ខេត្តកំពត ៖ តាមសេចក្តីរាយការណ៍ពីសមត្ថកិច្ចនគរបាលចរាចណ៍បានឲ្យដឹងថា មានករណីគ្រោះថ្នាក់ចរាចរណ៍មួយបានកើតឡើងកាលពីវេលាម៉ោង៧និង៤០នាទីព្រឹកថ្ងៃទី២១ ខែមិថុនា ឆ្នាំ២០១៨ លើកំណាត់ផ្លូវជាតិលេខ៣ កំពត-ភ្នំពេញ ត្រង់ចំណុចភូមិត្រសេកកោង ឃុំថ្មី ស្រុកទឹកឈូ ខេត្តកំពត រវាងម៉ូតូ២គ្រឿង និងរថយន្តមួយគ្រឿងបើកបរក្នុងទិសដៅផ្ទុយគ្នា ។
សេចក្តីរាយការឲ្យដឹងទៀតថា ក្នុងករណីគ្រោះថ្នាក់ចរាចរណ៍ខាងលើបង្កឡើងដោយរថយន្តពណ៌ស ពាក់ផ្លាកលេខ ភ្នំពេញ 2AL- 5981 (ទិសដៅពីលិចទៅកើត) អ្នកបើកបរឈ្មោះ ឈ ចាន់រត្ន័ ភេទប្រុស អាយុ៣៥ឆ្នាំ រស់នៅភូមិសំបូរ សង្កាត់ដង្កោ រាជធានីភ្នំពេញ (ក្នុងរថយន្តមានអ្នករួមដំណើរចំនួន៦នាក់ ស្រី១នាក់) រងរបួសស្រាល ។ ចំណែកអ្នកបើកបរក្រោយពីកើតហេតុបានរត់គេចខ្លួនបាត់ ។
សមត្ថកិច្ចបានបញ្ជាក់ថា ម៉ូតូទី១ម៉ាកសេ១២៥ ពណ៌ខ្មៅ ផលិតឆ្នាំ២០១០ ពាក់ផ្លាកលេខកំពត 1B- 5588 បើកបរដោយឈ្មោះ ទេព សាំង ភេទប្រុស អាយុ៧០ឆ្នាំ រស់នៅភូមិទឹកក្រហម ឃុំកណ្តោល ស្រុកទឹកឈូ ខេត្តកំពត (រងរបួសធ្ងន់) និងអ្នករួមដំណើរម្នាក់ឈ្មោះ មាស រ៉ា ភេទស្រី អាយុ៦៥ឆ្នាំ រស់នៅភូមិឃុំជាមួយគ្នាខាងលើ(របួសស្រាល) ម៉ូតូនេះបើកស្របទិសជាមួយរថយន្តក្រោយពីរថយន្តបុក ហើយម៉ូតូនេះបានរេចង្កូតទៅបុកម៉ូតូមួយគ្រឿងទៀតម៉ាកសេ១០០ ចិន ពណ៌ខ្មៅ គ្មានផ្លាកលេខដែលបើកបរក្នុងទិសដៅបញ្ជ្រាសគ្នា ហើយអ្នកបើកបរឈ្មោះ ងិន តុង ភេទប្រុស អាយុ៥៧ឆ្នាំ រស់នៅភូមិអូឡេង ឃុំព្រែករំដេង ស្រុកស្រីសន្ធរ ខេត្តកំពង់ចាម បណ្តាលឲ្យរងរបួសធ្ងន់ តែដឹកដល់មន្ទីរពេទ្យបានស្លាប់នៅក្នុងមន្ទីរពេទ្យខេត្ត អ្នករួមដំណើរម្នាក់មានឈ្មោះ ព្រី សុខលីន ភេទស្រីអាយុ៥៤ឆ្នាំ រស់នៅភូមិឃុំជាមួយជនរងគ្រោះដែលស្លាប់នេះដែរ(របួសធ្ងន់) ។
សមត្ថកិច្ចបានឲ្យដឹងទៀតថា យានយន្តទាំងបីគ្រឿង ក្រោយពីធ្វើការវាស់វែងរួច បានយករក្សាទុកនៅប៉ុស្តិ៍រដ្ឋបាលឃុំថ្មីជាបណ្តោះអាសន្ន រង់ចាំភាគីជនរងគ្រោះ និងភាគីខាងរថយន្តចូលមកដោះស្រាយគ្នាតាមផ្លូវច្បាប់នៅពេលក្រោយ ។ រីឯជនរងគ្រោះត្រូវបានដឹកទៅសង្គ្រោះនៅមន្ទីរពេទ្យបង្អែកខេត្ត ចំណែកសពត្រូវបានសាច់ញាតិដឹកទៅរៀបចំចាត់ចែងធ្វើបុណ្យតាមប្រពៃណី ។
គួររំលឹកថា នៅក្នុងខែមិថុនា ឆ្នាំ២០១៨នេះនៅទូទាំងខេត្តកំពតមានករណីគ្រោះថ្នាក់ចរាចរណ៍កើតឡើងតាំងពីដើមខែរហូតមកដល់ពាក់កណ្តាលខែ៦នេះបានកើតមានឡើងគួរឲ្យកត់សម្គាល់ ហើយករណីគ្រោះថ្នាក់ខាងលើកើតឡើងពីកត្តាមនុស្សច្រើនដូចជា បើកបរមិនគោរពសិទ្ឋអាទិភាព បើកបរក្នុងស្ថានភាពស្រវឹង និងមិនប្រកាន់ស្តាំជាដើម ៕
ចែករំលែកព័តមាននេះ