រាជធានីភ្នំពេញ ៖ ក្រុមអ្នកលេងតុងទីនជាង៣០០នាក់ បានសម្ដែងការខកចិត្តនិងខឹងសម្បារយ៉ាង
ខ្លាំង បន្ទាប់ពីស្រីស្រស់សោភាម្នាក់ដែលជាមេតុងទីន បានប្រមូលលុយខ្ទង់ម៉ឺនដុល្លាររួចគេចខ្លួនបាត់ស្រមោល ។ បន្ទាប់ពីដឹងថា មេតុងទីនប្រមូលលុយគេចខ្លួនបាត់បែបនេះ អ្នកចាញ់បោកទាំងនោះ ក៏ចាត់តំណាងរបស់ខ្លួនចំនួន៤នាក់ ធ្វើដំណើរទៅកាន់សាលាសង្កាត់ចោមចៅ៣ ដាក់ពាក្យប្ដឹងសុំឲ្យជួយអន្តរាគមន៍ ។
តំណាងក្រុមអ្នកលេងតុងទីនទាំង៤នាក់នោះ បានទៅជួបអាជ្ញាធរសង្កាត់ចោមចៅ៣ ខណ្ឌពោធិ៍សែនជ័យ កាលពីវេលាម៉ោង០៨និង៣០នាទីព្រឹកថ្ងៃទី២១ ខែមិថុនា ដោយបានយករូបថតស្ត្រីជាមេតុងទីននោះទៅបង្ហាញអាជ្ញាធរផងដែរ។តំណាងក្រុមអ្នកលេងតុងទីនខាងលើបានឲ្យដឹងថា ពួកគាត់មិនបានស្គាល់ឈ្មោះស្ត្រីជាមេតុងទីននេះច្បាស់ឡើយ ប៉ុន្តែតែងនាំគ្នាហៅឈ្មោះថា ហេងហេង និងស្នាក់នៅភូមិព្រៃទា សង្កាត់ចោមចៅ៣ ខណ្ឌពោធិសែនជ័យដែរ ។ចំណែកទីលំនៅពិតប្រាកដរបស់ស្ត្រីនោះមិនបានដឹងឡើយ ហើយស្ត្រីម្នាក់នេះបានវេចលុយខ្ទង់ម៉ឺនដុល្លាររត់ចោលពួកគាត់រយៈពេល៦ថ្ងៃមកហើយ គឺតាំងពីថ្ងៃទី១៥ ខែមិថុនាម្ល៉េះ។
ប្រភពដដែលបន្តថា អ្នករងគ្រោះដោយការចាញ់បោកមេតុងទីនរត់ចោលនេះមានចំនួន៣០៥នាក់ ហើយការលេងតុងទីនមាន២ក្រុម និងដេញជារៀងរាល់ថ្ងៃ ក្នុងនោះក្រុមទី១ មានសមាជិក១៥០នាក់ ចំណែកក្រុមទី២មានសមាជិក១៥៥នាក់ ឯការលេងក្នុង១ក្បាលចាប់ពី២ម៉ឺនរៀលឡើងទៅ ។កន្លងមក ដល់ម៉ោងដេញគឺតែងតែជួបមុខមេរហូត ដូច្នេះហើយទើបគ្មានអ្នកណាដឹងថាមេមានគំនិតបោកបែបនេះ ។ លុះដល់ថ្ងៃទី១៥ខែមិថុនា ស្រាប់តែបាត់មេទើបមានការភ្ញាក់ផ្អើលតែម្តង ៕
ចែករំលែកព័តមាននេះ