេទទម្ងន់៥៦គីឡូក្រាម។
ជាមួយនឹងការហ្វឹកហាត់ត្រៀមប្រកួតកីឡាស៊ីហ្គេមឆ្នាំ២០២៣នេះផងដែរ លោកវេជ្ជបណ្ឌិតឆឹង យ៉ៅយ៉េន ប្រធានសហព័ន្ធកីឡាប្រដាល់សាកលកម្ពុជា បានមានប្រសាសន៍ថា ប្រទេសថៃនិងវៀតណាម បានគាំទ្រកម្ពុជាឱ្យទៅហ្វឹកហាត់នៅប្រទេសគេហើយគេជាអ្នករ៉ាប់រងទាំងអស់ ។ ប៉ុន្តែលោកគិតថា ហ្វឹកហាត់នៅប្រទេសទាំង២នោះបានត្រឹមតែមិនធ្វើឱ្យកីឡាករយើងដើររហេតរហូតប៉ុណ្ណោះ ចំពោះកម្រិតនៃការហ្វឹកហាត់មិនលើសគ្នានោះទេ ។ ម្យ៉ាងវិញទៀតក្នុងពេលហ្វឹកហាត់ គេក៏មិនឱ្យកីឡាករយើងសមកម្លាំងជាមួយកីឡាករជម្រើសជាតិរបស់គេដែរ។
ដូច្នេះលោកគិតថា មានតែទៅហ្វឹកហាត់នៅប្រទេសចិនឬប្រទេសកូរ៉េប៉ុណ្ណោះទើបអាចល្អជាងនេះ ។ ទោះបីយ៉ាងណាពាក់ព័ន្ធនឹងបញ្ហានេះលោកកំពុងតែពិភាក្សាជាមួយគណៈកម្មាធិការជាតិអូឡាំពិកកម្ពុជា ថាតើត្រូវបញ្ជូនទៅប្រទេសណាមួយឱ្យពិតប្រាកដ។
លោក វ៉ែន សុផល គ្រូឈុតធំក្នុងក្រុមជម្រើសជាតិផ្នែកប្រដាល់សាកលបានឱ្យដឹងថា បើនិយាយពីកម្រិតបច្ចេកទេសនៃការហ្វឹកហាត់ប្រទេសណាក៏មិនលើសគ្នាដែរ សំខាន់ឱ្យតែកីឡាករមានឆន្ទះក្នុងការហ្វឹកហាត់ប៉ុណ្ណោះ។ គ្រាន់តែគេល្អជាងយើងត្រង់ថា សម្ភារហ្វឹកហាត់ទំនើបជាង កន្លែងស្នាក់នៅល្អ ហូបចុកគ្រប់គ្រាន់ និយាយរួមអ្វីៗសុទ្ធតែស្តង់ដារអន្តរជាតិទាំងអស់ ។ ទោះបីយ៉ាងណា កីឡាករ ពេជ្រ ម្ទេសខ្មាំង ប្រាប់ថា អ្វីដែលគេចង់បានគឺការចេញទៅហ្វឹកហាត់នៅក្រៅប្រទេសអាចល្អជាងនៅក្នុងស្រុក ព្រោះការហ្វឹកហាត់ក្នុងស្រុកកីឡាករដែលគេសមជាមួយសុទ្ធតែមានកម្រិតទាបជាងមិនអាចជួយបង្កើនកម្រិតបច្ចេកទេសបន្ថែមលើសពីហ្នឹងបានឡើយ៕
ចែករំលែកព័តមាននេះ