រាជធានីភ្នំពេញ ៖ ក្រុមជនសង្ស័យ៦នាក់ ពាក់ព័ន្ធអំពើវាយដោយដៃប្លន់យកម៉ូតូមួយគ្រឿង ត្រូវបានកម្លាំងនគរបាល នៃអធិការដ្ឋាននគរបាលខណ្ឌមានជ័យ សហការជាមួយនគរបាល ការិយាល័យព្រហ្មទណ្ឌកម្រិតធ្ងន់ក្រុងភ្នំពេញ បើកប្រតិបត្តិការតាមបង្ក្រាបបានមួយសម្បុក បន្ទាប់ពីក្រុមទាំងនោះធ្វើសកម្មភាពវាយប្លន់យកម៉ូតូពីយុវជន២នាក់…
រាជធានីភ្នំពេញ ៖ ក្រុមជនសង្ស័យ៦នាក់ ពាក់ព័ន្ធអំពើវាយដោយដៃប្លន់យកម៉ូតូមួយគ្រឿង ត្រូវបានកម្លាំងនគរបាល នៃអធិការដ្ឋាននគរបាលខណ្ឌមានជ័យ សហការជាមួយនគរបាល ការិយាល័យព្រហ្មទណ្ឌកម្រិតធ្ងន់ក្រុងភ្នំពេញ បើកប្រតិបត្តិការតាមបង្ក្រាបបានមួយសម្បុក បន្ទាប់ពីក្រុមទាំងនោះធ្វើសកម្មភាពវាយប្លន់យកម៉ូតូពីយុវជន២នាក់ បានសម្រេចកាលពី វេលាទៀបភ្លឺ ថ្ងៃទី២០ ខែមិថុនា ឆ្នាំ២០១៨ នៅចំណុចគល់ស្ពានអាកាសស្ទឹងមានជ័យ តាមបណ្តោយផ្លូវលេខ២៧១ ក្នុងសង្កាត់ស្ទឹងមានជ័យទី២ ខណ្ឌមានជ័យ។ ក្រុមជនសង្ស័យពុំត្រូវបានបញ្ចេញអត្តសញ្ញាណ ខណៈនគរបាលកំពុងបន្តនីតិវិធីសាកសួរនាំ។ អធិការរងនគរបាលខណ្ឌមានជ័យ ទទួលផែនព្រហ្មទណ្ឌ លោកវរសេនីយ៍ទោ ម៉េង វិមានតារ៉ា បានប្រាប់កោះសន្តិភាព ឲ្យដឹងថា មុនឈានដល់ការចុះបង្ក្រាប គឺកម្លាំងនគរបាលប៉ុស្តិ៍ទំនប់ទឹក បានឃាត់ខ្លួនជនសង្ស័យ២នាក់ ដែលជាបក្ខពួកជាមួយក្រុមចោរ ទាំងនោះ បន្ទាប់ពីពួកគេធ្វើសកម្មភាពរួច។ ក្រោយឃាត់បាន នគរបាលប៉ុស្តិ៍ទំនប់ទឹក បានប្រគល់ជនសង្ស័យទាំង២នាក់មកឲ្យនគរបាលខណ្ឌមានជ័យ ដែលជាម្ចាស់ ដើម្បីសាកសួរនាំបន្តនីតិវិធី។
លោកអធិការរងបន្តថា ក្រោយការសាកសួរនាំតាមជំនាញរួចមក ជនសង្ស័យទាំង២នាក់ខាងលើ បានឆ្លើយប្រាប់ពីទីតាំងលាក់ខ្លួនរបស់បក្ខពួករបស់គេ ទើបកម្លាំងនគរបាលខណ្ឌមានជ័យ ដោយមានការសហការល្អពីនគរបាលការិយាល័យព្រហ្មទណ្ឌ កម្រិតធ្ងន់ក្រុងភ្នំពេញ បានបើកប្រតិបត្តិការចុះទៅបង្ក្រាបបានជាបន្តបន្ទាប់តែម្តងទៅ ដែលការបង្ក្រាប គឺធ្វើឡើងនៅក្នុងសង្កាត់ព្រែកថ្មី ខណ្ឌច្បារអំពៅ ធ្វើឡើងជាច្រើនកន្លែងផ្សេងៗគ្នាផងដែរ។ សូមបញ្ជាក់ថា ក្នុងរង្វង់ប្រតិបត្តិការបង្ក្រាបខាងលើនេះ កម្លាំងនគរបាលបានយកម៉ូតូជនរងគ្រោះបានមកវិញផងដែរ គឺម៉ាកហុងដាឌ្រីម សេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ 2GV-9242។ និងម៉ូតូ៣គ្រឿងផ្សេងទៀតជារបស់ក្រុមជនសង្ស័យ រួមមាន ៖ ទី១ម៉ាកហុងដា Beat ពណ៌ផ្កាឈូក លាយខ្មៅ ពាក់ស្លាកលេខ ភ្នំពេញ 1HB-1717 , ទី២ម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ សៀមរាប 1J-9264 និងមួយគ្រឿងទៀតម៉ាក ស៊ុយស៊ីគីឡេត ពណ៌ខៀវលាយស ពាក់ស្លាកលេខភ្នំពេញ 1GT-8765។
យ៉ាងណាមិញ បច្ចុប្បន្នជនសង្ស័យទាំង៦នាក់ ត្រូវបានបញ្ជូនខ្លួនទៅកាន់អធិការដ្ឋាននគរបាលខណ្ឌមានជ័យ រង់ចាំកសាងសំណុំរឿងបញ្ចូនទៅ តុលាការចាត់ការតាមនីតិវិធីច្បាប់។ ដោយឡែកម៉ូតូជនរងគ្រោះ សមត្ថកិច្ចនឹងធ្វើការទំនាក់ទំនង ឲ្យយកឯកសារសម្គាល់យានជំនិះមកផ្ទៀងផ្ទាត់ ដើម្បីទទួលយកទៅប្រើប្រាស់វិញផងដែរ។ គួររំលឹកថា កាលពីវេលាម៉ោង៣ និង៣០នាទីទៀបភ្លឺថ្ងៃទី២០ ខែមិថុនា ឆ្នាំ២០១៨នេះ មានករណីវាយប្លន់យកម៉ូតូបានសម្រេច បង្កឡើងដោយជនសង្ស័យមួយក្រុមធំមានគ្នា១០នាក់ ជិះម៉ូតូ៥គ្រឿងមិនចាំម៉ាក បានមកក្បែរម៉ូតូជនរងគ្រោះដែលជិះធ្វើដំណើរ២នាក់ ហើយធ្វើសកម្មភាព ព្រួតវាយ បណ្តាលឲ្យយុវជនម្នាក់ជាអ្នកឌុបត្រូវរងរបួសបញ្ជូនទៅសង្គ្រោះ និងម្នាក់ទៀតរងរបួសស្រាល ។
បន្ទាប់ពីវាយប្លន់បានសម្រេចហើយនោះ ក្រុមជនល្មើសបាននាំគ្នាជិះរត់គេច ដោយជិះបំបែកផ្លូវគ្នា តែអកុសលជនសង្ស័យ២នាក់ ក្នុងចំណោមអ្នកទាំង១០ ត្រូវបានកម្លាំងងនគរបាលប៉ុស្តិ៍ទំនប់ទឹក ល្បាតពួនស្ទាក់ចាប់ឃាត់ខ្លួនបានក្រោយកើតហេតុភ្លាមៗ ហើយក៏សួរចម្លើយពួកគេទាំង២នាក់ រហូតបន្តទៅតាមយកក្រុមបក្ខពួកបានជាបន្តបន្ទាប់ដូចដែលបានរៀបរាប់ពីខាងលើតែម្តងទៅ។ សូមបញ្ជាក់ថា ជនរងគ្រោះជាម្ចាស់ម៉ូតូមានឈ្មោះ រឹទ្ធ ភេទប្រុស អាយុ២៨ឆ្នាំ ស្នាក់នៅពោធិ៍ចិនតុង ខណ្ឌពោធិ៍ សែនជ័យ ( រងរបួសបញ្ជូនទៅមន្ទីរពេទ្យ ) និងម្នាក់ទៀតឈ្មោះ ដា រ៉ា អាយុ២៩ឆ្នាំ ស្នាក់នៅម្ដុំផ្សារសឡា សង្កាត់ ស្ទឹងមានជ័យ ខណ្ឌមានជ័យ៕
https://youtu.be/1WS6VYk4bnY
ចែករំលែកព័តមាននេះ