រាជធានីភ្នំពេញ ៖ ស្របពេលលំនៅឋាននៅក្នុងរាជធានីភ្នំពេញ បានកើនឡើងដល់ជិត១ម៉ឺនខ្នងក្នុង១ឆ្នាំ រាជរដ្ឋាភិបាលបានជំរុញឲ្យវិនិយោគិនក្នុងស្រុកបណ្ដាក់ទុនវិនិយោគបន្ថែមលើប្រភេទលំនៅឋានតម្លៃសមរម្យសម្រាប់អ្នកមានចំណូលទាប និងមធ្យម ខណៈបច្ចុប្បន្ន មានគម្រោងតែ២-៣ប៉ុណ្ណោះ ដែលកំពុងអភិវឌ្ឍន៍គម្រោងលំនៅឋានតម្លៃសមរម្យសម្រាប់ប្រជាពលរដ្ឋ ជាពិសេស នៅរាជធានីភ្នំពេញ ។ នៅក្នុងកិច្ចប្រជុំមួយរបស់ក្រសួងសេដ្ឋកិច្ចនិងហិរញ្ញវត្ថុកាលពីពេលថ្មីៗនេះ លោក រស់ សីលវ៉ា អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា រាជរដ្ឋាភិបាលបានចាប់ផ្ដើមគិតគូរពីគោលនយោបាយលំនៅឋានសម្រាប់អ្នកមានចំណូលទាប និងមធ្យម រយៈពេលប្រមាណ២-៣ឆ្នាំមកហើយ និងបានស្វាគមន៍ដល់បណ្ដាវិនិយោគិននានា ដើម្បីអភិវឌ្ឍន៍លំនៅឋានតម្លៃសមរម្យសម្រាប់ប្រជាពលរដ្ឋ ដែលកំពុងស្វែងរកលំនៅឋានស្នាក់នៅ ។
លោកបន្តថា ក្រសួងសេដ្ឋកិច្ច និងហិរញ្ញវត្ថុ ដែលជាស្ថាប័នរបស់រាជរដ្ឋាភិបាលមួយផងដែរនោះ នឹងអនុវត្តនូវគម្រោងមួយទៀតពាក់ព័ន្ធនឹងគោលនយោបាយលំនៅឋាននេះ ដោយនឹងប្រកាសឲ្យវិនិយោគិនក្នុងស្រុកដែលមានទុន វិនិយោគលំនៅឋានតម្លៃសមរម្យ គឺតម្លៃចន្លោះពី១ម៉ឺន៥ពាន់ដុល្លារ ដល់៣ម៉ឺនដុល្លារអាមេរិកសម្រាប់ប្រជាពលរដ្ឋដែលមានប្រាក់ចំណូល ចាប់ពី២០០ដុល្លារ ទៅ៤០០ដុល្លារអាមេរិកក្នុង១ខែ ជាពិសេស សម្រួលដល់មន្ត្រីរាជការបម្រើការនៅតាមក្រសួងស្ថាប័ននានា ។ លោកបន្តថា ៖« ការដាក់ចេញនូវគោលនយោបាយនេះ គឺសំដៅរួមចំណែកទ្រទ្រង់ដល់សកម្មភាពនៃវិស័យសំណង់ និងអចលនទ្រព្យ ដែលជាចន្ទល់កំណើនសេដ្ឋកិច្ច ព្រមទាំងក្លាយជាផ្នែកមួយនៃប្រព័ន្ធសន្ដិសុខសង្គម និងជាឧបករណ៍គោលនយោបាយសម្រាប់គាំទ្រការអនុវត្ដយុទ្ធសាស្ដ្រអភិវឌ្ឍន៍ប្រទេសរយៈពេលវែង » ។បើតាមលោក នួន រឹទ្ធី អគ្គនាយកក្រុមហ៊ុន Khmer Founder Appraisal បានឲ្យដឹងថា វាជារឿងល្អសម្រាប់រាជរដ្ឋាភិបាលគិតគូរដល់ប្រជាពលរដ្ឋពីបញ្ហាលំនៅឋាន ហើយការអភិវឌ្ឍលំនៅឋានតម្លៃសមរម្យ គឺត្រូវតែមានបន្តទៀត ព្រោះបើមានតែក្រុមហ៊ុន១ឬ២អភិវឌ្ឍន៍ និងមានផ្ទះត្រឹមតែ២.០០០ឬ៣.០០០ខ្នងនោះ ប្រាកដជាមិនគ្រប់គ្រាន់ទៅនឹងកំណើនតម្រូវការរបស់ពលរដ្ឋទេ ។ រីឯលោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន WorldBridge ដែលជាវិនិយោគិនដំបូងបានគិតគូរអភិវឌ្ឍន៍លំនៅឋានតម្លៃសមរម្យដល់ពលរដ្ឋដែលមានប្រាក់ចំណូលទាប និងមធ្យម ក៏ដូចជាមន្ត្រីរាជការបានមានប្រសាសន៍ថា លោកស្វាគមន៍ចំពោះវត្តមានវិនិយោគិនផ្សេងទៀតក្នុងការបណ្ដាក់ទុនវិនិយោគលើលំនៅឋានតម្លៃសមរម្យ ។ លោកនិយាយថា ៖« តម្រូវការផ្ទះមានរហូតដល់ជិត១ម៉ឺនខ្នងក្នុង១ឆ្នាំ ហើយផ្ទះដែលក្រុមហ៊ុនយើងកំពុងអភិវឌ្ឍន៍មានតែជាង២ពាន់ខ្នង ។ ដូចនេះនៅខ្វះខាតច្រើនណាស់សម្រាប់បំពេញតម្រូវការដែលកំពុងតែកើនឡើងនៅពេលបច្ចុប្បន្ននេះ» ។
លោក ហ៊ុយ វណ្ណា អគ្គលេខាធិការសមាគមអ្នកអភិវឌ្ឍន៍លំនៅឋានកម្ពុជា បានមានប្រសាសន៍តាមទូរស័ព្ទថា បច្ចុប្បន្ន អ្នកអភិវឌ្ឍន៍លំនៅឋានតម្លៃសមរម្យនៅកម្ពុជាមានតិចតួចប៉ុណ្ណោះ ដោយភាគច្រើនពួកគាត់នៅតែអភិវឌ្ឍន៍លំនៅឋានកម្រិតមធ្យមឡើងដដែល។ លោកថា ៖« ពួកយើងនៅតែមើលឃើញថា តម្រូវការលំនៅឋានកម្រិតមធ្យមឡើងនៅក្នុងប្រទេសកម្ពុជានៅតែមានច្រើន ព្រោះយើងសង្កេតឃើញថា ប្រាក់ចំណូលរបស់ប្រជាពលរដ្ឋយើង ក៏មានខ្ពស់ដែរនាពេលបច្ចុប្បន្ននេះ ហើយពួកគាត់អាចទិញផ្ទះនោះដោយបង់រំលស់ប្រចាំខែ » ។ លោកបន្តថា សមាជិករបស់សមាគមអ្នកអភិវឌ្ឍន៍លំនៅឋានកម្ពុជា ក៏ចង់ងាកមកសាងសង់លំនៅឋានតម្លៃសមរម្យនេះដែរ ដើម្បីផ្គត់ផ្គង់ទៅប្រជាពលរដ្ឋមានប្រាក់ចំណូលទាប និងមធ្យម ក៏ដូចជាចូលរួមជាមួយរាជរដ្ឋាភិបាល ក៏ប៉ុន្តែអ្វីជាបញ្ហាប្រឈមនោះ គឺត្រង់តម្លៃដីឡើងថ្លៃ ដូចនេះ មិនអាចធ្វើឲ្យអ្នកអភិវឌ្ឍន៍ចំណេញ ឬរួចខ្លួនទេ ។ លោកថា ៖«ពួកយើងនឹងងាកមកសង់លំនៅឋាននេះផ្គត់ផ្គង់តាមអ្វីដែលរដ្ឋាភិបាលចង់បាន ក៏ប៉ុន្តែពួកយើងសូមស្នើទៅរដ្ឋាភិបាលឲ្យជួយសម្រួលនូវការចំណាយនានាដល់ពួកយើងដូចជា ការចំណាយផ្លូវច្បាប់ និងពន្ធផ្សេងៗ ជាដើម ដើម្បីឲ្យការចំណាយថ្លៃដើមរបស់ពួកយើងនៅសល់ទាបដែរ » ។
ប្រធានអង្គភាព ភាពជាដៃគូរវាងរដ្ឋ និងឯកជនថ្នាក់កណ្តាលនៃក្រសួងសេដ្ឋកិច្ច និងហិរញ្ញវត្ថុ លោក សំ វង្សី បានមានប្រសាសន៍ក្នុងសិក្ខាសាលាផ្សព្វផ្សាយ ស្តីពីការដាក់សំណើគម្រោងអភិវឌ្ឍន៍លំនៅឋានតម្លៃសមរម្យ នៅថ្ងៃទី២០ មិថុនា ថា ដើម្បីជៀសវាងការរៀបចំឯកសារគម្រោងមិនត្រឹមត្រូវ និងជៀសវាងការខាតពេលវេលានៅក្នុងដំណាក់កាលនៃការរៀបចំឯកសារ គឺត្រូវបង្ហាញសមត្ថភាពអ្នកសំណើគម្រោង មានលក្ខណៈគ្រប់គ្រាន់ដើម្បីអភិវឌ្ឍន៍ រួមមាន ឯកសារទស្សនទាន បញ្ជីគម្រោងសក្តានុពល គម្រោងលម្អិតលើផ្នែកបច្ចេកទេស និងព័ត៌មានលម្អិតអំពីគម្រោង មុននឹងចាប់ផ្តើមសាងសង់ឡើង ។ លោកបន្តថា ៖« ក្រុមហ៊ុនអភិវឌ្ឍន៍គម្រោងត្រូវតែជានីតិបុគ្គលដែលបានចុះបញ្ជីនៅកម្ពុជា និងត្រូវអនុញ្ញាតសាងសង់លំនៅឋានយ៉ាងតិច១០០ឯកតាឡើង ត្រូវមានទីធ្លា និងបរិស្ថានល្អត្រឹមត្រូវ មានទីផ្សារ ឬមជ្ឈមណ្ឌលផ្សេងៗ»។ លោកបន្ថែមថា ៖« គម្រោងអភិវឌ្ឍន៍លំនៅឋានតម្លៃសមរម្យ ដែលមានលំនៅឋានចាប់ពី១០០ឯកតា ត្រូវមានទីតាំងចម្ងាយ២០គីឡូម៉ែត្រពីរាជធានី-ក្រុង និងត្រូវលក់ក្នុងតម្លៃចន្លោះពី១,៥ម៉ឺនដុល្លារទៅដល់៣ម៉ឺនដុល្លារអាមេរិក » ។
លោក អ៊ុង លុយណា អនុប្រធានប្រចាំការនៃក្រុមការងារបច្ចេកទេស ក្រសួងសេដ្ឋកិច្ច និងហិរញ្ញវត្ថុ បានឲ្យដឹងផងដែរថា គម្រោងអភិវឌ្ឍន៍លំនៅឋានតម្លៃសមរម្យ រាជរដ្ឋាភិបាលចង់ឲ្យប្រជាពលរដ្ឋ ដែលពុំទាន់មានផ្ទះសម្បែងមានលំនៅឋានមួយរស់នៅសមរម្យ គឺការជំរុញបត់បែនទៅតាមជំហានរីកចម្រើន ក៏ដូចជាការកាត់បន្ថយសេវាសាធារណៈឲ្យកាន់តែប្រសើរ ការកាត់បន្ថយអសន្តិសុខ និងការពង្រីកវប្បធម៌ សាមគ្គីធម៌ឲ្យកាន់តែទូលាយផងដែរ ។ គួរបញ្ជាក់ថា គោលនយោបាយលំនៅឋានតម្លៃសមរម្យរបស់រាជរដ្ឋាភិបាលនេះ ក្រសួងសេដ្ឋកិច្ចបានប្រកាសថា សូមឲ្យអភិវឌ្ឍន៍នៅតំបន់ជាយក្រុង ដែលអាចមានចម្ងាយពីចំណុចកណ្ដាលរាជធានី ចាប់ពី២០គីឡូម៉ែត្រឡើងទៅ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ