ខេត្តកំពង់ឆ្នាំង ៖ បន្ទាប់ពីមានការចុះផ្សាយរបស់សារព័ត៌មានកោះសន្តិភាពបានផ្សាយពីជីវិត ក្រីក្រលំបាករបស់លោកយាយ ហ៊ឹម សៃ អាយុ៦៦ឆ្នាំ ដែលកំពុងចិញ្ចឹមចៅចំនួន៤នាក់ ក្នុងនោះមានពីរនាក់មានអាយុ៩ និង១០ឆ្នាំ ចំណែកពីរនាក់ទៀត ម្នាក់អាយុ២ឆ្នាំ និងម្នាក់ទៀតអាយុ៨ខែរួចមកក៏មានសប្បុរសជនបាននាំអំណោយយកទៅជូនគ្រួសារខាងលើ ជាបន្តបន្ទាប់ ។
ជាក់ស្តែងនៅព្រឹកថ្ងៃទី២១ ខែមិថុនា ឆ្នាំ២០១៨ លោកឧកញ៉ា កុយ សុវណ្ណ សមាជិកក្រុមការងារថ្នាក់កណ្តាល ចុះជួយខេត្តកំពង់ឆ្នាំង និងជាប្រធានកិត្តិយស សម្ព័ន្ធយុវជនស្រឡាញ់សន្តិភាពសាខាខេត្តកំពង់ឆ្នាំង និងសហការីព្រមទាំងអាជ្ញាធរភូមិឃុំផងបាននាំអំណោយទៅជូនគ្រួសារខាងលើដល់កន្លែងរស់នៅបណ្តោះអាសន្ននៅភូមិខ្លែងព័រ ឃុំព្រៃមូល ស្រុករលាប្អៀរ ។
នៅក្នុងឱកាសផ្តល់ជូនអំណោយខាងលើនោះលោកឧកញ៉ា កុយ សុវណ្ណ បានមានប្រសាសន៍ថា បន្ទាប់ពីទទួលព័ត៌មានតាមរយៈការចុះផ្សាយរបស់សារព័ត៌មានកោះសន្តិភាពកន្លងថ្មីៗ ខ្ញុំមានសេចក្តីតក់ស្លុត និងអាណិតអាសូរបំផុតចំពោះក្មួយៗមិនបានទៅរៀនសូត្រ និងក្មួយតូចៗដែលត្រូវបានឪពុកម្តាយបោះបង់ចោល ដោយទៅធ្វើការជាពលករដោយខុសច្បាប់ ។ ថ្ងៃនេះ ក្នុងនាមក្រុមការងារ សម្ព័ន្ធយុវជនស្រឡាញ់សន្តិភាពបានរៃប្រាក់គ្នាទិញសម្ភារ និងគ្រឿងបរិក្ខា មានអង្ករ មី ត្រីខ ទឹកសុទ្ធ ប្រេងឆា ប៊ីចេង ស្ករ អំបិល ទឹកត្រី ត្រីស៊ីអ៊ីវ សម្លៀកបំពាក់សិស្ស ស្បែកជើង និងកង់១គ្រឿង គិតជាទឹកប្រាក់ចំនួន៨០ម៉ឺនរៀល និងជូនសូមបន្ថែម ចំនួន៤០ម៉ឺនរៀលទៀត ទុកជូនលោកយាយ ហ៊ឹម សៃ សម្រាប់ការខ្វះខាត ទិញម្ហូបអាហារចិញ្ជឹមចៅថ្ងៃក្រោយ ។ ជាមួយគ្នានេះរូបលោកក៏បានស្នើសុំឲ្យអាជ្ញាធរភូមិ ឃុំ និងមន្ត្រីសុរិយោដីស្រុក- ខេត្ត សូមមេត្តាជួយរកដី និងរកឈើសម្រាប់ធ្វើផ្ទះ ចំណែកខាងឯកឧត្តម នឹងជួយឧបត្ថម្ភស័ង្កសីសម្រាប់ប្រក់ផ្ទះ ដើម្បីឲ្យគ្រួសារនេះរស់នៅបានសមរម្យដូចគេឯងដែរ ។
ក្នុងឱកាសនោះលោកយាយ ហ៊ឹម សៃ អាយុ៦៦ឆ្នាំ រួមនឹងចៅស្រីបានថ្លែងអំណរគុណជាអណេកចំពោះ សប្បុរសជន ដែលបានជួយឧបត្ថម្ភជាបន្តបន្ទាប់ និងសូមគោរពជូនពរដល់ សប្បុរសជនទាំងអស់ សូមជួបប្រទះតែពុទ្ធពរទាំង៤ប្រការកុំបីឃ្លាងឃ្លាតឡើយ ។ ជាមួយគ្នានោះដែរ លោកស្រី ថោង ហុង មេឃុំព្រៃមូលបានឲ្យដឹងថា ពេលនេះលោកមេភូមិ និងអាជ្ញារឃុំបានឯកភាពគ្នា និងបានកំណត់ទីតាំងដីសម្រាប់សាងសង់ផ្ទះឲ្យគ្រួសារនេះរស់នៅបានហើយ គឺជិតសាលារៀនសម្រាប់ឲ្យក្មួយៗបានទៅរៀនងាយស្រួល និងបានត្រៀមឲ្យមន្ត្រីសុរិយោដីវាស់ដីជូនគាត់ហើយ គឺជាប់របងសាលាបឋមសិក្សាខ្លែងព័រតែម្តង ។
សូមបញ្ជាក់ថា នៅថ្ងៃដដែលនោះដែរលោកឧកញ៉ា កុយ សុវណ្ណ បានប្រគេនចៅអធិការវត្ត ខ្លែងពរ័ ចំនួន៤០ម៉ឺន និងជួយគ្រួសារក្រីក្រ១គ្រួសារទៀត មានប្តីឈ្មោះ ញ៉េប អឿន អាយុ៦៨ឆ្នាំ មានជំងឺដើរមិនរួចយូរឆ្នាំហើយ និងប្រពន្ធឈ្មោះ ចាន់ ហឿន អាយុ៧០ឆ្នាំ រស់នៅភូមិត្រពាំងព្រីង ឃុំអភិវឌ្ឍន៍ ស្រុកទឹកផុស ក៏បានទទួលអំណោយដូចគ្រួសារកុមារកំព្រាខាងលើដែរ ៕
ចែករំលែកព័តមាននេះ