ខេត្តកណ្តាល ៖ សម្តេចតេជោនាយករដ្ឋមន្ត្រី ហ៊ុន សែន បានថ្លែងថា ចាប់ពីឆ្នាំ២០១៩ទៅប្រាក់ខែមន្ត្រីរាជការមិនតិចជាង១លានរៀលឡើយ ហើយរាជរដ្ឋាភិបាលក៏បានខិតខំធ្វើការកំណែទម្រង់ទាំងថ្នាក់ក្រោម និងថ្នាក់លើ ទាក់ទងទៅនឹងបញ្ហាសំខាន់ៗ…
ខេត្តកណ្តាល ៖ សម្តេចតេជោនាយករដ្ឋមន្ត្រី ហ៊ុន សែន បានថ្លែងថា ចាប់ពីឆ្នាំ២០១៩ទៅប្រាក់ខែមន្ត្រីរាជការមិនតិចជាង១លានរៀលឡើយ ហើយរាជរដ្ឋាភិបាលក៏បានខិតខំធ្វើការកំណែទម្រង់ទាំងថ្នាក់ក្រោម និងថ្នាក់លើ ទាក់ទងទៅនឹងបញ្ហាសំខាន់ៗ ។ ក្រោយពីបានអញ្ជើញកាត់ខ្សែបូសម្ពោធដាក់ឱ្យប្រើប្រាស់នូវសមិទ្ធផលនានានៅបញ្ជាការដ្ឋានអង្គរក្ស នាព្រឹកថ្ងៃទី២១ ខែមិថុនា សម្តេចតេជោនាយករដ្ឋមន្ត្រី ក៏បានអញ្ជើញជួបសំណេះសំណាលសួរសុខទុក្ខបងប្អូនប្រជាពលរដ្ឋ ដែលជាសមាជិកសមាជិកាគណបក្សប្រជាជនកម្ពុជាចំនួន៣.១៦៧នាក់ផងដែរ ។
យោងតាមបណ្តាញសង្គម សម្តេចតេជោនាយករដ្ឋមន្ត្រី បានលើកឡើងថា បច្ចុប្បន្នរាជរដ្ឋាភិបាលកម្ពុជាបានខិតខំលើការធ្វើកំណែទម្រង់បញ្ហាសំខាន់ជាច្រើន ដើម្បីឱ្យការរស់នៅរបស់ប្រជាពលរដ្ឋកម្ពុជាយើងកាន់តែសុខស្រួល និងមានជីវភាពល្អប្រសើរ ដូចជាថ្មីៗនេះរាជរដ្ឋាភិបាលបានធ្វើការដំឡើងប្រាក់ខែដល់មន្ត្រីរាជការជាបន្តបន្ទាប់ ។ សម្តេចបញ្ជាក់ថា «ចាប់ពីឆ្នាំ២០១៩ទៅប្រាក់ខែមន្ត្រីរាជការមិនតិចជាង១លានរៀលនោះទេ ។ ស្របពេលជាមួយគ្នានេះ រាជរដ្ឋាភិបាលក៏បានខិតខំធ្វើកំណែទម្រង់ទាំងថ្នាក់ក្រោមនិងថ្នាក់លើ ទាក់ទងទៅនឹងបញ្ហាសំខាន់ៗមួយចំនួនទៀតដូចជា ប្រព័ន្ធហិញ្ញវត្ថុ កំណែទម្រង់សេវាសាធារណៈ និងកំណែទម្រង់លើវិស័យផ្សេងៗជាច្រើនទៀត» ។ លើសពីនេះទៀត សម្ដេចតេជោបានសង្កត់ធ្ងន់ ចំពោះសមាជិកសមាជិកាគណបក្សប្រជាជនកម្ពុជាទាំងអស់ត្រូវយកចិត្តទុកដាក់បម្រើប្រជាពលរដ្ឋឱ្យបានល្អ ត្រូវដោះស្រាយបញ្ហាប្រឈមនានាដែលកើតមានឱ្យបានលឿន និងមានប្រសិទ្ធភាព ។
សម្តេចតេជោ ហ៊ុន សែន បានថ្លែអំណរគុណយ៉ាងជ្រាលជ្រៅចំពោះសមាជិកសមាជិកា គណបក្សប្រជាជនកម្ពុជាទាំងអស់ ដែលកន្លងមកតែងតែគោរពស្រឡាញ់សម្តេច និងតែងតែបោះឆ្នោតជូនគណបក្សប្រជាជនកម្ពុជាជាបន្តបន្ទាប់រហូតមក ។ សម្តេចតេជោ ក៏បានជូនពរដល់សមាជិក សមាជិកាបក្សទាំងអស់ សូមជួបតែសេចក្តីសុខ សេចក្តីចម្រើនគ្រប់ៗគ្នា ដើម្បីធានានូវសន្តិភាព និងនិរន្តរភាពនៃការអភិវឌ្ឍ ។ សូមបងប្អូនបន្តបោះឆ្នោតជូនគណបក្សប្រជាជនកម្ពុជា ដែលមានលេខរៀងទី២០ នៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ។
សូមជម្រាបថា សមិទ្ធផលនានាដែលត្រូវបានសម្ពោធឱ្យប្រើប្រាស់នាពេលនោះរួមមានអគារបញ្ជាការដ្ឋានអង្គរក្ស អគារការិយាល័យទទួលភ្ញៀវ សម្រាប់ការស្នាក់នៅ បំពេញការងាររបស់នាយទាហាន នាយទាហានរង ពលទាហានរួមនឹងមធ្យោបាយសម្ភារផ្សេងៗជាច្រើនទៀត ដោយចំណាយទឹកប្រាក់ជាង៤លានដុល្លាអាមេរិក ដែលបានមកពីការជួយឧបត្ថម្ភពីសប្បុរសជននានាទាំងក្នុងនិងក្រៅប្រទេស សម្រាប់បំពេញបេសកកម្មការពារជាតិ ការពារប្រមុខដឹកនាំ សុខសន្តិភាពនៅក្នុងសង្គម ។ ទីតាំងអគារបញ្ជាការដ្ឋានអង្គរក្សនេះ ជាអតីតតំបន់បឹងដែលប្រឈមនឹងការបាក់ស្រុត ដូច្នេះហើយក្នុងឆ្នាំ២០១៨នេះ សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន បានអនុញ្ញាតឱ្យធ្វើការសាងសង់ទីតាំងនេះឡើងវិញ ដើម្បីបំពេញតម្រូវការតាមសំណូមពររបស់បងប្អូនកងកម្លាំងនៅក្នុងបញ្ជាការដ្ឋានអង្គរក្ស ដើម្បីទទួលបានអគារស្នាក់នៅ និងការិយាល័យធ្វើការ បានល្អប្រសើរ ព្រមទាំងមានសម្ភារយោធាគ្រប់គ្រាន់ក្នុងការបំពេញបេសកកម្មការពារជាតិមាតុភូមិ ៕
ចែករំលែកព័តមាននេះ