រាជធានីភ្នំពេញ ៖ លោក យូ ហុកគ្រី អនុប្រធានគណបក្សហ្វ៊ុនស៊ិនប៉ិចបានថ្លែងថា «សម្តេចក្រុមព្រះបានមានសភាពធូស្រាល តែមិនត្រូវបានទូលពីស្ថានភាពពិតអ្នកម្នាងបានសោយទិវង្គត់នោះទេ ។ គណបក្សនឹងបញ្ជូនមេធាវីពិនិត្យមើលឯកសារនៅតុលាការ» ។ ការលើកឡើងនេះនៅក្នុងសន្និសីទសារព័ត៌មាននៅក្នុងពិធីបុណ្យគម្រប់៧ថ្ងៃរបស់អ្នកម្នាង អ៊ុក ផល្លា រណឫទ្ធិ នាព្រឹកថ្ងៃទី២៣ ខែមិថុនា ឆ្នាំ២០១៨ ។
លោក យូ ហុកគ្រី អនុប្រធានគណបក្សហ្វ៊ុនស៊ិនប៉ិចបានលើកឡើងថា «យើងទទួលស្គាល់ការស៊ើបអង្កេតបឋមរបស់សមត្ថកិច្ច និងបន្តបញ្ជូនមេធាវីសិក្សាលើសំណុំរឿងនេះនៅតុលាការ ។ ករណីចុងក្រោយនៃរឿងនេះនៅតុលាការ ការចោទប្រកាន់ជនបង្កលុះត្រាណាមានដើមបណ្តឹង ។ លោកថា ពេលនេះសម្តេចក្រុមព្រះកំពុងសម្រាកព្យាបាលដោយគ្រូពេទ្យ ហើយទ្រង់មានអាការធូរស្រាល និងអាចយាងមកកម្ពុជាវិញនៅពេលខាងមុខនេះ» ។
ថ្លែងប្រាប់អ្នកសារព័ត៌មានលោក យូ ហុកគ្រី បានលើកឡើងថា តាមរយៈអ្នកនៅជិតសម្តេចក្រុមព្រះ នោះថាសុខភាពរបស់ទ្រង់បានស្រួលជាងមុនហើយ ។ ទ្រង់សូមអរគុណចំពោះអ្នកដែលយកចិត្តទុកដាក់ទ្រង់ទាំងអស់ ។ លោកថា ពេលដឹងខ្លួន និងមានបន្ទូលរួចនោះសម្តេចក្រុមព្រះបានសូមឲ្យពលរដ្ឋខ្មែរទាំងអស់ទៅបោះឆ្នោត និងកុំជឿតាមការញុះញង់របស់គេថា នៅផ្ទះឈ្នះឯងនោះវាមិនអាចទៅរួចទេព្រោះវាជាឱកាស៥ឆ្នាំម្តង ។ នេះជាការសំដែងឆន្ទះរបស់បងប្អូន សម្រាប់ការបោះឆ្នោតសកល ។
ឆ្លើយនឹងសំណួរអ្នកសារព័ត៌មានលោកថ្លែងប្រាប់អ្នកសារព័ត៌មានលោក យូ ហុកគ្រី បានលើកឡើងថា ខ្ញុំមិនអាចវាយតម្លៃថាការព្យាបាលនោះចំណាយប៉ុន្មានទេ តែសុខភាពទ្រង់បានធូរស្រាលច្រើន ។ ការព្យាបាលនេះក្រុមហ៊ុនធានារ៉ាបរងចំណាយច្រើន និងមានព្រះរាជព្រទានពីព្រះមហាក្សត្រ និងសម្តេចម៉ែជួយរហូតតាំងពេលគ្រោះថ្នាក់ និងដល់ពេលមន្ទីរពេទ្យថៃ ។
លោកបានលើកឡើងថា បច្ចុប្បន្នភាពរបស់គណបក្សហ្វ៊ុនស៊ិនប៉ិចនៅដំណើរការធម្មតាដឹកនាំដោយគណៈកម្មការ៤រូប និងលេខា១រូប ។ លោកថា គ្រោះថ្នាក់មិនមែនធ្វើឲ្យអ្នកគាំទ្រខកចិត្តទេ តែអាចទាញសន្តានចិត្តបងប្អូននៅមូលដ្ឋានវិញទេ ។ ពីព្រោះពលរដ្ឋអាណិតទ្រង់សម្តេចក្រុមព្រះរងគ្រោះថ្នាក់ មិនត្រឹមរងគ្រោះតែទ្រង់ទេថែមទាំងបាត់បង់អ្នកម្នាងរបស់ទ្រង់ទៀតដោយអ្នកម្នាងបានសោយទិវង្គត់ អាចទៅបំពេញចំណុចដែលមានការព្រួយបារម្ភទាំងឡាយវិញទេ ។
ចំពោះសំណុំរឿងគ្រោះថ្នាក់ចរាចរណ៍នេះវិញលោក យូ ហុកគ្រី បានបញ្ជាក់ថា គណបក្សហ្វ៊ុនស៊ិនប៉ិចមិនបានចូលរួមស៊ើបអង្កេតជាមួយអាជ្ញាធរទេ ។ លោកថា «ខ្ញុំគិតថាយើងមិនបានចូលរួមស៊ើបអង្កេតទេ ដូច្នេះយើងសង្ឃឹមទៅលើការយកចិត្តទុកដាក់របស់រដ្ឋាភិបាលជាពិសេសក្រសួងមហាផ្ទៃដែលមាននគរបាលដែលបានធ្វើការងារនេះ» ។ លោកថា «លទ្ធផលដែលទទួលបានបឋមនេះយើងត្រូវតែទទួលយ៉ាងហោចណាស់ក៏បណ្តោះអាសន្នដែរ រហូតដល់នីតីវិធីនេះត្រូវបានចាត់ការតាមផ្លូវច្បាប់ជាធរមាន» ៕
ចែករំលែកព័តមាននេះ