រាជធានីភ្នំពេញ ៖ រយៈពេល២ថ្ងៃនគរបាលអន្តោប្រវេសន៍ឃាត់ខ្លួនជនជាតិវៀតណាមចំនួន២៨នាក់ ជនជាតិវៀតណាមប្រុសស្រីសរុបចំនួន២៨នាក់ត្រូវបានកម្លាំងនគរបាលអន្តោប្រវេសន៍ធ្វើការចាប់ឃាត់ខ្លួនជាបន្តបន្ទាប់ក្នុងរយៈពេលពីរថ្ងៃជាប់គ្នា និង២គោលដៅផ្សេងៗគ្នាដោយនៅព្រឹកថ្ងៃទី២១ ខែមិថុនា ឆ្នាំ២០១៨ នេះបានធ្វើឡើងនៅក្នុងផ្សារកណ្តាល ក្នុងសង្កាត់ផ្សារកណ្តាលទី១ ខណ្ឌដូនពេញ និងមួយគោលដៅទៀតធ្វើឡើងកាលពីព្រឹកថ្ងៃទី២០ ខែមិថុនា ឆ្នាំ២០១៨ នៅក្នុងសង្កាត់ទឹកល្អក់៣ ខណ្ឌទួលគោក ។
តាមប្រភពព័ត៌មានបានប្រាប់ឱ្យដឹងថា ក្រោយការដឹកនាំរបស់លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តិន៍នីតិវិធីសហការជាមួយនឹងកម្លាំងការិយាល័យស៊ើបអង្កេត និងអនុវត្តន៍និតិវិធី ដោយមានការសម្របសម្រួលអំពីសំណាក់លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញក្នុងថ្ងៃនោះដែរកម្លាំងរបស់លោកក៏បានចុះប្រតិបត្តិការត្រួតពិនិត្យការស្នាក់នៅ និងបំពេញការងាររបស់ជនបរទេសនៅតាមតូបសំអាងការ ធ្វើក្រចក អ៊ុតសក់ និងតូបលក់ដូរមួយចំនួននៅក្នុងផ្សារកណ្តាល ។
ក្នុងប្រតិបត្តិការនោះដែរកម្លាំងរបស់លោកបានរកឃើញជនជាតិវៀតណាមប្រុសស្រីជនជាតិវៀតណាមចំនួន១៥នាក់ ក្នុងនោះមានស្រី៨នាក់ ដែលកំពុងតែលួចស្នាក់ និងបំពេញ ការងារដោយខុសច្បាប់ ។
តាមប្រភពដដែលក៏បានប្រាប់បន្តទៀតដែរថា កាលពីថ្ងៃទី២០ ខែមិថុនា ឆ្នាំ២០១៨ កម្លាំងរបស់លោកក៏បានចុះធ្វើការត្រួតពិនិត្យការស្នាក់នៅ និងបំពេញការងាររបស់ជនបរទេសនៅក្នុងសង្កាត់ទឹកល្អក់៣ ខណ្ឌទួលគោក ដោយបានធ្វើការឃាត់ខ្លួនជនជាតិវៀតណាមប្រុសស្រីចំនួន១៣នាក់ (ស្រី៧នាក់) ផងដែរ ។
ក្រោយពីប្រតិបត្តិការចុះត្រួតពិនិត្យការស្នាក់នៅ និង បំពេញការងាររបស់ជនបរទេសទាំងពីរគោលដៅនៅក្នុងខណ្ឌចំនួន២គឺខណ្ឌដូនពេញ និង ខណ្ឌទួលគោក ដោយធ្វើការឃាត់ខ្លួនជនជាតិវៀតណាមសរុបចំនួន២៨នាក់នេះខាងលើនេះរួចហើយក៏បានធ្វើការចាប់បញ្ជួនទៅកាន់អគ្គនាយកដ្ឋានអន្តោប្រវេសន៍ដើម្បីចាត់ការទៅតាមនីតិវិធី ៕
ចែករំលែកព័តមាននេះ