ខេត្តស្វាយរៀង ៖ ជនជាតិវៀតណាមម្នាក់ត្រូវបានកម្លាំងកងរាជអាវុធហត្ថខេត្តស្វាយរៀងធ្វើការឃាត់ខ្លួនពីបទ «កាន់កាប់ ឬដឹកជញ្ជួនអាវុធដោយគ្មានច្បាប់អនុញ្ញាត្ត» និងដកហូតបានកាំង AK47 មួយដើម ។ ករណីចុះបង្ក្រាបបានធ្វើឡើងកាលពីវេលាម៉ោង២និង១០នាទី ថ្ងៃទី២១ ខែមិថុនា ឆ្នាំ២០១៨ ស្ថិតត្រង់ចំណុចភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។
បើតាមមន្ត្រីកងរាជអាវុធហត្ថខេត្តស្វាយរៀងបានឲ្យដឹងថា ដោយទទួលបានព័ត៌មានរាយការណ៍ថា នៅចំណុចខាងលើមានករណីរក្សាទុកអាវុធខុសច្បាប់នោះ លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀងបានដាក់បញ្ជាយ៉ាងម៉ឺងម៉ាត់ឲ្យលោកវរសេនីយ៍ឯក ស្រី វុត្ថា មេបញ្ញាការរងទទួលផែនយុត្តិធម៌ដឹកនាំកម្លាំងចុះបង្ក្រាប និងឃាត់ខ្លួនជនសង្ស័យ និងមានការសម្របសម្រួលពីលោក គង់ ច័ន្ទខេមរិទ្ធ ព្រះរាជអាជ្ញា នៃអយក្យការអមសាលាដំបូងខេត្តស្វាយរៀងឃាត់ខ្លួនបានជនសង្ស័យម្នាក់ជាជនជាតិវៀតណាម ដែលមានឈ្មោះ ទ្រឿង មិញថុង ភេទប្រុស អាយុ២១ឆ្នាំ មុខរបរកម្មករសំណង់ មានទីលំនៅភូមិ៥ សង្កាត់តឹងហៀប ក្រុងធូយូវ ខេត្តប៊ិនយឿង ប្រទេសវៀតណាម ។
តាមការឆ្លើយរបស់ជនសង្ស័យកាំភ្លើងនេះគេទិញពីបុរសម្នាក់មិនស្គាល់ឈ្មោះនៅក្រុងបាវិត ។ វត្ថុតាងដែលសមត្ថកិច្ចដកហូតបានរួមមាន កាំភ្លើង AK47 មួយដើម, បង់ចំនួន២បង់, គ្រាប់៥៦គ្រាប់, សឺមែល១, សាងសម្រាប់ដាក់គ្រាប់១ខ្សែ, ពិល១ និងឡាស៊ែដាក់ជាប់កាំភ្លើង១ ។ បច្ចុប្បន្នជនសង្ស័យត្រូវបានសមត្ថកិច្ចកងរាជអាវុធហត្ថខេត្តស្វាយរៀងឃាត់ខ្លួនរួម និងវត្ថុតាងដើម្បីកសាងសំណុំរឿងបញ្ជួនបន្តទៅតុលាការដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ