រាជធានីភ្នំពេញ ៖ កម្មករប្រមាណ៣០នាក់ បានរងរបួសធ្ងន់ និងស្រាល ដោយសាររត់ជាន់គ្នា បន្ទាប់ពីកើតមានទុស្សេចរន្តអគ្គិសនីមួយបណ្តាលឱ្យផ្អើលឆោឡោ ហើយកម្មករដ៏ណែនណាន់តាន់តាប់ក្នុងរោងចក្រនោះ បានស្ទុះស្រដណ្តើមគ្នាចេញទៅខាងក្រៅ ដើម្បីគេចចេញពីគ្រោះថ្នាក់កាលពីវេលាម៉ោង៩និង៣០នាទីព្រឹកថ្ងៃទី២ មីនា ២០១១ ស្ថិតក្នុងភូមិក្បាលដំរី សង្កាត់កាកាប ខណ្ឌដង្កោ…ចំណែកអ្នករងរបួសទាំងនោះត្រូវបានគេចចាត់បញ្ជូនទៅព្យាបាលនៅមន្ទីរពេទ្យភ្លាមៗអស់ហើយ ។
កម្មករដែលភ្ញាក់ផ្អើលរត់ជាន់គ្នារហូតដល់រងរបួសធ្ងន់នេះ គឺជាអ្នកបម្រើការងារនៅក្នុងរោងចក្រកាត់ដេរ (អតីតរោងចក្រផលិតស្បែកជើង) ឈ្មោះរីឡាយ អេប៊លសូប អុីនដាស្ទ្រីល ស្ថិតក្នុងភូមិ-សង្កាត់កើតេហតុខាងលើ មានកម្មករបម្រើការក្នុងរោងចក្រនេះប្រមាណ៣.០០០នាក់ ។ តាមព័ត៌មានជំហានដំបូងបានឱ្យដឹងថា ករណីដែលឈានទៅដល់ការរត់ជាន់គ្នានេះគឺបណ្តាលមកពីផ្អើលទុស្សេខ្សែចរន្តអគ្គិសនីនៅផ្នែកតុកាត់ ហើយរាលដាលជាអណ្តាតភ្លើង ទើបកម្មករទាំងនោះផ្អើលរត់ប្រជ្រៀតគ្នាចេញ មានអ្នកខ្លះដួល អ្នកខ្លះប៉ះទង្គិចរបស់រឹងផ្សេងៗ និងអ្នកខ្លះរត់ជាន់គ្នា ប៉ុន្តែមិនបណ្តាលឱ្យមានអ្នកស្លាប់ទេ ហើយអណ្តាតភ្លើងក៏ត្រូវបានពន្លត់រួចរាល់ដែរ…។ ព័ត៌មានលម្អិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព ៕
ចែករំលែកព័តមាននេះ