ខេត្តកំពង់ឆ្នាំង ៖ ថ្មីៗនេះអាជ្ញាធរក្រុង និងខេត្តកំពង់ឆ្នាំងបានចេញសេចក្តីជូនដំណឹងដល់ប្រជាពលរដ្ឋ និងស្ថាប័នរដ្ឋ ស្ថាបន័ឯកជន ដែលរស់នៅតាមដងផ្លូវជាតិ និងផ្លូវកៅស៊ូក្នុងក្រុងកំពង់ឆ្នាំង ទាំងអស់ត្រូវសហការជាមួយអាជ្ញាធរក្រុងកំពង់ឆ្នាំង រៀបចំដាក់ការ៉ូឡាតាមចិញ្ចើមផ្លូវមុខផ្ទះ…
ខេត្តកំពង់ឆ្នាំង ៖ ថ្មីៗនេះអាជ្ញាធរក្រុង និងខេត្តកំពង់ឆ្នាំងបានចេញសេចក្តីជូនដំណឹងដល់ប្រជាពលរដ្ឋ និងស្ថាប័នរដ្ឋ ស្ថាបន័ឯកជន ដែលរស់នៅតាមដងផ្លូវជាតិ និងផ្លូវកៅស៊ូក្នុងក្រុងកំពង់ឆ្នាំង ទាំងអស់ត្រូវសហការជាមួយអាជ្ញាធរក្រុងកំពង់ឆ្នាំង រៀបចំដាក់ការ៉ូឡាតាមចិញ្ចើមផ្លូវមុខផ្ទះ មុខស្ថាប័នរដ្ឋ និងឯកជន របស់ខ្លួនឲ្យបានល្អស្អាត ដើម្បីស្វាគមន៍ការទទួលធ្វើបុណ្យទន្លេ របស់ខេត្តកំពង់ឆ្នាំង នៅក្នុងខែមិនា ឆ្នាំ២០១៩ ខាងមុខនេះ។ សេចក្តីអំពាវនាវនេះត្រូវបានប្រជាពលរដ្ឋ ស្ម័គ្រចិត្តចូលរួម ធ្វើឲ្យអាជ្ញាធរក្រុងកំពង់ឆ្នាំង មានសេចក្តីសាទរ និងថ្លែងអំណរគុណ ទាំងប្រជាពលរដ្ឋ ទាំងស្ថាប័នរដ្ឋ និងឯកជន។ លោក យិន សាវ៉េន អភិបាលក្រុងកំពង់ឆ្នាំង បានប្រាប់ឲ្យដឹងថា៖ ផែនការរៀបចំការ៉ូឡាតាមចិញ្ចើមផ្លូវនេះ លោកអភិបាលខេត្តបានប្រជុំផ្សព្វផ្សាយជាមួយ លោកប្រធានមន្ទីរអង្គភាពជុំវិញខេត្តរួចហើយ ដោយឡែកចៅសង្កាត់ទាំង៤ ក្នុងក្នុងក្រុងកំពង់ឆ្នាំង លោកក៏បានចេញសេចក្តីជូនដំណឹងជម្រាបជូនរួចហើយដែរ។
លោកបានបន្តថា តម្លៃរៀបការ៉ូឡា ក្នុង១ម៉ែត្រការ៉េ ថ្លៃ១៧ដុល្លារ ជាគោលការណ៍ក្នុងផែនការនេះគឺចំពោះស្ថាប័នរដ្ឋ ត្រូវចេញប្រាក់រៀបចំការ៉ូការ៉ូឡា ក្នុងតម្លៃ១ម៉ែត្រការ៉េ ថ្លៃ១៧ដុល្លារ។ ចំណែកស្ថាប័នឯកជន និងមុខផ្ទះប្រជាពលរដ្ឋ គឺត្រូវចេញថ្លៃបដិភាគក្នុង១ម៉ែត្រការ៉េ ៧ដុល្លារ សល់១០ដុល្លារ ខាងសាលាខេត្តជាអ្នកចេញជំនួស។ ចំពោះជំហានដំបូងនេះ អាជ្ញាធរក្រុងបាន និងកំពុងរៀបចំ ធ្វើការ៉ូឡាតាមចិញ្ចើមផ្លូវជាតិលេខ៥ ពីព្រំប្រទល់ក្រុងដំរីស ដល់ផ្ទះសំណាក់ផ្កាយព្រឹក ដែលពេលនេះ ជាងកំពុងរៀបចំធ្វើជាបណ្តើរហើយ ដោយមានប្រជាពលរដ្ឋយល់ព្រម និងផ្តិតមេដៃ ទទួលចេញថ្លៃតាមទំហំដីមុខផ្ទះរបស់ខ្លួនរួចអស់ហើយ។ ក្នុងនាមរូបលោកជាអាជ្ញាធរក្រុងកំពង់ឆ្នាំង សូមថ្លែងអំណរគុណយ៉ាងជ្រាលជ្រៅចំពោះកិច្ចសហការ ដើម្បីសោភ័ណភាពក្រុងកំពង់ឆ្នាំង ក្នុងការត្រៀមទទួលរៀបពិធីបុណ្យទន្លេក្នុងពេលខាងមុខនេះ។
ជាមួយគ្នានេះដែរ អាជ្ញាធរក្រុងកំពង់ឆ្នាំង បានកំពុងជំរុញឲ្យចៅសង្កាត់៣ទៀតមានសង្កាត់ផ្សារឆ្នាំង សង្កាត់ខ្សាម និងសង្កាត់ប្អេរ ចុះទំនាក់ទំនង និងអំពាវនាវជាមួយប្រជាពលរដ្ឋក្នុងមូលដ្ឋានរបស់ខ្លួន ក្នុងការទទួលយកការចេញថ្លៃបដិភាគតាមមុខផ្ទះ របស់ខ្លួន ដូចនៅសង្កាត់កំពង់ឆ្នាំង ដែលកំពង់ដំណើរការរៀបការ៉ូឡា ពីដំរីសដល់ផ្ទះសំណាក់ផ្កាយព្រឹក នេះផងដែរ។ សូមបញ្ជាក់ថា ផ្លូវក្នុងសង្កាត់ទាំង៣ខាងលើមានពីចំណុចស្ពានថ្ម ផ្សារលើ ដល់ដើមពោធិ៍ផ្សារក្រោម ស្ថិតក្នុងសង្កាត់ផ្សារឆ្នាំង តាមបណ្តោយផ្លូវជាតិ ពីមុខវត្តខ្សាម ដល់ស្ថានីយប្រេងតូតាល់ ស្ថិតក្នុងសង្កាត់ខ្សាម និងពីចំណុចឃ្លាំងប្រាក់ ដល់ចុងភូមិប្អេរ ស្ថិតកក្នុងសង្កាត់ប្អេរ៕ 
ចែករំលែកព័តមាននេះ