ខេត្តកំពង់ចាម ៖ រថយន្តម៉ាកកាមរីពណ៌ស១គ្រឿង គ្មានស្លាកលេខ ដឹកឈើគ្រញូងចេញពីខេត្តកំពង់ធំ កាត់តាមស្រុកចំការលើ ឡើងផ្លូវជាតិលេខ៧១ យកទៅលក់នៅព្រំដែនវៀតណាម ត្រូវកម្លាំងរដ្ឋបាលព្រៃឈើបង្ក្រាបកាលពីវេលាម៉ោង៩និង២០នាទីយប់ ថ្ងៃទី១ មីនា នៅត្រង់ចំណុចឃុំខែលជ័យ ស្រុកកំពង់សៀម ហើយបញ្ជូនទៅកាន់ខណ្ឌរដ្ឋបាលព្រៃឈើកំពង់ចាម ដើម្បីចាត់ការតាមច្បាប់។
តាមមន្ត្រីរដ្ឋបាលព្រៃឈើកំពង់សៀមបានរៀបរាប់ប្រាប់កោះសន្តិភាពឱ្យដឹងថា ដោយទទួលបានព័ត៌មានថា មានរថយន្តប្រភេទកាមរីតូចៗដឹកឈើគ្រញូងចេញមកពីខេត្តកំពង់ធំនោះ កម្លាំងរដ្ឋបាលព្រៃឈើបានត្រៀមលក្ខណៈគ្រប់គ្រាន់ដើម្បីរង់ចាំស្ទាក់ចាប់។
មន្ត្រីរដ្ឋបាលព្រៃឈើបន្តថា នៅវេលាម៉ោង៩និង២០នាទីយប់ ពេលរថយន្តកាមរីពណ៌ស១គ្រឿងដឹកឈើគ្រញូងមកដល់ត្រង់ចំណុចវត្តរលួស ត្រូវកម្លាំងរដ្ឋបាលព្រៃឈើបើករថយន្តដេញតាមពីក្រោយយ៉ាងប្រកៀកប្រកិត។ ពេលបើកទៅដល់ម្តុំត្រើង ចៃដន្យមានរថយន្តកាម៉ាស់១គ្រឿងនៅខាងមុខ មិនអាចឱ្យរថយន្តនេះបើករុលបន្តដំណើរទៅមុខទៀតបាន។ ភ្លាមៗនោះរថយន្តរបស់រដ្ឋបាលព្រៃឈើបើកពាំងកៀបជាប់ទើបបង្ក្រាបបានតែម្តង។ សមត្ថកិច្ចឃាត់បានអ្នកបើកបរម្នាក់ឈ្មោះសុខ ម៉េង ភេទប្រុស អាយុ២១ឆ្នាំ រស់នៅភូមិរកាលើ សង្កាត់សំបួរមាស ក្រុងកំពង់ចាម បានឆ្លើយថា ឈើទាំងនេះដឹកចេញមកពីខេត្តកំពង់ធំ ក្នុងបំណងយកទៅលក់នៅព្រំដែនប្រទេសវៀតណាម។
មន្ត្រីរដ្ឋបាលព្រៃឈើបញ្ជាក់ថា ឈើគ្រញូង១រថយន្តកាមរីពណ៌សដែលបង្ក្រាបបាននេះ ត្រូវបាននាំទៅកាន់ខណ្ឌរដ្ឋបាលព្រៃឈើកំពង់ចាមទាំងយប់ ហើយជញ្ជូនយកចេញតែមិនទាន់បានដឹងចំនួនប៉ុន្មានទេ ព្រោះវាតូចៗពិបាកវាស់។ នៅព្រឹកថ្ងៃទី២ មីនា ម្ចាស់ឈើចូលខ្លួនដើម្បីទទួលការផាកពិន័យទៅតាមច្បាប់។ សមត្ថកិច្ចប្រាប់ថា ជារឿយៗនៅពេលយប់គេតែងតែឃើញមានរថយន្តកាមរីគូទហើម ដឹកឈើគ្រញូងពី៣ទៅ៤គ្រឿងបើកឆ្លងកាត់ស្ពានគីហ្ស៊ុណា ជាឈើគ្រញូងមកពីខេត្តកំពង់ធំ យកទៅដាក់នៅផ្ទះរបស់ឈ្មួញម្នាក់នៅស្រុកពញាក្រែក។ ពេលប្រមូលទិញបានច្រើនហើយទើបដឹកចេញទៅកាន់ប្រទេសវៀតណាម។
មន្ត្រីរដ្ឋបាលព្រៃឈើខ្សឹបប្រាប់ថា រថយន្តកាមរីដែលបានដឹកឈើគ្រញូងចេញមកពីខេត្តកំពង់ធំនោះ អ្នកបើកបរភាគច្រើនតែងតែប្រើប្រាស់គ្រឿងញៀន ដើម្បីឱ្យក្លាហានហ៊ានដឹក និងមិនងងុយដេកនៅពេលយប់។ ដូច្នេះការដេញបង្ក្រាបជារឿងមួយពិបាកណាស់ ដែលអាចបណ្តាលឱ្យរងគ្រោះថ្នាក់ដល់មន្ត្រីជំនាញ និងអ្នកដទៃទៀត។ មានដំណឹងថា នៅមានរថយន្តកាមរីគូទហើមប្រមាណ៥គ្រឿងទៀតកំពុងត្រៀមដឹកឈើគ្រញូងចេញពីខេត្តកំពង់ធំ ឆ្ពោះមកស្រុកពញាក្រែក ដែលគេសង្ស័យថា កំពុងរត់ការ។ ឈើគ្រញូងត្រូវខ្នាតត្រូវគេនិយាយថា លក់នៅស្រុកយួនបានថ្លៃជាង១ម៉ឺនដុល្លារ ក្នុង១ម៉ែត្រគូប។ បើបានទៅដល់ប្រទេសចិនបានតម្លៃជាង២ម៉ឺនដុល្លារ៕
ចែករំលែកព័តមាននេះ