រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីល្ងាចថ្ងៃទី២១ មិថុនា ២០១៨ បានសម្រេចចេញដីកាឃុំខ្លួនស្ត្រីជនជាតិចិនម្នាក់ និងខ្មែរម្នាក់ដាក់ពន្ធនាគារជាបណ្តោះអាសន្នពាក់ព័ន្ធករណីជួញដូរគ្រឿងញៀនប្រមាណជិត៣គីឡូក្រាម ដែលផ្ញើមកពីប្រទេហូឡង់ដោយខុសច្បាប់ ។
ជនសង្ស័យម្នាក់ឈ្មោះ Huang xue fang ភេទស្រី ជនជាតិចិន អាយុ៣៩ឆ្នាំ ត្រូវបានចាប់ខ្លួននៅព្រំដែនខ្មែរ-ថៃ ខេត្តបន្ទាយមានជ័យ កាលពីថ្ងៃទី១៨ មិថុនា ២០១៨ ជាមួយនឹងគ្រឿងញៀនកូកាអ៊ីន២គីឡូក្រាម ។
តាមចម្លើយសារភាពរបស់ជនសង្ស័យ គឺគ្រឿងញៀននេះបាននាំចេញមកពីប្រទេសហូឡង់ គឺខ្លួនគ្រាន់តែស៊ីឈ្នួលដឹកជញ្ជូនចូលមកកម្ពុជាប៉ុណ្ណោះ ។ ជនសង្ស័យម្នាក់ទៀតឈ្មោះ ស សុគន្ធា ភេទស្រី អាយុ៣៦ឆ្នាំ ជនជាតិខ្មែ រស់នៅផ្ទះលេខ២៨៣ ផ្លូវលេខ៩០៦ សង្កាត់បឹងកក់ ខណ្ឌទួលគោក ។ ឈ្មោះ ស សុគន្ធា ត្រូវបានសមត្តកិច្ចចាប់ខ្លួន កាលពីថ្ងៃទី១៨ មិថុនា ២០១៨ នៅមុខប្រៃសណីយ៍ ទូរគមនាគមន៍កម្ពុជា និងរឹបអូសវត្ថុតាងគ្រឿងញៀនទម្ងន់១គីឡូក្រាម ដែលគេផ្ញើមកពីប្រទេសហូឡង់ ហើយត្រូវបានកម្លាំងសមត្ថកិច្ចនគរបាលនាយកដ្ឋានសន្តិសុខផ្ទៃក្នុងចាប់ខ្លួន ។
ក្រោយពីសាកសួរចប់សព្វគ្រប់ហើយ តំណាងអយ្យការអមសាលាដំបូងរាជធានីភ្នំពេញបានធ្វើចោទប្រកាន់ជាផ្លូវការណ៍ក្រោមបទជួញដូរគ្រឿងញៀនឆ្លងដែនដោយខុសច្បាប់ និងបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនជនសង្ស័យទាំង២នាក់ដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ