រាជធានីភ្នំពេញ ៖ យុវជនម្នាក់រួមនឹងនារីវ័យក្មេងម្នាក់មិនដឹងថា ចេញពីផឹកស៊ីនៅកន្លែងណានោះទេ គឺបានបើករថយន្តសេរីទំនើបក្នុងល្បឿនលឿនជ្រុលហោះធ្លាក់ផ្លូវបុកផ្ទប់នឹងដើមពោធិ៍ បណ្តាលឲ្យរងការខូចខាតរថយន្តយ៉ាងដំណំ តែសំណាងល្អមិនមានគ្រោះថ្នាក់ដល់មនុស្ស ហេតុការណ៍នេះដែរបានកើតឡើងនៅវេលាម៉ោង១និង៣០នាទីរំលងអធ្រាត្រឈានចូលថ្ងៃទី២៥ ខែមិថុនា ឆ្នាំ២០១៨ ចំណុចគល់ស្ពានព្រះមុនីវង្សចាស់ ត្រើយខាងកើត ផ្លូវជាតិលេខ១ សង្កាត់ច្បារអំពៅ១ ខណ្ឌច្បារអំពៅ ។
តាមប្រភព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់រួមដំណើរជាមួយនឹងនារីវ័យក្មេងម្នាក់មិនដឹងថា ចេញពីផឹកវិញនៅទីណានោះ គឺបានបើករថយន្តសេរីទំនើប ពណ៌ស ពាក់ស្លាកលេខ ភ្នំពេញ 2AL- 0016 ធ្វើដំណើរតាមផ្លូវជាតិលេខ១ ក្នុងទិសដៅពីកើតទៅលិច(ពីខេត្តចូលទៅភ្នំពេញ) ក្នុងល្បឿនលឿន ខណៈមកដល់ចំណុចកើតហេតុដែលជាផ្លូវរៀងកោង ហើយណាមួយអ្នកបើកបរស្រវឹងផងនោះទើបបួងចង្កូតមិនទាន់ បណ្ដាលឲ្យរថយន្តហោះធ្លាក់ផ្លូវចុះពីលើគល់ស្ពានព្រះមុនីវង្សចាស់ជ្រុលបុកដើមត្របែកព្រៃបាក់អស់មួយដើម ពេលនោះដែររថយន្តមិនទាន់អស់ល្បឿនក៏បន្តទៅបុកផ្ទប់និងដើមពោធិ៍បន្ថែមទៀត បណ្ដាលរថយន្តរងការខូចខាតខ្ទេចផ្នែកខាងមុខព្រមទាំងផ្ទុះពោងសុវត្តិភាព តែសំណាងល្អមិនមានគ្រោះថ្នាក់ ។
ភ្លាមៗនោះដែរ អ្នកបើកបរបានចុះពីលើរថយន្តទាំងស្ថានភាពស្រវឹងទ្រេតទ្រោត ហើយក៏ត្រូវបានសមត្ថកិច្ចឃាត់ខ្លួនយកទៅសាកសួរនៅអធិការដ្ឋានខណ្ឌច្បារអំពៅផងដែរ ដោយឡែកនារីវ័យក្មេងដែររួមដំណើរជាមួយក៏បានគេចេញពីកន្លែងកើតហេតុផងដែរ ។
ក្រោយពេលកើតហេតុ រថយន្តបង្កព្រមទាំងអ្នកបើកបរត្រូវបានសមត្ថកិច្ចឃាត់ខ្លួនយកទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ៕
ចែករំលែកព័តមាននេះ