រាជធានីភ្នំពេញ ៖ ជនសង្ស័យ៦នាក់ត្រូវបានសមត្ថកិច្ចឃាត់ខ្លួនយកទៅសាកសួរ បន្ទាប់ពីត្រូវមេជាងចោទប្រកាន់ថា លួចចម្លងសោលួចយកប្លាទីនទឹក៥អស់ចំនួន២តម្លឹងបង្កឲ្យមានការភ្ញាក់ផ្អើល កាលពីវេលាម៉ោង៩និង៣០នាទីយប់ថ្ងៃទី២០ ខែមិថុនា ឆ្នាំ២០១៨ នៅបន្ទប់ជួលកន្លែងធ្វើប្លាទីន ស្ថិតនៅភូមិថ្មគោល២…
រាជធានីភ្នំពេញ ៖ ជនសង្ស័យ៦នាក់ត្រូវបានសមត្ថកិច្ចឃាត់ខ្លួនយកទៅសាកសួរ បន្ទាប់ពីត្រូវមេជាងចោទប្រកាន់ថា លួចចម្លងសោលួចយកប្លាទីនទឹក៥អស់ចំនួន២តម្លឹងបង្កឲ្យមានការភ្ញាក់ផ្អើល កាលពីវេលាម៉ោង៩និង៣០នាទីយប់ថ្ងៃទី២០ ខែមិថុនា ឆ្នាំ២០១៨ នៅបន្ទប់ជួលកន្លែងធ្វើប្លាទីន ស្ថិតនៅភូមិថ្មគោល២ សង្កាត់ចោមចៅ២ ខណ្ឌពោធិ៍សែនជ័យ ។
ជនរងគ្រោះមានឈ្មោះ មៅ វណ្ណៈ ភេទប្រុស អាយុ២២ឆ្នាំ មុខរបរមេជាងទង ស្នាក់នៅបន្ទប់ជួលជិតកន្លែងធ្វើប្លាទីន មានស្រុកកំណើតនៅភូមិតាយា ឃុំធ្លក ស្រុកស្វាយជ្រុំ ខេត្តស្វាយរៀង ។
ចំណែកជនសង្ស័យទាំង៦នាក់រួមមានទី១- ឈ្មោះ អិច មករា ភេទប្រុស អាយុ២០ឆ្នាំ មុខរបរកូនជាងប្លាទីន ស្នាក់នៅបន្ទប់ជួលជិតកន្លែងកើតហេតុ មានស្រុកកំណើតនៅភូមិតាយាឃុំធ្លកស្រុក ស្វាយជ្រំ ខេត្តស្វាយរៀង ។ ទី២ – ឈ្មោះ យឹម ផល្លី ភេទប្រុស អាយុ២៤ឆ្នាំ មុខរបរកូនជាងប្លាទីន ស្នាក់នៅជាមួយគ្នាផ្ទះជួលខាងលើ មានស្រុកកំណើតនៅភូមិ ជ្រកស្គរ ឃុំស្វាយចេក ស្រុករំដួល ខេត្តស្វាយរៀង ។ ទី៣- ជាមិត្តភក្តិជនរងគ្រោះឈ្មោះ ណេត សុវណ្ណ ភេទប្រុស អាយុ២២ឆ្នាំ មុខរបរជាងប្លាទីន ស្នាក់នៅបុរីសន្តិភាព២ សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតនៅភូមិសំដី ឃុំធ្លក ស្រុកស្វាយជ្រំ ខេត្តស្វាយរៀង ។ ទី៤- ឈ្មោះ សេក រតនៈ ភេទប្រុស អាយុ១៩ឆ្នាំ មុខរបរជាងជួសជុលម៉ាស៊ីនដេរ ស្នាក់នៅសង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅភូមិធ្លក ឃុំធ្លក ស្រុកស្វាយជ្រំ ខេត្តស្វាយរៀង ។ ទី៥- ឈ្មោះ សង វិចិត្រ ភេទប្រុស អាយុ២១ឆ្នាំ មុខរបរជាងប្លាទីន ស្នាក់នៅក្រុងតាខ្មៅ ខេត្តកណ្ដាល និងទី៦-ឈ្មោះ អៀង ស៊ីណាត ភេទប្រុស អាយុ២៨ឆ្នាំ មុខរបរជាងប្លាទីន ស្នាក់នៅក្រុងតាខ្មៅ ខេត្តកណ្ដាល មានស្រុកកំណើតនៅស្រុកមេសាង ខេត្តព្រៃវែង ។
តាមប្រភពព័ត៌មានពីជនរងគ្រោះជាមេជាងធ្វើប្លាទីនបានឲ្យដឹងថា រូបគាត់ត្រូវជនសង្ស័យដែលសុទ្ធសឹងជាកូនជាង និងមិត្តភក្តិរបស់កូនជាងគាត់ដែលនៅស្រុកកំណើតជាមួយគ្នាទៀតផងបានលួចចម្លងសោទូលួចយកប្លាទីនទឹក៥ អស់ចំនួន២តម្លឹង នៅក្នុងបន្ទប់ធ្វើប្លាទីន ខណៈពេលរូបគាត់ទុកប្លាទីននៅក្នុងបន្ទប់ ហើយជនសង្ស័យចាក់សោចូលលួចប្លាទីននៅក្នុងបន្ទប់យកសោទៅចាក់បន្ទប់គាត់ពីក្រៅថែមទៀត ។
ប្រភពពីជនរងគ្រោះបានបញ្ជាក់ទៀតថា នៅវេលាម៉ោង១រសៀលថ្ងៃទី២០ ដដែលរូបគាត់ បានទៅយកប្លាទីនដើមនៅឯខេត្តកំពង់ស្ពឺ ដើម្បីយកមកធ្វើ ហើយនៅវេលាម៉ោង៤ល្ងាច គាត់បានមកដល់បន្ទាប់មកយកប្លាទីនដែលឆ្នៃហើយទៅឲ្យម៉ូយនៅផ្សារជម្ពូវ័ន ។ លុះនៅវេលាម៉ោង៧យប់ គាត់បានឃើញកូនជាងគាត់២នាក់ និងមិត្តភក្តិរបស់កូនជាង៤នាក់ទៀត ដែលក្នុងនោះមានមិត្តភក្តិគាត់ម្នាក់ដែរ ផឹកស៊ី នៅបន្ទប់កូនជាង២នាក់ខាងលើ ហើយបន្ទាប់មកគាត់បានយកផ្លាកទីនទៅទុកក្នុងបន្ទប់ធ្វើផ្លាកទីន ហើយគាត់បានចូលទៅសម្រាកលុះ0នៅវេលាម៉ោងកើតហេតុគាត់បានទៅមើលប្លាទីនគាត់ដែលទុក មុននឹងចូលដេក ហើយពេលបើកទ្វារបន្ទប់របស់គាត់ត្រូវគេចាក់សោពីខាងក្រៅ បន្ទាប់មកគាត់បានហៅឲ្យគេជួយពេលនោះ គាត់បានមកមើលបន្ទប់ធ្វើប្លាទីនឃើញទ្វារចំហរ ហើយត្រូវជនសង្ស័យយកប្លាទីនដើមបាត់អស់ នៅពេលនោះកូនជាងគាត់នឹងមិត្តភក្តិខាងលើចេញទៅក្រៅអស់ ទើបគាត់សង្ស័យ បន្ទាប់មកទៀតគាត់បានទូរស័ព្ទហៅកូនជាងរបស់គាត់និងមិត្តភក្ដិខាងលើឲ្យមកបន្ទប់វិញ ហើយប្តឹងសមត្ថកិច្ចតែម្តង ។
ក្រោយពេលកើតហេតុសមត្ថកិច្ចនគរបាលប៉ុស្តិ៍ចោមចៅ២ បាននាំជនសង្ស័យខាងលើយកទៅសាកសួរ តែជនសង្ស័យខាងលើបានបដិសេធថា ពួកគាត់មិនបានយកប្លាទីននោះឡើយទោះបីជាយ៉ាងណា សមត្ថកិច្ចកំពុងសាកសួរបន្តទៀត ដើម្បីចាត់ការតាមច្បាប់ ៕
ចែករំលែកព័តមាននេះ