ខេត្តព្រះសីហនុ ៖ ជនជាតិចិនម្នាក់ក្នុងចំណោម៤នាក់ ដែលពាក់ព័ន្ធនឹងករណីប្លន់ប្រដាប់អាវុធ កាលពីយប់ថ្ងៃទី២២ មិថុនា នៅភូមិ១ សង្កាត់លេខ៣ ក្រុងព្រះសីហនុ បានត្រូវសមត្ថកិច្ចបញ្ជូនខ្លួនទៅសាលាដំបូងនៅថ្ងៃទី២៤…
ខេត្តព្រះសីហនុ ៖ ជនជាតិចិនម្នាក់ក្នុងចំណោម៤នាក់ ដែលពាក់ព័ន្ធនឹងករណីប្លន់ប្រដាប់អាវុធ កាលពីយប់ថ្ងៃទី២២ មិថុនា នៅភូមិ១ សង្កាត់លេខ៣ ក្រុងព្រះសីហនុ បានត្រូវសមត្ថកិច្ចបញ្ជូនខ្លួនទៅសាលាដំបូងនៅថ្ងៃទី២៤ ខែមិថុនា ។ ជនសង្ស័យជាចោរប្លន់មិនធម្មតាទេ ជិះរថយន្តសុទ្ធតែម៉ាករ៉ុលរ៉យ ដែលមានតម្លៃស្ទើរមួយលានដុល្លារ ។ យោងតាមលោកឧត្តមសេនីយ៍ត្រី កុល ផាលីស្នងការរងនគរបាលខេត្តទទួលផែនព្រហ្មទណ្ឌបានឱ្យដឹងថា យោងតាមបទបញ្ជាផ្ទាល់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ក្រោយពេលទទួលពាក្យបណ្តឹងពីពលរដ្ឋឈ្មោះ គង់ ទីប៉ោ ភេទប្រុស អាយុ៣១ឆ្នាំ មុខរបររត់រថយន្តឈ្នួល មានទីលំនៅក្នុងសង្កាត់ដង្កោ ខណ្ឌដង្កោ រាជធានីភ្នំពេញ ពីបទប្លន់ប្រដាប់អាវុធ កាលពីវេលាម៉ោង៨និង៤០នាទី យប់ថ្ងៃទី២២ ខែមិថុនា នៅភូមិ១ សង្កាត់លេខ៣ ក្រុងព្រះសីហនុ កម្លាំងនគរបាលព្រហ្មទណ្ឌ សហការជាមួយនគរបាលក្រុងព្រះសីហនុ នគរបាលប៉ុស្តិ៍ និងកងអន្តរាគមន៍ពិសេស ធ្វើការស្រាវជ្រាវក៏កំណត់មុខសញ្ញាបានម្នាក់ដែលកំពុងផឹកស៊ីនៅក្លិបកម្សាន្ត CASA ស្ថិតក្នុងភូមិ៤ សង្កាត់លេខ៤ ។
លុះនៅវេលាម៉ោង១០យប់ថ្ងៃដដែល កម្លាំងសមត្ថកិច្ចបានធ្វើការហុ៊មព័ទ្ធចាប់ខ្លួនជនសង្ស័យឈ្មោះ Ly Ker Xing ភេទប្រុស អាយុ២៤ឆ្នាំ ជនជាតិចិន ជាអ្នកបើកបររថយន្តកាស៊ីណូ កាន់លិខិតឆ្លងដែនលេខE88340722 ចុះថ្ងៃទី១៨ ខែតុលា ឆ្នាំ២០១៦ ផុតកំណត់ថ្ងៃទី១៧ ខែតុលា ឆ្នាំ២០២៦ ទិដ្ឋាការលេខ E1-01359781 ចុះថ្ងៃទី១ ខែមករា ឆ្នាំ២០១៨ ផុតកំណត់ថ្ងៃទី១ ខែមករា ឆ្នាំ២០១៩ ។ ក្នុងសកម្មភាពប្លន់ គឺជនសង្ស័យមានគ្នា៤នាក់ជាជនជាតិចិនដូចគ្នា បានប្រើវិធីហៅជនរងគ្រោះមកយកលិខិតឆ្លងដែនទៅបន្តទិដ្ឋាការ។ លុះពេលជួបមុខគ្នា ក៏ត្រូវក្រុមជនសង្ស័យប្លន់យកលុយចំនួន៥០០ដុល្លារ ប័ណ្ណបើកបរ១សន្លឹក ប័ណ្ណសម្គាល់រថយន្ត១សន្លឹក អត្តសញ្ញាណប័ណ្ណសញ្ជាតិខ្មែរ១សន្លឹក ។លោកស្នងការរងបន្តថា ក្រោយពេលទទួលបានពាក្យបណ្តឹង ក្រោមការចង្អុលដឹកនាំពីលោកស្នងការ ជួន ណារិន្ទ និងមានការសម្របសម្រួលនីតិវិធីដោយលោក គៀង សុន្ធារោ ព្រះរាជអាជ្ញារងអមសាលាដំបូងខេត្ត ទើបឈានដល់ការឃាត់ខ្លួនជនសង្ស័យ ។ 
ជាមួយនឹងការឃាត់ខ្លួននេះ សមត្ថកិច្ចបានរកឃើញវត្ថុតាងមាន លុយ៥០០ដុល្លារ(របស់ជនរងគ្រោះ) កាំភ្លើងខ្លី១ដើមម៉ាករូឡូលេខ៣៨.SWPL គ្រាប់៣គ្រាប់ ជាអាវុធធ្វើសកម្មភាព រថយន្តម៉ាករ៉ុលរ៉យ(Rolls Royce) ពណ៌ស្លែ ពាក់ផ្លាកលេខ ភ្នំពេញ ២BP-៦៦៦៦ ជាមធ្យោបាយជិះធ្វើសកម្មភាព ។ ចំណែកជនសង្ស័យ៣នាក់ទៀតជាជនជាតិចិនដូចគ្នា កម្លាំងជំនាញកំពុងធ្វើការស្រាវជ្រាវដើម្បីចាប់ខ្លួនជាបន្ត ៕ 
ចែករំលែកព័តមាននេះ