រាជធានីភ្នំពេញ ៖ គូស្នេហ៍ស្រស់សោភាមួយគូជិះម៉ូតូមួយគ្រឿងបើកបរក្នុងល្បឿនយ៉ាងលឿនជ្រុលទៅបុកគូទរថយន្តមួយគ្រឿងបណ្តាលឱ្យរងការខូចខាត ដោយសារដោះស្រាយមិនត្រូវគ្នា ភាគីខាងបុរសបានជិះម៉ូតូគេចខ្លួនបាត់ បន្សល់ទុកនារីជាសង្សារអោយសងសំណងជំនួស ហេតុការណ៍នេះបានកើតឡើងកាលពីវេលាម៉ោង១០និង១០នាទីយប់ថ្ងៃទី២០ ខែមិថុនា ឆ្នាំ២០១៨ ត្រង់ចំណុចស្តុបផ្សារដីហុយ…
រាជធានីភ្នំពេញ ៖ គូស្នេហ៍ស្រស់សោភាមួយគូជិះម៉ូតូមួយគ្រឿងបើកបរក្នុងល្បឿនយ៉ាងលឿនជ្រុលទៅបុកគូទរថយន្តមួយគ្រឿងបណ្តាលឱ្យរងការខូចខាត ដោយសារដោះស្រាយមិនត្រូវគ្នា ភាគីខាងបុរសបានជិះម៉ូតូគេចខ្លួនបាត់ បន្សល់ទុកនារីជាសង្សារអោយសងសំណងជំនួស ហេតុការណ៍នេះបានកើតឡើងកាលពីវេលាម៉ោង១០និង១០នាទីយប់ថ្ងៃទី២០ ខែមិថុនា ឆ្នាំ២០១៨ ត្រង់ចំណុចស្តុបផ្សារដីហុយ តាមបណ្តោយផ្លូវ១៩៨៦កែងនឹងផ្លូវហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញបុរសម្នាក់បើករថយន្តមួយគ្រឿង ម៉ាកហាយឡែនឌ័រ ពណ៌ស្ករ ពាក់ស្លាកលេខ ភ្នំពេញ ២V-៦០៨៤ ធ្វើដំណើរតាមបណ្តោយផ្លូវ១៩៨៦ ក្នុងទិសដៅពីកើតទៅលិច លុះមកដល់ចំណុចកើតហេតុ រថយន្តខាងលើបម្រុងបត់ឆ្វេងទៅផ្លូវហាណូយ ពេលនោះស្រាប់តែមានម៉ូតូមួយគ្រឿងម៉ាកឌូកាទី ពណ៌ក្រហម គ្មានស្លាកលេខ ជិះ២នាក់សង្សារ បើកមកពីក្រោយរថយន្តក្នុងល្បឿនយ៉ាងលឿន រួចក៏ជ្រុលទៅបុកគូទរថយន្តខាងលើចំពីក្រោយចំហៀងខាងឆ្វេងពេញទំហឹង បណ្តាលឲ្យក្រពឹតកាង និងបែកស្តុប តែមិនបង្កឲ្យមានអ្នករងរបួសនោះទេ។
បន្ទាប់មកភាគីទាំងពីរបានចរចាគ្នា ដោយភាគីខាងរថយន្តបានទាមទារសំណងចំនួន១០០ដុល្លារពីភាគីខាងម៉ូតូ តែភាគីខាងម៉ូតូព្រមសងតែ៥០ដុល្លារ ហើយការដោះស្រាយមិនត្រូវគ្នា មួយស្ទុះក្រោយមកបុរសដែលជាអ្នកបើកបរម៉ូតូបានសុំសងសំណងទៅភាគីខាងរថយន្តចំនួន៦០ដុល្លារដើម្បីបញ្ចប់រឿង តែភាគីខាងរថយន្តមិនព្រមទទួលយកក្នុងតម្លៃ៦០ដុល្លារនោះទេ។ ភ្លាមនោះបុរសជាអ្នកបើកបរម៉ូតូបានជិះម៉ូតូគេចខ្លួនបាត់ស្រមោល បន្សល់ទុកនារីម្នាក់ដែលជាសង្សារនៅនឹងកន្លែងកើតហេតុ។
ក្រោយពេលកើតហេតុ នារីដែលជាសង្សារនឹងបុរសជាអ្នកបើកបរម៉ូតូខាងលើបំរុងនឹងជិះម៉ូតូ
ឌុបចេញពីកន្លែងកើតហេតុ តែត្រូវអ្នកបើកបររថយន្តឃាត់មិនអោយទៅ ក៏បង្កអោយមានការឈ្លោះប្រកែកគ្នាតឹងសរសៃក មួយស្ទុះក្រោយមកនារីដែលជាសង្សារនឹងបុរសជាអ្នកបើកបរម៉ូតូខាងលើព្រមចេញសំណងចំនួន៥០ដុល្លារឲ្យទៅភាគីខាងរថយន្ត ហើយភាគីខាងរថយន្តមិនចង់មានរឿងវែងឆ្ងាយក៏ព្រមទទួលយកសំណងនោះដើម្បីបញ្ចប់រឿងនៅនឹងកន្លែងកើតហេតុ៕
ចែករំលែកព័តមាននេះ