រាជធានីភ្នំពេញ ៖ សាលាដំបូងរាជធានីភ្នំពេញកាលពីព្រឹកថ្ងៃទី២២ មិថុនា ២០១៨ បានប្រកាសសាលក្រមផ្តន្ទាទោសលើសំណុំរឿងបុរសជនជាតិប៊ែលស៊ិកម្នាក់ដាក់ពន្ធនាគារកំណត់អស់មួយជីវិត និងពិន័យប្រាក់បង់ចូលថវិការរដ្ឋចំនួន៨០លានរៀល ក្រោមការចោទ ប្រកាន់ពីបទ រក្សាទុក ដឹកជញ្ជូន ជួញដូរសារធាតុញៀនឆ្លងដែនដោយខុសច្បាប់តាមមាត្រា៤០ នៃច្បាប់ស្តីពីប្រយុទ្ធប្រឆាំងគ្រឿងញៀន ។ ការសម្រេចនេះ សាលក្រមក៏បើកផ្លូវទុកឲ្យជនត្រូវចោទប្ដឹងឧទ្ធរណ៍តាមកំណត់ច្បាប់ បើមិនសុខចិត្តការកាត់ក្តីរបស់សាលាដំបូងរាជធានីភ្នំពេញ ។
គួរបញ្ជាក់ផងដែរថា សំណុំរឿងនេះត្រូវបានលើកយកមកបើកសវនាការកាលពីព្រឹកថ្ងៃទី០៤ មិថុនា ដែលធ្វើឡើងនៅចំពោះមុខជនជាប់ចោទឈ្មោះ CATRY DAVID NOEL ភេទប្រុស អាយុ៣៤ឆ្នាំ ជនជាតិប៊ែលស៊ិក ។ ហើយកាលពីថ្ងៃទី១០ មករា ២០១៨ សមត្ថកិច្ចនគរបាលមន្ទីរប្រឆាំងគ្រឿងញៀនបានសហការជាមួយសមត្ថកិច្ចប្រចាំច្រកទ្វារអាកាសយានដ្ឋានអន្តរជាតិភ្នំពេញ ធ្វើការឃាត់ខ្លួនជនជាប់ចោទរូបនេះដែលដឹកជញ្ជូនគ្រឿងញៀនប្រភេទកាកូអ៊ីងទម្ងន់ជាង១គីឡូក្រាម (១០០៣,២៤ក្រាម) ដែលមានសារធាតុសុទ្ធចំនួន៨០,៤១ភាគរយ ត្រូវបានរឹបអូសនៅក្នុងវ៉ាលីសរបស់ជនជាប់ចោទពេលធ្វើដំណើរតាមយន្តហោះចូលមកដល់ប្រទេសកម្ពុជា ។
នៅក្នុងសវនាការជនជាប់ចោទបានសារភាពថា ខ្លួនគេពិតជាបានស៊ីឈ្នួលពីជនជាតិប្រេស៊ីលម្នាក់ក្នុងតម្លៃ៣ម៉ឺនដុល្លារ ដើម្បីយកកាកូអ៊ីងទាំងនោះមកដល់កម្ពុជា ។ ជនជាប់ចោទសារភាពទៀតថា រូបគេស្គាល់ជនជាតិប្រេស៊ីលម្នាក់ឈ្មោះ តាំងហ្គី អេជីខូល័រ ក្រោយមកដោយសារបញ្ហាសេដ្ឋកិច្ចផ្ទាល់ខ្លួនដោះស្រាយមិនចេញ ទើបខ្លួនក៏សុខចិត្តស៊ីឈ្នួលកាន់វ៉ាលីសឲ្យមនុស្សម្នាក់ពីប្រទេសប្រេស៊ីលមក ដោយយកគ្រឿងញៀនដែលគេបានរៀបចំរួចជាស្រេចជិះយន្តហោះមកប្រទេសថៃ ហើយចុងក្រោយក៏ចូលមកដល់កម្ពុជាត្រូវសមត្ថកិច្ចចាប់ខ្លួនតែម្ដង៕
ចែករំលែកព័តមាននេះ