រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បាន អះអាងថា ជំហររបស់ប្រទេសជប៉ុន គឺរឹងមាំមិនលូកដៃចូលកិច្ចការផ្ទៃក្នុងប្រទេសកម្ពុជា និងមិនជឿតាមការអូសទាញនោះទេ ។លោកសុខ…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បាន អះអាងថា ជំហររបស់ប្រទេសជប៉ុន គឺរឹងមាំមិនលូកដៃចូលកិច្ចការផ្ទៃក្នុងប្រទេសកម្ពុជា និងមិនជឿតាមការអូសទាញនោះទេ ។លោកសុខ ឥសានបានឲ្យដឹងនៅថ្ងៃទី២២ មិថុនាថា ជំហរដ៏ជាក់លាក់របស់ប្រទេសជប៉ុនគោរពឯករាជ្យ និងអធិបតេយ្យភាពបណ្តាប្រទេសលើសកលលោករួមទាំងព្រះរាជាណាចក្រកម្ពុជាផង ។ ប្រទេសជប៉ុនមិនជ្រៀតជ្រែកកិច្ចការផ្ទៃក្នងបណ្តាប្រទេសទេ រួមទាំងប្រទេសកម្ពុជាផង ។ ជាងនេះប្រទេសជប៉ុននៅតែគាំទ្រការបោះឆ្នោតនៅកម្ពុជាប្រព្រឹត្តទៅដោយសេរីត្រឹមត្រូវ និងយុត្តិធម៌ដែលសម្តែងចេញពីឆន្ទៈពិតប្រាកដរបស់ប្រជាជនកម្ពុជា ។
ហេតុនេះ ហើយបានជាជប៉ុននៅតែបន្តផ្តល់ជំនួយមកកម្ពុជារួមទាំងជំនួយឲ្យ គជប ផងដែរ ។ លោកបានបន្តថា ប្រទេសជប៉ុនមិនទោរទន់ទៅតាមការកៀរគរអូសទាញពីមជ្ឈដ្ឋា នខាងក្រៅណាឡើយ ដើម្បីឲ្យជប៉ុនងាកចេញពីសិទ្ធិស្វ័យសម្រេចរបស់ខ្លួនជាដាច់ខាត ហើយប្រទេសជប៉ុនមិនឆាឆៅចំពោះការសម្រេចចិត្តរបស់រាជរដ្ឋាភិបាលកម្ពុជា ដើម្បីពង្រឹងលទ្ធិប្រជាធិបតេយ្យ និងនីតិរដ្ឋនៅកម្ពយជាឡើយ ។ លោកសុខ ឥសានក៏បានលើកឡើងថា ប្រទេសជប៉ុនមិនលូកដៃអន្តរាគមន៍ដើម្បីជួយអតីតបក្សប្រឆាំងនៅកម្ពុជាដែលបានរំលោភច្បាប់ធ្ងន់ធ្ងរឡើយ ។ ជប៉ុនទុកឲ្យអតីត បក្សប្រឆាំងនេះទទួលខុសត្រូវចំពោះមុខច្បាប់តាមទង្វើរបស់ខ្លួន ។ ជប៉ុនមិនអើរពើ ចំពោះបាតុកម្មអនាធិបតេយ្យទាមទារឲ្យជប៉ុនធ្វើនេះធ្វើនោះតាមខ្លួនឡើយ ។
សូមជម្រាបការលើកឡើងរបស់អ្នកនាំពាក្យគណបក្សកាន់អំណាច បន្ទាប់ពីក្រុមអ្នកគាំទ្រ អតីតគណបក្សប្រឆាំងបានធ្វើបាតុកម្មនៅក្នុងស្ថានទូតជប៉ុននៅក្រៅប្រទេស ដើម្បី ទាមទារឲ្យជប៉ុនឈប់ផ្តល់ជំនួយមកគណៈកម្មាធិការជាតិរៀបចំការបោះឆ្នោតនៅកម្ពុជា ។ យ៉ាងណាក្តីការបាតុកម្មនេះមិនត្រូវបានរដ្ឋាភិបាលប្រទេសជប៉ុនអើពើនោះទេ ។ លើសពីនេះការបាតុកម្មនេះស្របពេលគណៈកម្មាធិការជាតិរៀបចំការបោះឆ្នោតបានកំពុងរៀបចំដំណើរការបោះឆ្នោតជ្រើសតាំងអ្នកតំណាងរាស្ត្រដែលនឹងប្រព្រឹត្តិទៅនៅថ្ងៃទី២៩ខែកក្កដាឆ្នាំ២០១៨ខាងមុខនេះយ៉ាងរលូន។ អ្នកនាំពាក្យគណបក្សកាន់អំណាចក៏បានហៅក្រុមបាតុកម្មនៅក្រៅប្រទេសជារុយ និង មូសកំពុងចោមរោមការបោះឆ្នោតនៅកម្ពុជាផងដែរ ។ បាតុកម្មនេះ និងគ្មានប្រសិទ្ធិអ្វីមកដល់ការបោះឆ្នោតនៅកម្ពុជានោះទេ ។ ព្រោះថា ការបោះឆ្នោតនៅតែដំណើរទៅមុខរាជធម្មតាទោះបីគ្មានបក្សប្រឆាំងចូលរួមក្តី ។
ការបោះឆ្នោតអាណត្តិទី៦ រដ្ឋសភា ឆ្នាំ២០១៨នេះមានគណបក្សនយោបាយចំនួន២០ បានចូលរួមប្រកួតដណ្តើមសន្លឹកឆ្នោត ។ គណបក្សទាំងនោះបានត្រៀមគោលនយោបាយក៏ដូចជា សារនយោបាយ ដើម្បីផ្សព្វផ្សាយក្នុងរយៈពេល១៤ថ្ងៃមុនថ្ងៃបោះឆ្នោតមកដល់ ៕
ចែករំលែកព័តមាននេះ