អំឡុងព្រឹត្តិការណ៍ World Cup បាននិងកំពុងដំណើរការនៅប្រទេសរុស្ស៊ីនាខែមិថុនានេះ អ្នកគាំទ្រក្រុមជម្រើសជាតិផ្សេងៗសម្រុកទៅចូលរួមយ៉ាងសស្រាក់សស្រាំដែលវាជាឱកាសដ៏ល្អមួយសម្រាប់នារីជនជាតិរុស្ស៊ីក្នុងការបង្កើតចំណងស្នេហាជាមួយជនបរទេស ។
ទាក់ទិនទៅនឹងបរិបទនេះអ្នកនាំពាក្យប្រធានាធិបតីវ្លាឌីមៀរពូទីន លោក Dmitry Peskov បាននិយាយថា «ស្រ្តីរុស្ស៊ីអាចស្វែងរកដៃគូជីវិតដោយខ្លួនឯងបាន ។ ពួកគេគឺជាស្រ្តីដ៏អស្ចារ្យនៅលើពិភពលោក» ។
ពាក់អាវយឺតពណ៌សជាមួយនឹងសំពត់ខើតខ្លីអមដោយកម្រងផ្កាចម្រុះពាក់លើសក់ផងនោះ កញ្ញា Maria S. អាយុ២៥ឆ្នាំ ជនជាតិរុស្ស៊ី បានរៀបរាប់ទាំងទឹកមុខញញឹមបែបអឹមអៀនថា នាងបានរង់ចាំព្រឹត្តិការណ៍ World Cup នេះច្រើនខែមកហើយ ព្រោះវាជាឱកាសដ៏ល្អមួយដែលអាចឱ្យនាងស្វែងរកដៃគូជាជនបរទេស ។
ជាមួយគ្នានេះដែរមិត្តភក្តិរបស់នាងម្នាក់ទៀតដែលអាចនិយាយបាន៣ភាសានាង Lyubov បាននិយាយថា «ជាធម្មតាខ្ញុំមានណាត់២ដងក្នុងមួយសប្តាហ៍ ហើយមកទល់ពេលនេះ ខ្ញុំបានណាត់ជួប៤នាក់ហើយ ប៉ុន្តែក្នុងចំណោមនេះក៏ខ្ញុំបានបដិសេធខ្លះហើយដែរ» ។
គួរបញ្ជាក់ថា តំបន់ «Fan Zone» ដែលអ្នកគាំទ្រជាច្រើនជាតិសាសន៍តែងតែមកចូលរួមទស្សនាកម្សាន្តការប្រកួត World Cup នៅទីក្រុងមូស្គូនេះបានក្លាយជាទីតាំងមួយសម្រាប់យុវ័យបង្កើត និងបង្កាត់ភ្លើងស្នេហ៍យ៉ាងមានក្តីសុខ ៕
ចែករំលែកព័តមាននេះ