រាជធានីភ្នំពេញ ៖ ក្រុមអង្គការសង្គមស៊ីវិល និងគណបក្សនយោបាយ គឺជាកោសិកាដ៏មានសារសំខាន់មួយសម្រាប់ប្រទេសជាតិដូច្នេះប្រជាពលរដ្ឋខ្មែរមានសិទ្ធិបង្កើតគណបក្សនយោបាយ និងអង្គការសង្គមស៊ីវិលឲ្យស្របទៅតាមច្បាប់របស់កម្ពុជា ។ សម្តេចក្រឡាហោមស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃថ្លែងបែបនេះក្នុងវេទិកាស្តីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិលដែលរៀបចំនៅសាលប្រជុំទីស្តីការក្រសួងមហាផ្ទៃកាលពីព្រឹកថ្ងៃទី២១ ខែមិថុនា ឆ្នាំ២០១៨ ។
សម្តេចក្រឡាហោមបានបញ្ជាក់ថា សមាគមន៍ និងអង្គការមិនមែនរដ្ឋាភិបាលនៅកម្ពុជាមានចំនួនច្រើន ប៉ុន្តែក្នុងនោះមានចំនួន៦៤៨ដែលបានបំពេញកាតព្វកិច្ចរបស់ខ្លួន ខណៈដែលសមាគម និងអង្គការក្រៅរដ្ឋាភិបាលមួយចំនួនធំទៀតនៅមិនទាន់បំពេញកាតព្វកិច្ចនៅឡើយ ។ នៅព្រះរាជាណាចក្រកម្ពុជាយើងអនុវត្តនយោបាយប្រជាធិបតេយ្យ សេរីពហុបក្ស អង្គការសង្គមស៊ីវិល និងគណបក្សនយោបាយ គឺជាកោសិកាដ៏សំខាន់មួយដែលមិនអាចខ្វះបាន ។ ដូច្នេះដើម្បីធានាសិទ្ធិរបស់ពលរដ្ឋក្នុងការចូលរួមកិច្ចដំណើរ ប្រជាធិបតេយ្យស្របតាមរដ្ឋធម្មនុញ្ញកម្ពុជាពលរដ្ឋខ្មែរមានសិទ្ធិបង្កើតសមាគម និងគណបក្សនយោបាយ ។ ក្រសួងមហាផ្ទៃ បានទទួលរបាយការណ៍ពីថ្នាក់ក្រោមជាតិមួយចំនួនថា អង្គការសង្គមស៊ីវិលមួយចំនួនពុំមានទំនាក់ទំនងល្អជាមួយអាជ្ញាធរ ឬមិនបានផ្ដល់ព័ត៌មានមកអាជ្ញាធរនៅពេលចុះជួបពលរដ្ឋតាមមូលដ្ឋាន ដូច្នេះទើបអាជ្ញាធរមានវិការតាមផ្លូវច្បាប់ ។
លោកសឿង សារឿន ប្រធានអង្គការគណៈកម្មាធិការសហប្រតិបត្តិការ ដើម្បីកម្ពុជា(CCC) និងជាតំណាងអង្គការសង្គមស៊ីវិលបានថ្លែងក្នុងវេទិកានោះថា ទោះបីជាស្ថានភាពទូទៅនៃកិច្ចសហប្រតិបត្តិការរវាងរដ្ឋាភិបាល និងអង្គការសង្គមស៊ីវិលមានភាពល្អប្រសើរជិត៣ទស្សវត្សន៍កន្លងមកក៏ដោយ ប៉ុន្ដែនាពេល១ឆ្នាំចុងក្រោយនេះសង្គមស៊ីវិលបានទទួលរងក្ដីព្រួយបារម្ភមួយចំនួនរួមមានទី១ -ការថយចុះនៃ កិច្ចសហការពីសំណាក់អាជ្ញាធរមូលដ្ឋានទី២ – ការភ្ជាប់អង្គការសង្គមស៊ីវិលទៅនឹងបរិបទនយោបាយ និងចលនាប្រឆាំងនានា និងទី៣ – ការឆ្លើយតបពីសំណាក់ក្រសួងមហាផ្ទៃតាមសំណើរ និងតម្រូវការជាច្រើនរបស់អង្គការស៊ីវិល ។ នៅក្នុងរយៈពេលប៉ុន្មានឆ្នាំចុងក្រោយនេះ ដោយមានកិច្ចសហប្រតិបត្តិការល្អរវាងរាជរដ្ឋាភិបាល និងអង្គការសង្គមស៊ីវិលទើបជំរុញឲ្យអង្គការសង្គមស៊ីវិលបានដើរតួនាទីយ៉ាងសំខាន់របស់ខ្លួនក្នុងការចូលរួមចំណែកការអភិវឌ្ឍប្រទេសកម្ពុជា ។
តួយ៉ាងការសិក្សារួមមួយក្នុងចំណោមសង្គមស៊ីវិល២០០០អង្គការ កាលពីឆ្នាំ២០១២ បង្ហាញថា សង្គមស៊ីវិលបានចំណោយទឹកប្រាក់សរុបប្រមាណជាង៦០០ទៅ៧០០លានដុល្លារ ក្នុងមួយឆ្នាំៗ សម្រាប់ចូលរួមក្នុងការអភិវឌ្ឍប្រទេសជាតិ និងអ្នកទទួលផលដោយផ្ទាល់ និងដោយប្រយោលជិត១២លាននាក់ ។ ឆ្លៀតឱកាសនោះដែរសម្ដេចក្រឡាហោម ស ខេង បានបញ្ជាក់ថានៅថ្ងៃទី២៩ ខែកក្កដា ឆ្នាំ២០១៨ខាងមុខកម្ពុជានឹងមានការរៀបចំការបោះឆ្នោតជ្រើសតាំងតំណាងរាស្ដ្រអាណត្តិទី៦ រាជរដ្ឋាភិបាលកម្ពុជាបានប្ដេជ្ញាចិត្តឲ្យដំណើរការបោះឆ្នោតប្រព្រឹត្តិទៅដោយសេរីត្រឹមត្រូវយុត្តិធម៌ និងមានសុវត្ថិភាពជូនពលរដ្ឋខ្មែរ ៕
ចែករំលែកព័តមាននេះ