ខេត្តស្វាយរៀង ៖ យុវជនម្នាក់ជានិសិត្សឆ្នាំទី១ ផ្នែកព័ត៌មានវិទ្យា (IT) ត្រូវបានកម្លាំងកងរាជអាវុធហត្ថខេត្តស្វាយរៀងសហការជាមួយស្នងការយុត្តិធម៌កងរាជអាវុធហត្ថលើផ្ទៃប្រទេស និងកម្លាំងបញ្ជាការដ្ឋានកងរាជអាវុធហត្ថរាជធានីភ្នំពេញធ្វើការឃាត់ខ្លួនករណីឆបោកតាមប្រព័ន្ធសង្គមហ្វេសប៊ុក កាលពីវេលាម៉ោង១១និង៣០នាទី ថ្ងៃទី២១ ខែមិថុនា ឆ្នាំ២០១៨ នេះនៅត្រង់ចំណុចភូមិគោកល្វៀង សង្កាត់ព្រៃអង្គុញ ក្រុងបាវិត ខេត្តស្វាយរៀង ។
បើតាមលោកវរសេនីយ៍ឯក ស្រី វុត្ថា មេបញ្ជាការរងកងរាជអាវុធហត្ថខេត្តស្វាយរៀងឲ្យដឹងថា ក្រោមការបញ្ជាយ៉ាងម៉ឺងម៉ាត់របស់ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសកម្លាំងរាជធានីភ្នំពេញសហការជាកម្លាំងកងរាជអាវុធហត្ថខេត្តស្វាយរៀង និងបញ្ជាផ្ទាល់លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀងចុះដឹកនាំកម្លាំងដោយលោកវរសេនីយ៍ឯក ស្រី វុត្ថា មេបញ្ជាការរងទទួលផែនយុត្តិធម៌បង្ក្រាបនិងឃាត់ខ្លួនបានយុវជនម្នាក់ឆបោកតាមប្រព័ន្ធហ្វេសប៊ុក និងដកលុយតាមវីងនៅចំណុចកើតហេតុខាងលើ ។
ប្រភពខាងលើបានបន្តឲ្យដឹងទៀតថា តាមការឆ្លើយរបស់ជនសង្ស័យមានឈ្មោះ រុន ណាលិ ភេទប្រុស អាយុ២៥ឆ្នាំ ជនជាតិខ្មែរ មុខរបរជានិសិត្សឆ្នាំទី១ ផ្នែក IT មានទីលំនៅភូមិដូនស ឃុំច្រេស ស្រុកចន្ទ្រា ខេត្តស្វាយរៀង ហើយនៅថ្ងៃដែលសមត្ថកិច្ចឃាត់ខ្លួននោះគឺខ្លួនបានមកដកលុយដែលបានមកពីការឆបោកតាមហ្វេសប៊ុក ពោលគឺលួច(Hack)អាខោនហ្វេសប៊ុកឲ្យជនរងគ្រោះផ្ញើរលុយឲ្យខ្លួន ។
ក្រោយពីឃាត់ខ្លួនសមត្ថកិច្ចយើងដកហូតបានទូរស័ព្ទមួយគ្រឿង ហើយបច្ចុប្បន្នជនសង្ស័យត្រូវបានឃាត់ខ្លួនរួម និងវត្ថុតាងយកមករក្សាទុកនៅបញ្ជាការដ្ឋានកងរាជអាវុធហត្ថខេត្តស្វាយរៀងដើម្បីកសាងសំណុំរឿងបញ្ជួនបន្តទៅតុលាការដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ