ខេត្តកំពង់ធំ ៖ ជនកំណាចម្នាក់ ត្រូវបានចាប់ខ្លួនបន្ទាប់ពីសម្លាប់ស្ត្រីជាប្រពន្ធចុង រួចយកសពទៅកប់បំបាត់ភស្តុតាងនៅក្បែរអូរក្នុងដីចម្ការកាលពី២ថ្ងៃមុន ។ ដោយសារតែមិនអាចលាក់បាំងបានពីភ្នែកអ្នកភូមិ ទីបំផុត ត្រូវបានរាយការណ៍ដល់សមត្ថកិច្ច ទើបករណីសម្លាប់យកមនុស្សទៅកប់នេះ…
ខេត្តកំពង់ធំ ៖ ជនកំណាចម្នាក់ ត្រូវបានចាប់ខ្លួនបន្ទាប់ពីសម្លាប់ស្ត្រីជាប្រពន្ធចុង រួចយកសពទៅកប់បំបាត់ភស្តុតាងនៅក្បែរអូរក្នុងដីចម្ការកាលពី២ថ្ងៃមុន ។ ដោយសារតែមិនអាចលាក់បាំងបានពីភ្នែកអ្នកភូមិ ទីបំផុត ត្រូវបានរាយការណ៍ដល់សមត្ថកិច្ច ទើបករណីសម្លាប់យកមនុស្សទៅកប់នេះ ត្រូវបានបែកការណ៍ ។ករណីខាងលើនេះ ត្រូវបានលោក អុិត សុធា ព្រះរាជអាជ្ញាអមសាលាដំបូងខេត្តលោកវរសេនីយ៍ឯក ទិត្យ សំណាង ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្ត រួមជាមួយគ្រូពេទ្យ និងអាជ្ញាធរបានរួមគ្នាគាស់ផ្នូរសពស្ត្រីរងគ្រោះ មកធ្វើការត្រួតពិនិត្យនៅព្រឹកថ្ងៃទី២០ មិថុនា នៅតំបន់អូរកូត ឃុំឈើទាល ស្រុកសណ្តាន់ ។ ពាក់ព័ន្ធករណីសម្លាប់នេះ ត្រូវបានសមត្ថកិច្ចបានឱ្យដឹងតាមការសារភាពថា ជនសង្ស័យជាឃាតករឈ្មោះ អន លិក ភេទប្រុស អាយុ៥៣ឆ្នាំ រស់នៅភូមិក្រវ៉ា ឃុំក្រវ៉ា ស្រុកបារាយណ៍ បានមកធ្វើចំការនៅតំបន់អូរកូត ភូមិលែង ឃុំទំរីង ស្រុកសណ្តាន់ ។ ដំបូង ជនជាឃាតករបានស្គាល់គ្នាជាមួយស្ត្រីរងគ្រោះ ឈ្មោះ ធា អាយុ៣៨ឆ្នាំ រស់នៅស្រុកថ្មគោល ខេត្តបាត់ដំបង តាមរយៈច្រឡំលេខទូរស័ព្ទ ក៏ឆ្លើយឆ្លងក្លាយជាចរន្តស្នេហ៍ ។
ទីបំផុត ការទាក់ទងគ្នានោះ ក៏បានក្លាយជាស្នេហាផ្អែមល្ហែមមួយ ហើយស្ត្រីរូបនេះ ក៏បានមករួមរស់ជាមួយគ្នាធ្វើដូចជាប្តីប្រពន្ធអស់រយៈពេល២ឆ្នាំមកហើយ ក្នុងខ្ទមចាំចំការ ដោយជនកំណាចនេះ និយាយកុហកថា ខ្លួនជាបុរសពោះម៉ាយរស់នៅតែម្នាក់ឯងទេ ។ ប្រភពដដែលរៀបរាប់ថា មុនថ្ងៃកើតហេតុ ស្រាប់តែប្រពន្ឋដើម បានមកដល់ចំការ ក៏បែកពាងប្រហុកទៅជារឿងភូតកុហក ទើបធ្វើឱ្យស្ត្រីរងគ្រោះជាប្រពន្ធចុងខឹង រករឿងឈ្លោះប្រកែកគ្នា និងបាននិយាយគំរាមថា នឹងសម្លាប់ខ្លួនឯង ដើម្បីឱ្យប៉ូលិសចាប់ជននេះ ដាក់គុកដោយចោទថាជាមនុស្សបោកប្រាស់បេះដូង ។ ពាក្យគំរាមជាហេតុធ្វើឱ្យបុរសរូបនេះ មានការធុញទ្រាន់នឹងសំដីរបស់ស្ត្រីរងគ្រោះដែលចេះតែជេរ និងគំរាមដដែលៗ ទើបនៅថ្ងៃទី១៨ មិថុនា ក៏បានយកខ្សែអង្រឹងមករឹត.កស្ត្រីជាប្រពន្ធចុងលួចលាក់នេះ ខណៈពេលដែលស្ត្រីនេះកំពុងតែដេក ដោយចាប់ឱ្យដេកផ្កាប់មុខ ។ 
រួចយកខ្សែអង្រឹងរឹត.ក ដោយយកជើងជាន់ចង្កេះទាញរឹត.ក រហូតដាច់ខ្យល់ស្លាប់ ។ ពេលដឹងថា ស្លាប់ហើយ ក៏រុំសពនិងភួយរួចយកខ្សែចងដៃចងជើង ទាក់.កអូសយកទៅកប់នៅក្បែរខ្ទមចំការប្រមាណជា៦០ម៉ែត្រជិតមាត់អូរ ដោយជីកដីកប់សាកសពក្នុងជំរៅជិតមួយម៉ែត្រ រួចកាប់ដីលុបឱ្យស្មើនិងដាក់មែកឈើចាស់និងថ្មីពីលើដើម្បីបំបាត់ភស្តុតាង ។ លោក អុិត សុធា ព្រះរាជអាជ្ញាអមសាលាដំបូងខេត្តបានឱ្យដឹងថា នៅថ្ងៃកើតហេតុខាងលើ មានប្រជាពលរដ្ឋបានឃើញជនសង្ស័យជាឃាតករអូសសាកសពពីខ្ទម មកកប់កាលពីថ្ងៃទី១៨ ខែមិថុនា ហើយក៏បានរាយការណ៍មកអធិការដ្ឋាននគរបាលស្រុក និងបានសុំយោបល់ពីលោក ហើយលោកបានបញ្ជាឱ្យសមត្ថកិច្ចចុះពិនិត្យទីតាំងសង្ស័យកប់សាកសព ហើយឱ្យឃាត់ខ្លួនជនសង្ស័យតែម្តង ។
ជនរូបនេះបាននិយាយបែបដោះសារក្នុងគ្រាដំបូងថា ប្រពន្ឋរបស់ខ្លួននេះបានចង.កសម្លាប់ខ្លួន ហើយខ្លាចអ្នកភូមិមិនជឿ ក៏បានយកសាកសពទៅកប់ចោលទៅ ។ ក្រោយពីគាស់រណ្តៅកប់សពពិនិត្យរួច លទ្ធផលបានបង្ហាញថា គឺជាករណីឃាតកម្ម ដោយគិតទុកជាមុនទៅលើជនរងគ្រោះមិនមែនជាការចង.កសម្លាប់ខ្លួនទេ គឺមុនសម្លាប់មានការវាយដំបែកមុខបែកមាត់និងរឹត.ក ។ លោកថា ដោយជនរងគ្រោះពុំមានសាច់ញាតិបងប្អូនលោកក៏បានឱ្យតាអាចារ្យ និងប្រជាពលរដ្ឋរួមគ្នាយកសពទៅបូជា ដោយលោកជាអ្នកចេញថវិកា ហើយលោកនិងឱ្យមន្ត្រីជំនាញស្រាវជ្រាវរកបងប្អូនមកទទួលយកធាតុជនរងគ្រោះយកទៅធ្វើបុណ្យតាមប្រពៃណីជាក្រោយ ។ អ្នកច្បាប់ថា តាមផ្លូវច្បាប់ការសម្លាប់ដោយចេតនានេះប្រឈមនិងទោសធ្ងន់ធ្ងរតាមក្រមព្រហ្មទណ្ឌ ៕ 
ចែករំលែកព័តមាននេះ