រាជធានីភ្នំពេញ ៖ ស្ត្រីម្នាក់ត្រូវបានគេស្គាល់ថា ជាមេតុងទីន ដែលរងនូវបណ្តឹងរបស់សមាជិកក្រុម អ្នកលេងតុងទីន លើទឹកប្រាក់ប្រមាណ២លាន៦សែនដុល្លារអាមេរិក កាលពីម៉ោង៤រសៀល ថ្ងៃទី២៤ មិថុនា ត្រូវបានចៅក្រមសើបសួរសាលាដំបូងរាជធានីភ្នំពេញ ធ្វើការដោះលែងឲ្យមានសេរីភាពវិញ ក្រោយពីតំណាងអយ្យការចោទប្រកាន់ពីបទ រំលោភលើទំនុកចិត្ត។ ប៉ុន្តែអ្វីដែលគួរឲ្យកត់សម្គាល់នោះ ត្រង់ថា ពេលកម្លាំងសមត្ថកិច្ចកងរាជអាវុធហត្ថរាជធានីភ្នំពេញនាំខ្លួនស្ត្រីមេតុងទីនទៅតុលាការ គាត់ដើរចូលតាមសម្រួលទេ លុះពេលចៅក្រមស៊ើបសួរដោះលែងឲ្យទៅផ្ទះវិញ គាត់រត់ចេញយ៉ាងលឿន ឡើងរថយន្តឡិចស៊ីសពណ៌ខ្មៅ ដែលបញ្ឆេះរង់ចាំនៅខាងក្រៅរបង ជាហេតុធ្វើឲ្យមានការភ្ញាក់ផ្អើល ដល់ក្រុមគ្រួសារ ជនសង្ស័យផ្សេងទៀតដែលទៅសួរសុខទុកបងប្អូនកូនចៅគេ រហូតខ្លះរបូតមាត់ថា ជនសង្ស័យរត់ តែទីបំផុតស្រី្តមេតុងទីននោះរត់ ព្រោះតែខ្លាចម៉ាស៊ីនថតអ្នកកាសែត។
ស្ត្រីមេតុងទីនមានឈ្មោះ លី គឹមហួរ អាយុ៣៣ឆ្នាំ មានទីលំនៅផ្ទះលេខ៣៧ Ceo E1 ផ្លូវវលេខ៣៥៨ ភូមិ៤ សង្កាត់ទួលស្វាយព្រៃ១ ខណ្ឌចម្ការមន រាជធានីភ្នំពេញ។ ស្ត្រីឈ្មោះ លី គឹមហួរ ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញចាប់ខ្លួន តាមដីកាបញ្ជាឲ្យចូលខ្លួនរបស់លោក ហ៊ីង ប៊ុនថន ព្រះរាជអាជ្ញារង នៃអយ្យការសាលាដំបូងរាជធានីភ្នំពេញ។ ក្រោយពីបានសាកសួររួចរាល់ លោក ហ៊ីង ប៊ុនថន បានសម្រេចចោទប្រកាន់ស្ត្រីមេតុងទីនពីបទ រំលោភលើទំនុកចិត្ត តាមមាត្រា៣៩១ មាត្រា៣៩២ នៃ ក្រមព្រហ្មទណ្ឌ និងបានចាត់បញ្ជូនទៅលោក កូយ សៅ ចៅក្រមស៊ើបសួរសាលាដំបូង ដោយបានស្នើសុំឲ្យដាក់ស្ថិតក្រោមការត្រួតពិនិត្យតាមផ្លូវតុលាការ និង ស្នើឲ្យចៅក្រមចេញដីកា ឃុំខ្លួនដាក់ពន្ធនាគារជាបណ្ដោះអាសន្ន។
អ្នកច្បាប់ម្នាក់បានលើកឡើងថា ការសម្រេចមិនឃុំខ្លួន ស្ត្រីមេតុងទីន ពីសំណាក់លោកចៅក្រមស៊ើបសួរនោះ ពិតជាមានមូលហេតុ និងមូលដ្ឋានច្បាប់គ្រប់គ្រាន់ ឬ អាចនិយាយបានថា ប្រហែលជាមានប្រាក់ដាក់តម្កល់ ឬមានមេធាវីធានាខ្លួន បើមិនដូច្នោះចៅក្រមមិន អាចដោះលែងស្រួលៗទេ ពាក់ព័ន្ធបណ្តឹងលើទឹកប្រាក់២លាន៦សែនដុល្លារអាមេរិកឯណោះ។ ទោះជាយ៉ាងនេះក្តីនៅសាលា ដំបូងរាជធានីភ្នំពេញ ត្រូវបានគេដឹងថា ដើមបណ្តឹងចំនួន១៧រូប កើតទុក្ខមិនសុខចិត្ត ចំពោះចៅក្រមស៊ើបសួរដោះលែងស្ត្រីមេតុងទីនខាងលើនេះទេ ព្រោះពួកគេយល់ឃើញថា ដើមបណ្តឹងមិនទាន់បានទទួលនូវអ្វីហៅថា មានការស្រុះស្រួលគ្នានៅឡើយ ដែលនេះជាការធ្វើឲ្យប៉ះពាល់ដល់ផលប្រយោជន៍ពួកគេធ្ងន់ធ្ងណាស់។ ពេលនេះតុលាការបានដោះលែងមេតុងទីនឈ្មោះ លី គឹមហួរ ប៉ុន្តែតំណាងអយ្យការ នៅបានចេញដីកាបញ្ជាឲ្យចូលខ្លួនទៅលើស្ត្រីឈ្មោះ តាំង គឹមហួង ដែលជាម្តាយរបស់ឈ្មោះ លី គឹមហួរ ម្នាក់ទៀត៕
ចែករំលែកព័តមាននេះ