ខេត្តកំពង់ធំ ៖ ក្មេងប្រុសម្នាក់គបានលង់ទឹកស្រះស្លាប់បង្កឲ្យមានការភ្ញាក់ផ្អើលកើតឡើងកាលពីព្រឹកថ្ងៃទី២០ មិថុនា ឆ្នាំ២០១៨ ស្ថិតនៅក្នុងភូមិល្វាជោម ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
សមត្ថកិច្ចនគរបាលបានឲ្យដឹងថា សពជនរងគ្រោះឈ្មោះ ថង ចាន់ធី ភេទប្រុស អាយុ១៧ឆ្នាំ ជនជាតិខ្មែរ ជាជនវិកលចរិត ហើយគ រស់នៅជាមួយឪពុកម្តាយ នៅភូមិឃុំកើតហេតុខាងលើ ។
បើយោងតាមការបំភ្លឺពីម្តាយសពបានឲ្យដឹងថា ជនរងគ្រោះជាកូនប្រុសរបស់គាត់ជាមនុស្សមានសតិមិនគ្រប់ ហើយ(គ)ទៀតផង តែបានជាកូនមកហើយនោះ ទោះជាគ្នាមានលក្ខណៈជាមនុស្សយ៉ាងនេះក៏ដោយក៏ទឹកចិត្ត និងព្រហ្មវិហារធម៌ជាឪពុកម្តាយនៅតែស្រលាញ់បីបាច់ថែរក្សាដែរ កន្លងមកកូនគាត់ចេះតែដើរស្រាតចេញបាត់ៗពីផ្ទះ ដោយពិបាកក្នុងការដើរតាមរកពេក ម្តាយឪពុកក៏បានយកខ្សែចងកូនទុកនៅលើផ្ទះនៅពេលដែលពួកគាត់មិននៅផ្ទះ ពេលដែលឪពុកម្តាយចងវាម្តងៗទោះជាចង និងអ្វីក៏ដោយក៏វាមិនចេះស្រាយដែរ លុះនៅមុនពេលកើតហេតុពួកគាត់នៅផ្ទះមិនបានចងកូនទេ ក្រោយពីហូបបាយល្ងាចរួចគាត់ក៏នាំគ្នាសម្រាក ដល់ម៉ោងប្រហែលជា២រំលងអធ្រាត្រយប់ថ្ងៃទី២០ មិថុនា ២០១៨ ពេលគាត់ភ្ញាក់ពីដេករកមើលកូនមើលមិនឃើញក៏នាំគ្នាដើររកទាំងយប់ តែរកមិនឃើញលុះព្រឹកឡើងទើបរកសពឃើញនៅក្នុងស្រះទឹកស្លាប់បាត់ទៅហើយ ។
បន្ទាប់ពីទទួលព័ត៌មានកម្លាំងប៉ុស្តិ៍នគរបាលត្រពាំងឬស្សីព្រមទាំងរដ្ឋអំណាចមូលដ្ឋានបានចូលរួមពិនិត្យសពមិនឃើញមានស្លាកស្នាមអ្វីឡើយទើបសន្និដ្ឋានថា ជនរងគ្រោះពិតជាស្លាប់ដោយលង់ទឹកស្រះពិតមែនក៏ប្រគល់ឱ្យក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ