រាជធានីភ្នំពេញ ៖ មានករណីមួយបានកើតឡើងនៅវេលាម៉ោង៥និង០០នាទីព្រឹកថ្ងៃទី២៤ ខែមិថុនា ឆ្នាំ២០១៨ ដែលជាហេតុការណ៍គ្រោះអគ្គិភ័យឆាបឆេះផ្ទះបងប្អូនប្រជាពលរដ្ឋយ៉ាងសន្ធោសន្ធៅ ដោយមានជាអណ្តាតភ្លើងខ្លាំងលាយលំជាមួយផ្សែងខ្មួរខ្មាញ់ហ៊ុយឡើងទៅលើវេហា បង្កការភ្ញាក់ផ្អើលជាខ្លាំង នៅចំណុចតាមបណ្តោយផ្លូវប៉េតុង ក្នុងភូមិក្បាលទំនប់ទី៣ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ។ លំនៅឋានដែលត្រូវអគ្គិភ័យឆាបឆេះសុទ្ធសឹងជាលំនៅឋានសង់ឡើងពីឈើប្រក់សង្ក័សី ទំហំចន្លោះពី៥ម៉ែត្រគុណ៨ម៉ែត្រ និងជាប្រភេទសំណង់សង់ជាប់គ្នាយ៉ាងរដឹកតែម្តង ។ ប្រភពព័ត៌មានពីប្រជាពលរដ្ឋក្បែរតំបន់កើតហេតុបានឲ្យដឹងថា មុនកើតហេតុគេលឺសូរសម្លេងផ្ទុះចេញពីតំបន់នោះលុះមិនបានប៉ុន្មាននាទីផង ស្រាប់តែមានជាអណ្តាតភ្លើងឆាបឆេះឡើងបង្កឲ្យប្រជាពលរដ្ឋក្បែរនោះភ័យស្លន់ស្លោស្រវេស្រវារត់ជាន់ជើងគ្នាប្រសាច ដោយអ្នកខ្លះព្យាយាមយកទឹកជះទប់ស្កាត់អណ្តាតភ្លើង និងអ្នកខ្លះព្យយាមប្រមែប្រមូលអីវ៉ាន់ចេញពីផ្ទះ។ ដោយមើលឃើញនូវអណ្តាតភ្លើងកាន់តែឆាបឆេះរាលដាលខ្លាំងឡើងៗទៅប្រជាពលរដ្ឋបានរាយការណ៍ទៅកាន់អាជ្ញាធរមូលដ្ឋានឲ្យចុះអន្តរាគមន៍ ។ ភ្លាមនោះអាជ្ញាធរមូលដ្ឋានរួមទាំងរថយន្តពន្លត់អគ្គិភ័យជាច្រើនគ្រឿងបានចុះមកដល់កន្លែងកើតហេតុ និងទាយទុយោធ្វើការអន្តរាគមន៍បាញ់ទឹកទប់ស្កាត់អណ្តាតភ្លើងកុំឲ្យឆាបឆេះរាលដាលខ្លាំង ។ ប៉ុន្តែបើទោះជាមានការខិតខំប្រឹងប្រែងពីកម្លាំងអជ្ញាធរ និងមន្ត្រីជំនាញអគ្គិភ័យខ្លាំងប៉ុណ្ណាក៏ដោយក៏អគ្គិភ័យដ៏កាចសាហាវមួយនេះ បានឡេបត្របាក់លំនៅឋានបងប្អូនពលរដ្ឋអស់ជាច្រើនខ្នងជាបន្តបន្ទាប់ទៅហើយដែរ ។
នាយការិយាល័យបង្ការ និងពន្លត់គ្រោះមហន្តរាយអគ្គិភ័យនៃស្នងការដ្ឋាននគរបាលរាជធានីភ្នំពេញលោកវរសេនីយ៍ឯកព្រហ្ម យ៉ន បានឲ្យដឹងថា ក្នុងការឆាបឆេះខាងលើនេះកម្លាំងជំនាញអគ្គិភ័យ គឺមានការលំបាកខ្លាំងបំផុតក្នុងការអន្តរាគមន៍បាញ់ទឹកពន្លត់ព្រោះស្ថានភាពច្រកផ្លូវនៅទីនោះមានលក្ខណះតូចចង្អៀត ទាំងផ្លូវក្រៅ និងផ្លូវក្នុងមិនអាចឲ្យរថយន្តពន្លត់អគ្គិភ័យចូលទៅបាញ់ទឹកបានទាន់ពេល ទម្រាំតែកម្លាំងជំនាញតទុយោចូលទៅដល់ទីតាំងកើតហេតុ គឺអណ្តាតភ្លើងបានឆាបឆេះខ្លាំងខ្លាបាត់ទៅហើយ ។
លោកប្រធានការិយាល័យបន្តថា បើទោះបីជាមានការឆាបឆេះខ្លាំងខ្លាយ៉ាងណាក៏កម្លាំងជំនាញដោយមានការសហការល្អពីអាជ្ញាធរមូលដ្ឋានបានព្យាយាមបាញ់ទឹកពន្លត់អណ្តាតភ្លើងឲ្យរលត់សូន្យសុងទៅវិញ១០០ភាគរយផងដែរ ដោយប្រើប្រាស់ពេលវេលា១ម៉ោង ដោយប្រើប្រាស់រថយន្តពន្លត់អគ្គិភ័យអស់២៧គ្រឿង ក្នុងនោះ៥គ្រឿងមកពីអាវុធហត្ថរាជធានីភ្នំពេញ និង២២គ្រឿងទៀតមកពីស្នងការដ្ឋាននគរបាលរាជធានីភ្នំពេញ ។ អភិបាលរងខណ្ឌមានជ័យលោកឌី រ័ត្នខេមរុណ បានឲ្យដឹងថា ក្នុងការឆាបឆេះខាងលើនេះ គឺបានបំផ្លិចបំផ្លាញលំនៅឋានបងប្អូនប្រជាពលរដ្ឋចំនួន២២ខ្នងផ្ទះស្មើរនឹង៣១គ្រួសារ រួមជាមួយទ្រព្យសម្បត្តិបងប្អូនមួយចំនួនធំ ។ ប៉ុន្តែក្នុងហេតុការណ៍ដដែលនេះពុំមានបណ្តាលឲ្យមនុស្សណាម្នាក់រងរបួស ឬគ្រោះថ្នាក់ដល់អាយុជីវិតនោះឡើយ ។ ចំពោះមូលហេតុនៃការឆាបឆេះសមត្ថកិច្ចជំនាញពុំទាន់អាចបញ្ជាក់បាននៅឡើយនោះទេ រងចាំធ្វើកោសល្យវិច្ច័យនៅពេលក្រោយ ៕
ចែករំលែកព័តមាននេះ