Apple នឹង​ទទួល​រង​ផល​ប៉ះពាល់​ពី​សង្គ្រាម​ពាណិជ្ជកម្ម​ខ្លាំង​ជាងគេ


Apple អាច​នឹង​មាន​ហានិភ័យ​ខ្ពស់​ជាង​គេ​ ក្នុង​ចំណោម​ក្រុមហ៊ុន​បច្ចេកវិទ្យា​អា​មេ​រិក ប្រសិនបើ​ភាព​តានតឹង​ពាណិជ្ជកម្ម​រវាង​សហ​រដ្ឋអាមេរិក និង​ចិន បន្ត​កើនឡើង ។ កាលពី​ល្ងាច​ថ្ងៃ​ចន្ទ​កន្លង​មកនេះ លោក​ប្រធានា​ធិបតី​អា​មេ​រិ​ក ដូ​ណា​ល់ ត្រាំ បាន​គំរាម​​ថា នឹង​ដាក់​ពន្ធ​បន្ថែម​លើ​ផលិត​ផល​​ចិន​ប្រមាណ​​២០០​ប៊ី​លាន​​ដុល្លារ ។ ជា​ការ​ឆ្លើយ​តប ក្រសួង​ពាណិជ្ជកម្ម​ចិន​បាន​សន្យា​ថា នឹង​ដាក់​ពន្ធ​វិញ ប្រសិន​បើ​សហរដ្ឋអាមេរិក​អនុម័ត​ពន្ធ​​នេះ ។

ការ​គំរាមកំហែង​នេះ​កើត​មាន​ឡើង បន្ទាប់​ពី​ការ​ប្រកាស​កាលពី​ថ្ងៃ​សុក្រ​ថា នឹង​​ដាក់ពន្ធ​ ២៥%​លើ​​ផលិតផល​ចិន ស្មើ​​​នឹង​ទឹកប្រាក់​ប្រមាណ​៥០​ប៊ី​លាន​​ដុល្លារ ។ កាលពី​ឆ្នាំ​ហិរញ្ញវត្ថុ​មុន ២០%​នៃ​ប្រាក់​ចំណូល​​របស់ Apple គឺ​បាន​មក​ពី​ប្រទេស​ចិន ដែល​​​ស្មើនឹង​៤៤,៧​ប៊ី​លាន​ដុល្លារ​​ ។ យោង​​​តាម​ទិន្នន័យ​ពី IDC ឲ្យ​ដឹង​ថា កាល​ពី​ឆ្នាំ​​២០១៧ ក្រុមហ៊ុន​នេះ​បាន​លក់ iPhone ប្រមាណ​៤១​លាន​​គ្រឿង​នៅ​ប្រទេស​​ចិន និង​ជា​ក្រុម​ហ៊ុនទូរស័ព្ទ​ធំ​ជាង​គេ​លេខ​៥ ក្នុង​​ទីផ្សារ​ចិន​​ផង​ដែរ​ ។

លើស​ពី​នេះ Apple មាន​ហាង​ប្រមាណ​៤០​​កន្លែង​នៅ​ប្រទេស​ចិន និង​មានដំណើរ​ការ​សេវាកម្ម​ផ្សេង​ៗ​​ដូច​ជា App Store និង Apple Music ក្នុង​ប្រទេស​ចិន​ ។ ​​ផ្នែក​ផ្តល់​សេវា​កម្ម​កំពុង​តែ​ក្លាយជា​ផ្នែក​មួយ​ដ៏​សំខាន់​ក្នុង​អាជីវ​កម្ម​របស់ Apple ព្រោះ​តែ​ទីផ្សារ​​ស្មា​ត​ហ្វូ​ន​​​អន់​ថយ ។ Apple ក៏​​បាន​ពឹងផ្អែក​យ៉ាង​ខ្លាំង​លើ​​ក្រុមហ៊ុន​ផ្គត់ផ្គង់​នៅ​អាស៊ី​​ផង​ដែរ ។ iPhone របស់​ពួក​គេ​​បាន​ផ្គុំ​ក្នុង​ប្រទេស​ចិន ដោយ​ក្រុមហ៊ុន​តៃវ៉ាន់ Foxconn ។

បើ​ទោះជា​មាន​សេចក្តីរាយការណ៍​ថា លោក​ត្រាំ បាន​ធានា​ដល់​លោក Tim Cook ​ជានា​យក​ប្រតិបត្តិ​​របស់ Apple ថា iPhone ដែល​បាន​ផ្គុំ​នៅ​ប្រទេស​​ចិន នឹង​មិន​រង​ពន្ធ​ពី​សហរដ្ឋអាមេរិក​ក្តី ប៉ុន្តែ​​​ចិន​​នៅ​តែ​អាច​ដាក់​សម្ពាធ​លើ​ក្រុមហ៊ុន​ផ្គត់ផ្គង់​ឲ្យ Apple ដែល​អាច​បង្ក​ជា​ការ​ពន្យារ​ពេល ឬ​មាន​​បញ្ហា​ផ្សេង​ៗ​ដល់​ផលិតផល Apple ជាដើម ។​

ប្រទេស​ចិន​ក៏​អាច​ហាមឃាត់​ការ​​ប្រើ​​ប្រាស់​សេវាកម្ម​របស់​ Apple ផង​ដែរ ដែល​ធ្លាប់​កើត​មាន​ឡើង​កាលពី​ឆ្នាំ​២០១៦ ជា​ពេល​​​ចិន​បញ្ឈប់​ការ​ប្រើប្រាស់ iBook Store និង iTunes Movies ក្នុង​ប្រទេស​​របស់​ខ្លួន ។

លោក Neil Campling ​​ប្រធាន​ Mirabaud Securities បាន​និយាយ​ថា ទំនិញស្តុក​របស់ Apple កាលពី​ត្រីមាស​ទី​៤​ឆ្នាំ​មុន ស្មើ​តែ​៤,៤​ប៊ី​លាន​ដុល្លារ​ប៉ុណ្ណោះ ប៉ុន្តែ​​វា​បាន​កើនឡើង​ដល់​៧,៦​ប៊ី​លាន​ដុល្លារ​កាល​ពី​ត្រីមាស​ទី​១​​ ឆ្នាំ​នេះ ។ លោក​កត់​សម្គាល់ថា ៖« វា​ជា​សញ្ញា​បង្ហាញ​ថា Apple ​បាន​​ប្រមូល​គ្រឿង​ទូរស័ព្ទ​ទុក​សម្រាប់​ពេល​​មាន​ការ​រអាក់រអួល និង​បង្ហាញ​ថា​ក្រុម​​​ហ៊ុន​នេះ​កំពុង​​តែ​ព្រួយ​បារម្ភ » ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

បច្ចេកវិទ្យា

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ