កិច្ចសហប្រតិបត្តិការទ្វេភាគី លើវិស័យសន្តិសុខកម្ពុជា-ថៃ
- សៀមរាប
ខេត្តសៀមរាប ៖ គណៈកម្មាធិការព្រំដែនថ្នាក់ភូមិភាគកម្ពុជា-ថៃលើកទី២៦ (ហៅកាត់ថា RBC-26) ដែលភាគីកម្ពុជាចំនួន៥៧នាក់ ភាគីថៃ៦៣នាក់ មកពីស្ថាប័នកងទ័ព នគរបាល អាវុធហត្ថ…
ខេត្តសៀមរាប ៖ គណៈកម្មាធិការព្រំដែនថ្នាក់ភូមិភាគកម្ពុជា-ថៃលើកទី២៦ (ហៅកាត់ថា RBC-26) ដែលភាគីកម្ពុជាចំនួន៥៧នាក់ ភាគីថៃ៦៣នាក់ មកពីស្ថាប័នកងទ័ព នគរបាល អាវុធហត្ថ កងការពារព្រំដែន មន្ត្រីបរិស្ថាន សុខាភិបាល កសិកម្ម អប់រំ ទេសចរណ៍ ពាណិជ្ជកម្ម ខេត្តបាត់ដំបង និងបន្ទាយមានជ័យ និងខេត្តស្រះកែវ ខេត្តច័ន្ទបូរី បានជួបប្រជុំគ្នានៅក្នុងសាលប្រជុំសណ្ឋាគារ អង្គរស៊ិនជូរី នៅក្រុង-ខេត្តសៀមរាប វេលាព្រឹកថ្ងៃទី២២ ខែមិថុនា ឆ្នាំ២០១៨ ក្រោមការដឹកនាំ របស់លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ ប្រធានគណៈកម្មាធិការព្រំដែនថ្នាក់ភូមិភាគ លោកឧត្តមសេនីយ៍ទោ គូគៀត ស្រ៊ីណាខា មេបញ្ជាការ កងទ័ពភូមិភាគទី១ សហប្រធានខាងភាគីថៃ ឧត្តមសេនីយ៍ទោ ឯក សំអូន មេបញ្ជាការង នាយសេនាធិការយោធភូមិភាគទី៥ និងជាប្រធានក្រុមលេខាខាងកម្ពុជា បានបើកកិច្ចប្រជុំ ជាមួយសហប្រធានលោកឧត្តមសេនីយ៍ត្រី គ្រីតដាក់ណៃ អ៊ិតធីម៉ុនថុន នាយសេនាធិការកងទ័ពភូមិភាគទី១ភាគីថៃ លោកសួន បវរ អភិបាលខេត្តបន្ទាយមានជ័យ និងអភិបាលខេត្តបាត់ដំបង ខេត្តស្រះកែវ ខេត្តច័ន្ទបូរី។
លោកឧត្តមសេនីយ៍ទោ ឯក សំអូន ប្រធានក្រុមលេខាខាងកម្ពុជា និងលោកឧត្តមសេនីយ៍ត្រី គ្រីតដាក់ណៃ អ៊ិតម៉ុនថុន ខាងភាគីថៃបានអានរបាយការណ៍រួមគ្នារបស់អង្គប្រជុំដាក់ពង្រាងរបស់ក្រុមលេខានៃប្រទេសទាំងពីរបានឯកភាពគ្នារយៈពេល២ថ្ងៃកន្លងមកនេះ ដោយបានផ្តោតលើកិច្ចសហប្រតិបត្តិការទ្វេភាគី លើវិស័យសន្តិសុខ ដែលមាន ១/ការបង្ការទប់ស្កាត់ការកើតឡើងវិវាទ ២/ទប់ស្កាត់បញ្ហាឧក្រិដ្ឋកម្ម និងភរវកម្មឆ្លងដែន ៣/ការពារ បង្ក្រាបទប់ស្កាត់គ្រឿងញៀនឆ្លងដែន ៤/បង្កាបង្ក្រាបបទល្មើសតាមព្រំដែន ៥/ ការឆ្លងកាត់តាមព្រំដែន ៦/ទប់ស្កាត់ការជួញដូរមនុស្ស និងក្មេងអនាថា និង៧/ ពលករខុសច្បាប់។ ក្នុងនោះអង្គប្រជុំបានពិភាក្សាបន្តដោយផ្តោតលើកិច្ចសហការបន្ថែមលើវិស័យសេដ្ឋកិច្ច សង្គមកិច្ច បរិស្ថាន វិទ្យាសាស្ត្រ និងបច្ចេកទេស សុខាភិបាល កសិកម្ម អប់រំ ទេសចរណ៍ អប់រំផ្សព្វផ្សាយ និងក្របខណ្ឌទិសដៅការអនុវត្តន៍រួមគ្នា ក្រោយការចូលជាសហគមន៍អាស៊ាន ដែលហៅកាត់ថា (AC)។
ក្នុងអង្គប្រជុំនេះប្រធានគណកម្មាធិការព្រំដែនថ្នាក់ភូមិភាគនៃប្រទេសទាំងពីរ (កម្ពុជា-ថៃ) បានឯកភាពលើគ្រប់តាមកំណត់ហេតុដែលក្រុមលេខាបានជួបគ្នាកន្លងមកដោយលោក ឧត្តមសេនីយ៍ឯក ប៊ុន សេង ប្រធានគណកម្មការខាងកម្ពុជាបានថ្លែងថា ពេលនេះយើងកំពុងមានការកែសម្រួលសមាសភាពខាងកម្ពុជា ក្នុងខេត្តបាត់ដំបង និងបន្ទាយមានជ័យ ដើម្បីបន្តរួមសហការជាមួយភាគីថៃបន្តឲ្យមានភាពល្អប្រសើរបន្ថែមទៀត ហើយបានគាំទ្រជាទូទៅរបស់កិច្ចប្រជុំ(GBC.13)របស់សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ និងកិច្ចប្រជុំ (ACMAC) ក្នុងអាស៊ានទាំង៥ ដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅទីក្រុងបាងកក កាលពីពេលថ្មីៗមកនេះ។
ជាបន្តយោធភូមិភាគទី៥ខាងកម្ពុជាយើងរួមសហការជាមួយកងទ័ពភូមិភាគទី១របស់ថៃ បានបន្តអនុវត្តន៍រួមគ្នាតាមខ្សែបន្ទាត់ព្រំដែនលទ្ធផលបានល្អប្រសើរផ្នែកបង្កា បង្ក្រាបបទល្មើសរួមគ្នា ជំរុញវិស័យសេដ្ឋកិច្ច លើគ្រប់វិស័យ បន្ថែមការបើកច្រក ស្ទឹងបត់ និងអូរនាង ជំរុញការបង្កើតតំបន់សេដ្ឋកិច្ចពិសេសតាមខ្សែបន្ទាត់ព្រំដែនជាបន្តទៅទៀត សំខាន់ជួយគ្នាសម្រួលដល់ពលករខុសច្បាប់ ឲ្យមកទទួលបានភាពស្រប់ច្បាប់ឡើងវិញ ហើយក្នុងទិសដៅយើងបានប្តេជ្ញាទាំងអស់គ្នាបន្តអនុវត្តន៍បន្ថែមទៀតដើម្បីផ្តល់ភាពងាយស្រួល និងបង្កើនជីវភាព សុខសន្តិភាពរបស់ប្រជាពលរដ្ឋទាំងសងខាងឲ្យកាន់តែមានភាពល្អប្រសើរឡើង បន្ថែមទៀត។
លោកឧត្តមសេនីយ៍ទោ គូគៀត ស្រ៊ីណាខា សហប្រធានខាងប្រទេសថៃ បានពិនិត្យឯកភាពសម្រេចលើខ្លឹមសាររបស់គណៈកម្មាធិការថ្នាក់ភូមិភាគលើកទី២៦ ឯកភាពតាមឧបសម្ព័ន្ធបានធ្វើរួមនេះឲ្យទទួលបានលទ្ធផលល្អបន្ថែមទៀត ហើយសុំថ្លែងអំណេគុណគ្រប់យ៉ាងដែលក្រុមការងារទាំងពីរ(កម្ពុជា-ថៃ) បានរួមសហការបានល្អ ពិសេសខាងកម្ពុជា តែងតែផ្តល់គ្រប់យ៉ាង និងទឹកចិត្តស្មោះស្ម័គ្របំផុតក្នុងនាមយើងជាបងប្អូន និងគ្នា ហើយក៏សូមគោរពលោកឧត្តមសេនីយ៍ឯក ប៊ុន សេង ខាងភាគីកម្ពុជាដូចជាបងប្អូនបង្កើត តែងតែរំលឹករួមគ្នាជួយគ្នាដើម្បីថែររក្សាសុខសន្តិភាព និងអភិវឌ្ឍរួមគ្នានៅតាមព្រំដែនជាបន្តបន្ទាប់ កន្លងមក និងរួមគ្នាពង្រឹងបន្ថែមបន្តទៅទៀត៕
ចែករំលែកព័តមាននេះ