ខេត្តព្រះសីហនុ ៖ តាមសេចក្តីរាយការណ៍បឋមឱ្យដឹងថា កាលពីវេលាម៉ោង៣ និង៣០នាទីយប់ឈានចូលថ្ងៃទី២២ មិថុនា កម្លាំងជំនាញស្នងការដ្ឋាននគរបាលខេត្តបានទទួលព័ត៌មានថា មានករណីជនជាតិចិន២ក្រុមបានផ្ទុះហិង្សាកាប់ចាក់គ្នានៅក្នុងក្លិបឌីស្កូហាវមិន បន្ទប់លេខ០២ ស្ថិតក្នុងក្រុមទី៨ ភូមិ៤ សង្កាត់៤ ក្រុងព្រះសីហនុ ។ ក្រោយពីទទួលបានព័ត៌មានភ្លាម លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តបានបញ្ជាទៅកម្លាំងជំនាញការិយាល័យកម្រិតធ្ងន់និងស្រាល នៃអធិការដ្ឋាននគរបាលក្រុង-ប៉ុស្តិ៍ និងកម្លាំងអន្តរាគមន៍ពិសេស បានចុះអន្តរាគមន៍ដល់កន្លែងកើតហេតុជាបន្ទាន់ ពេលនោះសមត្តកិច្ចធ្វើការឃាត់ខ្លួនជនសង្ស័យម្នាក់ និង ម្នាក់រត់គេចខ្លួន ។ នៅកន្លែងកើតហេតុ មានជនជាតិចិន២នាក់រងរបួសឈាមប្រឡាក់ពេញខ្លួន ដេកដួលនៅក្នុងក្លិបឌីស្កូនោះ ដោយរងនូវកាំបិទពីសំណាក់ភាគីម្ខាងទៀត តែត្រូវបានសមត្ថកិច្ចនាំទៅមន្ទីរពេទ្យដើម្បីសង្គ្រោះបន្ទាន់ ។
តាមចម្លើយ និងតាមការបំភ្លឺពីជនរងគ្រោះឱ្យសមត្តកិច្ចដឹងថា មូលហេតុមកពីផឹកស៊ីស្រវឹងទំនាស់ពាក្យសម្តីដណ្តើមស្រីគ្នា ទើបបណ្តាលឈានទៅដល់ការប្រើហិង្សាកាប់ចាក់គ្នាតែម្តងទៅ ។ ជនរងគ្រោះ២នាក់ម្នាក់ឈ្មោះ Jian Lu ភេទប្រុស អាយុ៣០ឆ្នាំ ជនជាតិចិន (របួសធ្ងន់) និងម្នាក់ឈ្មោះ Zhang Tian ភេទប្រុស អាយុ៣៨ឆ្នាំ (របួសស្រាល) បានបញ្ជូនទៅកាន់មន្ទីរពេទ្យរាជធានីភ្នំពេញ ។ ជនសង្ស័យម្នាក់ឈ្មោះ Huang Bing ភេទប្រុស អាយុ៣៨ឆ្នាំ និងវត្ថុតាងចាប់យកបានរួមមានដាវនិងកាំបិតចំនួន៧ដើម ។ ចំណែកម្នាក់ទៀតបានរត់គេចខ្លួនបាត់ ។ជម្លោះកាប់ចាក់គ្នារបស់ក្រុមជនជាតិចិនតែងកើតមានជាបន្តបន្ទាប់នៅទីក្រុងមាត់សមុទ្រមួយនេះ ។ កាលពី៣ថ្ងៃមុន ក្រុមជនជាតិចិន១០នាក់ ត្រូវចាប់ខ្លួន និង២នាក់រងរបួសធ្ងន់ ដោយរងការវាយធ្វើបាបនិងធ្វើទារុណកម្ម រហូតដល់សន្លប់ហើយលើកដាក់រថយន្តប្រុងដឹកចេញទៅក្រៅក្រុង ។ ការប្រទូស្តរ៉ាយគ្នានោះ បានកើតឡើងទាំងកណ្តាលថ្ងៃត្រង់តែម្តង ធ្វើឱ្យមានការភ្ញាក់ផ្អើលពេញដងផ្លូវ ៕
ចែករំលែកព័តមាននេះ