ខេត្តបាត់ដំបង ៖ លោកប៉ង់ សុយុទ្ធធារ៉ា ព្រះរាជអាជ្ញារង បានកោះហៅកម្លាំងសមត្ថកិច្ចយ៉ាងតក់ក្រហល់ដោយមិនបានប្រាប់អំពីផែនការណ៍ជាមុន ឆ្មក់ចូលបង្ក្រាបទីតាំងល្បែងហ្គេមនិងចាក់បាល់ ជ្រកក្រោមស្លាកអុីនធើរណេតចំនួន២កន្លែង ដែលធ្វើឲ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង០៧ និង៤០នាទីយប់ថ្ងៃទី២១ មិថុនា នៅក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ដែលក្របួចបានមនុស្សជាងជិត២០នាក់ ដែលភាគច្រើនជាក្រុមសិស្សវង្វេងផ្ទះ ។ សមត្ថកិច្ចបានឲ្យដឹងថា កិច្ចប្រតិបត្តិការនេះ ដឹកនាំដោយលោកប៉ង់ សុយ្ទ្ធធារ៉ា ព្រះរាជអាជ្ញារង និងចូលរួមសហការដោយកម្លាំងនគរបាលផ្នែកបង្ការបង្ក្រាបនៃការិយាល័យព្រហ្មទណ្ឌកំរិតស្រាល ។ ប្រភពដដែលបានឱ្យដឹងទៀតថា លោកព្រះរាជអាជ្ញាមិនបានប្រាប់អំពីផែនការបង្ក្រាបទីតាំងល្បែងហ្គេមខាងលើនេះ ឱ្យសមត្ថកិច្ចបានជ្រាបជាមុនទេ បែបទំនងខ្លាចបែកការណ៍ ដែលធ្វើឱ្យកិច្ចប្រតិបត្តការនេះបរាជ័យ ។ ប៉ុន្តែពេលចុះដល់ទីតាំង ទើបបញ្ជាឲ្យកម្លាំងសមត្ថកិច្ចបិតខ្ទប់ទ្វារ រួចចូលបង្ក្រាបតែម្ដង ។ បើតាមការពិនិត្យជាក់ស្ដែង នៅក្នុងទីតាំងល្បែងហ្គេមនិងចាក់បាល់ទាំងនោះ អ្នកប្រព្រិត្តនឹងល្បែងនេះ ភាគច្រើនជាក្រុមសិស្សសាលាដែលវង្វេងផ្ទះនិងសាលា ។នៅក្នុងរបាយការណ៍បឋមរបស់សមត្ថកិច្ចបានឲ្យដឹងថា ការបង្ក្រាបទីតាំងទី១-យីហោ Gold Cafe Net ស្ថិតនៅក្នុងភូមិព្រែកមហាទេព សង្កាត់ស្វាយប៉ោ ។ ទីតាំងនេះ សមត្ថកិច្ចក្របួចបានក្រុមយុវសិស្សវង្វេងផ្ទះចំនួន១៦នាក់ និងបុគ្គលិកបំរើការក្នុងទីតាំងល្បែងនេះចំនួន២នាក់ គឺឈ្មោះលឹម ម៉ារ៉ា ភេទស្រី អាយុ២៥ឆ្នាំ និងឈ្មោះអៀម ប៉ថេង ភេទប្រុស អាយុ២៤ឆ្នាំ ។ ជាមួយគ្នានេះ សមត្ថកិច្ចក៏បានដកហូតនូវវត្ថុតាងជាច្រើន ដូចជាវត្ថុតាងដកហូតរួម LCDកុំព្យូទ័រចំនួន១៩គ្រឿង, ម៉ាស៊ីនកុំព្យូទ័រចំនួន១៥គ្រឿង, ឃីបតចំនួន១៦គ្រឿង និងសម្ភារជាច្រើនទៀត ដែលពាក់ព័ន្ធនឹងបទល្មើសល្បែងស៊ីសងជ្រកក្រោមស្លាកអុីនធើណេតនេះ។
ដោយឡែក ទីតាំងទី២-នៅទីតាំងដែលមានយីហោ Master Net ស្ថិតក្នុងភូមិព្រែកមហាទេព សង្កាត់ស្វាយប៉ោ។ ទីតាំងទី២នេះ សមត្ថកិច្ចបង្ក្រាបបានបុគ្គលិកបំរើការម្នាក់ប៉ុណ្ណោះ គឺឈ្មោះសែម រិទ្ធី ប្រកសអាយុ៣៥ឆ្នាំ ខណ:អ្នកលេងបានចេញផុត និងខ្លះមិនទាន់បានចូលលេង ។ ប៉ុន្តែបានរឹបអូសនូវវត្ថុតាងជាច្រើនដូចជា LCDកុំព្យូទ័រចំនួន ១០គ្រឿង, ម៉ាស៊ីនកុំព្យូទ័រចំនួន៨គ្រឿង, ឃីបតចំនួន៧គ្រឿង និងសម្ភារ:ពាក់ព័ន្ធនឹងបទល្មើសជាច្រើនទៀត ។ ពាក់ព័ន្ធនឹងទីតាំងល្បែងហ្គេមជ្រកក្រោមស្លាកធ្វើអាជីវកម្មអុីធើរណេតនេះ បើតាមប្រភពពីសមត្ថកិច្ចមួយចំនួនបាននិយាយថា បច្ចុប្បន្ន ទីតាំងល្បែងនេះកំពុងរីកលូតលាស់ខ្លាំងបំផុត នៅក្នុងក្រុងបាត់ដំបង បើទោះជាសមត្ថកិច្ចធ្លាប់ចុះបង្ក្រាបខ្លះៗកន្លងមកក្ដី ។ ប្រភពដដែលបានឲ្យដឹងទៀតថា ប្រជាពលរដ្ឋតែងរិះគន់មិនឈប់ឈរអំពីសកម្មភាពរបស់សមត្ថកិច្ច ដែលមានការរើសអើងក្នុងការចុះបង្ក្រាបទីតាំងល្បែងហ្គេម ឬចាក់បាល់ ដែលជ្រកក្រោមស្លាកអាជីវកម្មអុីនធើរណេនេះ ។ អ្នកប្រកបរបនេះខ្លះ បានចង្អុលមុខសមត្ថកិច្ចចំៗថា បង្ក្រាបបានតែទីតាំងណា ដែលរឹងរុះមិនព្រមបង់សំណែនប្រចាំខែ ឬគ្មានខ្សែគ្មានខ្នងបង្អែក រីឯទីតាំងណាដែលបានបង់សំណែនប្រចាំខែ ឬ មានខ្សែសាច់ញាតិជាមន្ត្រីមានអំណាច ឬ មានក្រុមគ្រួសារជាសមត្ថកិច្ច កន្លងសមត្ថកិច្ចមិនហ៊ានបង្ក្រាបទេ សុខចិត្តឆ្ងោកមុខដើរហួស ។ជាពិសេស ទីតាំងល្បែងហ្គេមប៉ុន្មានកន្លែងដែលស្ថិតនៅខាងលិច «វិទ្យាល័យព្រះមុនីវង្ស» ចម្ងាយប្រហែល៥០ម៉ែត្រ ដែលកំពុងពង្វក់សិស្សសាលាទាំងយប់ទាំងថ្ងៃ តែគ្មានសមត្ថកិច្ចនៅអង្គភាពណាមួយហ៊ានចុះបង្ក្រាបទេ រាប់ទាំងស្ថាប័នអយ្យការអមសាលាដំបូងខេត្តផង ។ បើតាមប្រភពខាងលើនេះ បានបញ្ជាក់ថា ទីតាំងល្បែងហ្គេ មដែលកំពុងពង្វក់សិស្សសាលាទាំងយប់ទាំងថ្ងៃនៅខាងលិចវិទ្យាល័យព្រះមុនីវង្ស ខាងលើនេះ គឺជាកម្មសិទ្ធិរបស់លោកទាហានផ្កាយ១ ។ ដូច្នេះហើយ ទើបសមត្ថកិច្ចមិនហ៊ានចុះបង្ក្រាប ។ នេះជាការអនុវត្តច្បាប់ដោយគ្មានតម្លាភាពរបស់កម្លាំងសមត្ថកិច្ចរវាងអ្នកមានខ្សែនិងអ្នកអត់ខ្សែ។ ប៉ុន្តែទោះជាយ៉ាងណា បើតាមសមត្ថកិច្ចបានបញ្ជាក់ដែរថា កន្លងសមត្ថកិច្ចធ្លាប់ចុះបង្ក្រាបទីតាំងល្បែងហ្គេមលោកផ្កាយ១ខាងលើនេះចំនួន២លើកហើយ ក្រោមការអន្តរាគមន៍ខ្វាត់ខ្វែងពីមន្ត្រីថ្នាក់លើ ថែមទាំងរឹបអូសនូវសម្ភារជាច្រើនផង តែក្រោយមកទីតាំងលោកផ្កាយ១នេះ នៅតែអាចបើកស្វាគមន៍កូនសិស្សទាំងយប់ទាំងថ្ងៃបានយ៉ាងរលូនដោយមិនរំខានដលា់មត្ថកិច្ចឡើយ ។ ប្រជាពលរដ្ឋកំពុងរង់ចាំតាមដានថា តើពេលណាទើបសមត្ថកិច្ចនិងតុលាការចុះបង្ក្រាបទីតាំងល្បែងហ្គេមរបស់លោកទាហានពាក់ផ្កាយ១ខាងលើនេះ… ឬក៏សមត្ថកិច្ចមិនហ៊ានបង្ក្រាប.?ទោះយ៉ាងណា ជុំវិញកិច្ចប្រតិបត្តិការបង្ក្រាបទីតាំងល្បែងហ្គេមជ្រកក្រោមស្លាកអុីនធើរណេតទាំង២កន្លែងខាងលើនេះ បើតាមមន្ត្រីការិយាល័យជំនាញបានឲ្យដឹងថា លោកស្នងការខេត្ត និងលោកព្រះរាជអាជ្ញាបានបញ្ជាឲ្យឃាត់ខ្លួនមនុស្ស៣នាក់ ដែលជាអ្នកមើលការខុសត្រូវទីតាំងល្បែងហ្គេមទាំង២កន្លែងខាងលើនេះ ដើម្បីកសាងសំណុំរឿងបញ្ជូនទៅតុលាការ រីឯក្រុមសិស្សសាលាវង្វេងផ្ទះចំនួន១៤នាក់ ត្រូវបានធ្វើការអប់និងធ្វើកិច្ចសន្យាឲ្យត្រឡប់ទៅផ្ទះវិញ ៕
ចែករំលែកព័តមាននេះ