ប្រទេសប៉ាគីស្ថាន ៖ បើយោងតាមប្រទេសប៉ាគីស្ថានបានអះអាងជាផ្លូវការកាលពីថ្ងៃទី២១ មិថុនាថា យន្តហោះគ្មានមនុស្សបើកអាមេរិកមួយគ្រឿងបានសម្លាប់ប្រមុខពួកតាលីបង់ប៉ាគីស្ថាន លោក MOLLAH FAZLULLAH ក្នុងខេត្តគូណារ ភាគខាងកើតអាហ្វហ្គានីស្ថាន។
មុននេះបណ្ដាមន្ត្រីអាហ្វហ្គានីស្ថាននិយាយថា លោក MOLLAH FAZLULLAH ប្រមុខក្រុមTEHRIK-E-TALIBAN PAKISTAN បានត្រូវសម្លាប់កាលពីថ្ងៃទី១៣ មិថុនា ដោយគ្រាប់មីស៊ីលបាញ់ចេញពីយន្តហោះចារកម្មអាមេរិកមួយគ្រឿង។ ចំណែកអ្នកនាំពាក្យក្រសួងការបរទេសប៉ាគីស្ថាន លោក MOHAMMAD FAISAL និយាយថា មែនហើយយើងអាចបញ្ជាក់ថា ជននេះពិតជាស្លាប់។ រីឯពួកតាលីប៉ង់ប៉ាគីស្ថាន នៅពុំទាន់បញ្ជាក់ពីការស្លាប់របស់ប្រមុខពួកគេនៅឡើយ ប៉ុន្តែប្រភពនានារបស់ពួកតាលីបង់ លាតត្រដាងថា ការប្រកាសជាផ្លូវការមួយអាចធ្វើ ពេលក្រុមពួកគេជ្រើសរើសបានមេដឹកនាំថ្មី។
អ្នកនាំពាក្យក្រសួងការទេសប៉ាគីស្ថានគូសបញ្ជាក់ថា ការសម្លាប់ភេរវករ MOLLAH FAZLULLAH ដែលដឹកនាំអំពើភេរវកម្មនានាប្រឆាំងប៉ាគីស្ថាន គឺជាជោគជ័យសំខាន់មួយក្នុងការតស៊ូប្រឆាំងភេរវកម្ម។ព័ត៌មានអំពីការស្លាប់របស់ប្រមុខតាលីបង់រូបនេះ ត្រូវបានអបអរសាទរក្នុងប្រទេស ពិសេសបណ្ដាគ្រួសារដែលសាច់ញាតិពួកគេរងគ្រោះដោយការវាយប្រហារភេរវកម្ម៕
ចែករំលែកព័តមាននេះ