រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បានហៅការធ្វើបាតុកម្មនៅក្រៅប្រទេសរបស់បងប្អូនជនជាតិខ្មែរនោះជាសិទ្ធិដែលខ្លួនចង់បាន ប៉ុន្តែធ្វើនេះនឹងត្រូវរងការបង្ក្រាបពីរាជរដ្ឋាភិបាលប្រទេសគេមិនខាន ។ ការលើកឡើងរបស់អ្នកនាំពាក្យបក្សកាន់អំណាចនេះស្របពេលដែលក្រុមបាតុករដែលគាំទ្រអតីតប្រឆាំងបានលើកគ្នាធ្វើបាតុកម្មនៅទីក្រុងសេអូលប្រទេសកូរ៉េ ដើម្បីទាមទារឲ្យរដ្ឋាភិបាលកម្ពុជាដោះលែងលោកកឹម សុខា អតីតប្រធានគណបក្សសង្គ្រោះជាតិ និងចង់ឲ្យអតីតគណបក្សសង្គ្រោះជាតិចូលរួមបោះឆ្នោត ។
លោក សុខ ឥសានបានឲ្យដឹងនៅថ្ងៃទី២៤ មិថុនានេះបញ្ជាក់យ៉ាងដូច្នេះថា «ដេកចាំទៅ អស់លោកធ្វើបាតុកម្ម ។ ការធ្វើបាតុកម្ម គឺជាសិទ្ធិរបស់បុគ្គលម្នាក់ៗធ្វើនៅក្នុងក្របខណ្ឌ ដែលអាចអនុញ្ញាតបាន ដើម្បីសម្រួលដល់ជីភាពរបស់ប្រជាជនកម្ពុជាដែលរាជរដ្ឋាភិបាលបានយកចិត្តទុកដាក់ជាប់ជានិច្ច ។ ក៏ប៉ុន្តែការប្រើសិទ្ធិដែលត្រូវប្រើមិនត្រូវធ្វើអ្វីហួសព្រំដែនកំណត់នោះឡើយ ។ លោកបញ្ជាក់ថា«តែទោះយ៉ាងណាក្តីការធ្វើបាតុកម្មមិនអាចតម្រូវចិត្តខ្លួនឡើយ បើនៅតែតែរឹងទទឹងនឹងត្រូវទទួលរងការបង្ក្រាបជាមិនខាន ហើយបើនៅកម្ពុជារាជរដ្ឋាភិបាលកម្ពុជានឹងមិនបណ្តែតបណ្តោយឲ្យធ្វើអ្វីតាមអំពើចិត្តដែលនាំឲ្យប៉ះពាល់ដល់សិទ្ធិរបស់អ្នកដទៃ និងបំពានលើច្បាប់ជាដាច់ខាត ។ ដូច្នេះអ្នកធ្វើបាតុកម្មត្រូវយល់ពីច្បាប់ និងអនុវត្តតាមច្បាប់» ។
ជាមួយគ្នានោះដែរ លោកសុខ ឥសានក៏បានលើកពីអង្កការ The National Council if Churchesផងដែរ ។ លោកថា អង្គការនេះគឺជាអង្គការដ៏តូចល្អិតមួយនៅប្រទេសកូរ៉េខាងត្បូងសឹងតែគេមិនស្គាល់ផង ។ ជាក់ស្តែងលោកកឹម សុខា ធ្វើសកម្មភាពនយោបាយមិនមែនតាមវប្បធម៌អហិង្សាមិនយកខ្មែរណាជាខ្មាំងសត្រូវនោះទេ តែរាល់សកម្មភាពរបស់គាត់បានបង្កប់នូវចរិតពិសពុលខ្លាំងក្លាណាស់ ដែលបានលក់ក្បាលឲ្យបរទេស ប៉ុនប៉ងផ្តួលរំលំរាជរដ្ឋាភិបាលកម្ពុជាស្របច្បាប់នាំមកនូវគ្រោះមហន្តរាយដូចពីអតីតកាល មកដាក់ឲ្យកម្ពុជាជាថ្មីឡើងវិញដូច ដែលសាមយីជនបានលាតត្រដាងច្បាស់ៗហើយ អ្នកណាក៏បានដឹង និងយល់ដែរមិនអាចបន្លំបានជាដាច់ខាត ។ ដូច្នេះការផ្តល់ពានរង្វាន់សិទ្ធិមនុស្ស និងសន្តិភាពនេះ គឺមិនស្របតាមសំណូមពរពិត និងការជាក់ស្តែងនៃស្នាដៃរបស់សាម៉ីខ្លួនឡើយ ។
សូមជម្រាបថា ការលើកឡើងរបស់លោកសុខ ឥសាននេះស្របពេលដែលអ្នកគាំទ្រអតីតបក្សប្រឆាំងបានកំពុងធ្វើនៅក្នុងទីក្រុងសេអ៊ូលប្រទេសកូរ៉េខាងត្បូង ។ អ្នកទាំងនោះភាគីច្រើន គឺជាពលករខ្មែរដែលទៅធ្វើការនៅក្នុងប្រទេសកូរ៉េ ។ បាតុកម្មនេះត្រូវធ្វើឡើងការកៀរគររបស់ក្រុមប្រឆាំងដែលកំពុងតែធ្វើ ស្វែងរកអន្តរាគមន៍ពីបណ្តាប្រទេសនានា ដើម្បីដាក់គំនាបមកលើករាជរដ្ឋាភិបាលកម្ពុជាផងដែរ ។
យ៉ាងណាក្តីការទទួលពានរង្វាន់នេះត្រូវបានលោកយ៉ែម បុញ្ញាឬទ្ធិ អតីតអ្នកនាំពាក្យ គណបក្សសង្គ្រោះជាតិបានលើកឡើងថា បានមកពីការលះបង់ពិត មិនគិតប្រយោជន៍សួនតួ និងការប្តេជ្ញាចិត្តពិតដ៏មោះមុត សុចរិត ស្មោះត្រង់ មិនបោះបង់នឹងប្រជាជាតិខ្មែរ មាតាកម្ពុជារបស់លោក កឹម សុខា និងលោកស្រីមួរ សុខហួរ ប្រធាន និងអនុប្រធានគណបក្សសង្គ្រោះជាតិ ដើម្បីបុព្វហេតុជាតិ សិទ្ធិមនុស្ស សេរីភាព លទ្ធិប្រជាធិបតេយ្យតាមគោលការណ៍ផ្សះផ្សាជាតិអហិង្សាសន្តិវិធី ខ្មែរតែមួយ មិនយកខ្មែរណាជាសត្រូវ មិនគុំកួនសងសឹក។
លោកបន្តថាការលះបង់ពិតគិតជាតិ យើងសង្ឃឹមជឿជាក់ថា លោក កឹម សុខា ប្រធានគណបក្សសង្គ្រោះជាតិ នឹងទទួលបាន យុត្តិធម៌ សេរីភាព បន្តបេសកកម្មជាតិ ដើម្បីជាប្រយោជន៍ដល់ជាតិមាតុភូមិកម្ពុជា៕
ចែករំលែកព័តមាននេះ